ஜெயலலிதாவுக்கு இன்னும் ஒரு முறை வாய்ப்பு!

தமிழக மக்கள் தொங்கு சட்டசபையை கொண்டு வந்து குதிரை பேரத்துக்கு வழி வகுக்காமல் அமோக ஆதரவை ஜெயலலிதாவுக்கு தந்திருக்கிறார்கள். மிகவும் அமைதியாகவே ஜெயலலிதாவின் அறிக்கை தற்போது இருக்கிறது. ஆனால் இவருக்கு தனிப் பெரும்பானமை கொடுதத்தை தவறாக விளங்கிக் கொள்ளாமல் மீண்டும் பழைய ஆடம்பரம், எவரையும் மதிக்காதது, உடனபிறவா சகோதரியின் தலையிடு,ஊழல் போன்ற தவறுகளை களைவதற்கு முன்னுரிமை அளித்து சிறந்த ஆட்சியை அளிக்க வேண்டும். சாமான்ய தமிழனின் உணர்வுக்கு மதிப்புக் கொடுத்து நல்லது செய்ய ஆரம்பித்தால் தொடர்ந்த முதல்வராக வலம் வரலாம். பழைய கதையே தொடர்ந்தால் அடுத்த ஐந்தாண்டில் உங்களை தூக்கி எறிய தமிழக மக்கள் தயங்க மாட்டார்கள்.

அடுத்து இலங்கை பிரச்னையில் காங்கிரஸ் காட்டிய கடினம்: கருணாநிதியின் குடும்பத்தவர் அளவுக்கதிகமாக அரசியல் அதிகாரத்தில் நுழைந்தது: ஸ்பெக்ட்ரம ஊழல்: தேவையற்ற இலவசங்கள்: அதில் அதிகம் கட்சியினர் பலன் அடைந்தது: போன்ற காரணங்களால் கருணாநிதியை நீக்க உங்களை தமிழக மக்கள் பயன்படுத்தியிருக்கிறார்கள். வெற்றிக்கான காரணமாக இதையேதான் நீங்களும் சொல்லியிருக்கிறீர்கள். இதை உணர்ந்து அனைத்து மக்களையும் அன்போடு அரவணைத்து செல்ல வேண்டிய பொறுப்பு உங்களுக்கு இருப்பதை மறந்து விட வேண்டாம்.

அடுத்து மம்தா பானர்ஜியை ஸ்டார் டிவி 'இனி நீங்கள்தான் முதல் அமைச்சர்' என்றவுடன் உடன் மறுத்து 'என்னை முதல் அமைச்சர் என்றெல்லாம் அழைக்க வேண்டாம். சாதாரணமாக மம்தா பானர்ஜி என்றே அழையுங்கள். மக்கள் மனதில் இடம் பிடிப்பதில் முதல்வராக நான் வர வேண்டும்' என்றார். அவரை முன்மாதிரியாக கொண்டு எளிமையுடன் உறுதியுடனும் செயல்படுவீர்களாக!

பெருமைக்கும் ஏனைச் சிறுமைக்கும் தம்தம்

கருமமே கட்டளைக் கல்.

-குறள் 505

வாழ்வில் ஒருவர் பெருமை சிறுமை அடைவதற்கும் பிறர் காரணம் அல்லர். அவரவர் செயலே காரணம். பொன் மாற்று அறிவதற்கு உரைகல் வைத்திருப்பவர் பொன்னை உரசிப் பார்த்துதான் அறிவர். ஒருவர் செய்யும் செயலே நல்லவரா? கெட்டவரா? என காட்டிவிடும்.

'நம்பிக்கை கொண்டோரிடம் உமது சிறகை தாழ்த்துவீராக!'

-குர்ஆன் 15:88

சிறகை விரிக்கும் போது பறவைகள் உயரத்திற்குச் செல்கின்றன. சிறகைத் தாழ்த்தும் போது பறவைகள் கீழே வருகின்றன. எனவே சிறகை விரித்தல் என்பது ஆணவத்திற்காகவும், சிறகைத் தாழ்த்துவது என்பது பணிவுக்காகவும் அரபு மொழியில் பயன்படுத்துவர். ஆட்சியாளர் தன் மீது நம்பிக்கை வைத்து ஆட்சியில் அமர வைத்திருக்கும் மக்களிடம் ஆணவம் கொள்ளாது பணிவாக நடந்து கொள்ள குர்ஆன் கட்டளையிடுகிறது.

இலவச திட்டங்களை குறைத்து, ஆடம்பர செலவுகளையும் குறைத்து சிறந்த ஆட்சி அமைய வாழ்த்துவோம்.