திருப்பூரில் நடந்த பிஜேபியின் கூட்டம் பற்றி....

சில தினங்களுக்கு முன்பு திருப்பூரில் பிஜேபியின் இளைஞர் அணி சார்பில் ஒரு கூட்டம் ஏற்பாடு செய்திருந்தனர். சிறப்புப பேச்சாளர்களாக ஜடாயுவைவும, அரவிந்தன் நீலகண்டனையும் அழைததிருந்தனர். ஜடாயு தமிழ்இந்து இணைய தளத்தை நடத்தி வருபவர். இவரது இயற்பெயர் சங்கர நாராயணன். மற்றொருவரான நீலகண்டன் இணையத்தில் பல கட்டுரைகளை எழுதி வருபவர். இணைய தொடர்பு உடையவர்களுக்கு இந்த இருவருமே ஓரளவு பரிச்சயப்பட்டவர்கள்.

பாஜகவின் இளைஞர அணி நடத்திய இந்த கருத்தரங்கில் நிறைய இந்து மத வேதங்களையும் புராணங்களையும் பற்றி அறிந்து கொள்ளலாம் என்று கருத்தரஙகை இணையத்தில் பார்வையிட்டேன். பேசிய இருவருமே இந்து மத பெருமையை கூறுவதை விடுத்து இஸ்லாம், கிறித்தவம், கம்யூனிஸம் என்றும் அதனால் இந்தியாவின் ஒருமைப்பாட்டுக்கு பாதகம் வரப்போவதாகவும் பட்டியலிட ஆரம்பித்தனர்.

கிறித்தவர்கள் மாவோயிஸ்டுகளோடு சேர்ந்து கொண்டும் இஸ்லாமியர்கள் கம்யூனிஸ்டுகளோடு சேர்ந்து கொண்டும் இந்த நாட்டை பிரிக்க முயல்கின்றனர் என்ற ஒரு பொய்யான குற்றச்சாட்டை வைக்க ஆரம்பித்தனர். இதற்கு எந்த ஆதாரத்தையும் சமர்ப்பிக்கவில்லை. குர்ஆனும் அறிவியலும் பல இடங்களில் மோதுகின்றன என்ற சில விபரங்களை அரவிந்தன் பட்டியலிட்டார். ஆனால் அதற்கெல்லாம் முன்பே பதில் கொடுத்தாகி விட்டபடியால் மற்ற கேள்விகளுக்கு போவோம்.

அடுத்து பேச வந்த ஜடாயு 'இந்து மதத்தில் சாதிகள் இருக்கின்றது. அதனால் எந்த பிரச்னையும் இல்லை. விஸ்வகர்மா என்ற சாதியைச் சேர்ந்தவர்கள்தான் சிலைகளை செய்து தருகின்றனர். அவர்கள் இந்த சிலை செய்யும் தொழிலை விட்டு விட்டால் நமக்கு சிலை யார் செய்து கொடுப்பர்?' என்ற அருமையான வாதத்தை வைத்தார். அதாவது சக்கிலியன் சக்கிலியனாகவே இருக்க வேண்டும். தோட்டி தோட்டியாகவே இருக்க வேண்டும். அதாவது ராஜாஜி சொன்ன குலக் கல்வித் திட்டம். இநத சாதி முறைகளை அப்படியே தொடர்ந்து கொண்டு நாம் இந்துத்வாவில் ஐக்கியமாக வேண்டும் என்ற கோரிக்கையை வைக்கிறார் ஜடாயு.

அவரைப் பார்த்து நாம் கேட்பது விஸ்வகர்மா சாதியினர் வேறு வேலைக்கு சென்று விட்டால் வழிபடுவதற்கு சிலை கிடைக்காது. சரி... அது போல் கோவிலில் மந்திரம் சொல்லி அர்ச்சகராக இருப்பதுதான் பிராமணர்களின் தொழில். ஆனால் ஜடாயு முதற்கொண்டு 95 சதமான பிராமணர்கள் இறைத் தொண்டு செய்வதில்லை. எந்த கோவிலும் சென்று மணியாட்ட செல்வதில்லை. எல்லோரும் நன்றாக படித்து அரசு உத்தியோகங்களிலும் அமெரிக்கா பிரிட்டன வளைகுடா என்று பறந்து சென்று வளமான வாழ்க்கையை வாழ்கின்றனர். இப்படி எல்லோரும் வெளி வேலைக்கு சென்று விட்டால் கோவிலில் அர்ச்சகராக வேலை செய்வது யார்? என்ற கேள்வியை கூட்டத்தில் யாரும் ஜடாயுவைப் பார்த்து கேட்கவில்லை. நாம் கேட்கிறோம் ஜடாயுவிடம். இதற்கு பதில் என்ன?

அடுத்து 'இன்று இந்தியாவின் ஒருமைப்பாட்டுக்கு வஹாபியிசத்தால் பெரும் கேடு வருகிறது. முன்பெல்லாம் இஸ்லாமிய பெண்கள் இந்த அளவு புர்காவை விரும்ப மாட்டார்கள். கடந்த இருபது வருடமாக தமிழகம் எங்கும் பெண்கள் கருப்பு புர்காவிலே வலம் வருகிறார்கள். நமது நாட்டு பாரம்பரியத்தை ஒட்டிய சூஃபியிசத்தை எதிர்க்கின்றனர். காலம்காலமாக தர்ஹாவை வணங்கி வரும் இஸ்லாமியர்களை வஹாபிய கூட்டுக்குள் அடைக்கப் பார்க்கிறார்கள்' என்று ஜடாயு பொரிந்து தள்ளினார்.

இங்குதான் இவர்களின் தந்திரத்தை நாம் பார்க்க வேண்டும். அதாவது ஏக இறைவன், நாகூர் தர்ஹா, ஏர்வாடி, ஐயப்ப சாமி, முருகன், பிள்ளையார் என்று பல தெய்வ வணக்கத்துக்கு முஸ்லிம்கள் வந்து விட்டால் இவர்களுக்கு பிரச்னை இல்லை. ஏனெனில் சீக்கியம், பவுத்தம், கிறித்தவம் போன்ற மதங்களை இந்து மதத்தின் உட்பிரிவாக ஆக்கியது போல் இஸ்லாத்தையும் கொண்டு வரச் சொல்லுகின்றனர். இதற்கு இடையூறாக இருப்பது வஹாபிகள். இதுதான் ஜடாயுவைப் போன்றவர்களின் எரிச்சலுக்கு காரணம்.

இன்று வஹாபியிசம்(ஏகஇறைக் கொள்கை) தமிழகத்தில் பரவியதால் கிடைத்த நன்மைகளை இங்கு பார்க்க வேண்டும். முன்பெல்லாம் பாபரி மசூதி இடிப்பு தினத்தில பல இடங்களில் வன்முறை வெடிக்கும். முஸ்லிம்களும் பஸ்ஸை கல்லெறிந்து தாக்குவது போன்ற செயல்களில் ஈடுபட்டனர். தவ்ஹீத் ஜமாத் என்ற ஒரு வஹாபிய (ஏக இறைவனை மட்டுமே வணங்குபவர்கள்) அமைப்பு உருவாக்கப்பட்டவுடன் அந்த அமைப்பின் சார்பில் அதே இளைஞன் போராட்டத்துக்கு வருகிறான். அரசு மீது தனக்குள்ள வெறுப்பை யாருக்கும் பாதகம் வராமல் சாத்வீகமான முறையில் வெளிப்படுத்துகிறான். அவனது கோபம் போராட்டத்தினால் சற்று மட்டுப்படுத்தப்படுகிறது. கலவியறிவு அற்ற சமூகமாக இருந்தவர்களை இன்று படிப்பின் அருமையை உணர்த்தியிருக்கின்றனர். அரசிடம் போராடி தனி இட ஒதுக்கீடு கேட்டு அதில வெற்றியும் பெற்றுள்ளனர். புரோகிதத்தை ஒழித்து எல்லோரும் அறிஞர்களாக மாற முயற்ச்சி எடுத்து அதில் வெற்றியும் பெற்றுள்ளனர். இதற்கு பணம் சவுதி அரசு தருவதில்லை. அப்படி வாங்கினாலும் குற்றமில்லை. ஆனால் அனைத்து செலவுகளும் மக்களிடம் வசூலித்தே செய்யப்படுகிறது. ஒருவன குர்ஆனையும் முகமது நபியையும் உளப்பூர்வமாக நெருங்க ஆரம்பித்து விட்டால் தனது நாட்டை நேசிப்பான். தனது நாட்டு மக்களை நேசிப்பான், முழு உலக மக்களையும் நேசிக்க ஆரம்பித்து விடுவான். ஏனெனில் உலக மக்களின் மூல பிதா ஒருவரே. அவரே ஆதம் என்று குர்ஆன் அறைகூவல் விடுக்கிறது.

இப்பொழுது சொல்லுங்கள். வஹாபியம் வளர்ந்ததனால் இந்தியாவுக்கு நன்மையா? தீமையா?

அடுத்து ஆரிய திராவிட பாகுபாடு பற்றி ஜடாயு பேசும் போது ஆரிய இனம் திராவிட இனம் என்பதே கட்டுக்கதை என்றும் அதற்கு எந்த ஆதாரமும் இல்லை என்றும் முழு பூசணிக்காயை சோற்றில் மறைக்க பார்த்தார். இது பற்றி பல ஆக்கங்கள் பலர் எழதினாலும் கலையகம் என்ற இணைய தளத்தில் பல புதிய செய்திகளை தருகின்றனர். நேரம் கிடைப்பவர்கள் படித்துப் பார்க்கவும்.

//இன்று ஈழத்தமிழரின் பூர்வீகமான வாழிடங்களில் சிங்களமயமாக்கல் நடைபெறுகின்றது. இதே போன்றதொரு கலாச்சார மேலாதிக்கம், இரண்டாயிரம் வருடங்களுக்கு முந்திய இலங்கையிலும் இடம்பெற்றது. அது ஆரிய மயமாக்கும் நடைமுறையாக ஆரம்பித்தது.

அந்தக் காலத்தில், சிங்கள மன்னர்கள் மட்டுமல்லாது, தமிழ் மன்னர்களும் தம்மை ஆரியர்கள் என்று அழைத்துக் கொள்வதில் பெருமைப் பட்டனர். யாழ்ப்பாண இராஜ்யத்தை சிங்கை ஆரியன் என்ற மன்னன் ஆண்டு வந்துள்ளான். இவன் பெயரிலேயே "சிங்கமும், ஆரியனும்" இருப்பது கவனிக்கத் தக்கது. ஆரியச் சக்கரவர்த்திகள் என்ற பெயரில் ஒரு அரச பரம்பரையினர், நீண்ட காலமாக வட இலங்கை ஆட்சியாளராக இருந்துள்ளனர். இவர்கள் கண்டி ராஜ்யத்துடன் சிறந்த ராஜதந்திர உறவுகளை பேணி வந்துள்ளனர். ஆரியச் சக்கரவர்த்திகள், இராமநாதபுரத்தை சேர்ந்த தமிழ்ப் பிராமணர்கள் என்றும், பாண்டிய மன்னனின் தளபதிகளாக ஈழத்திற்கு அனுப்பப் பட்டவர்கள் என்றும், ஒரு வரலாற்றுக் குறிப்பு கூறுகின்றது. (Aryacakravarti dynasty - http://en.wikipedia.org/wiki/Aryacakravarti_dynasty)//
-http://kalaiy.blogspot.com/2011/12/blog-post_26.html

கடைசியாக கேள்வி நேரமும் வந்தது. ஒரு அன்பர் ஜடாயுவிடம் 'ஒவ்வொரு சாதியினரும் வேறு வேறு கடவுளை வணங்குகின்றனர். சுடலைமாடன்சாமியை ஒரு சாதியினரும், சிவனை ஒரு சாதியினரும் பிள்ளையாரை ஒரு சாதியினரும் வணங்குகின்றனர். எப்படி இவர்கள் அனைவரும் ஒரு இயக்கத்தில் இணைவது?' என்று கேட்டார். அருமையான கேள்வி.

இதற்கு பதிலளித்த ஜடாயு 'பல சாதிகளும் பல தெய்வங்களை வணங்கினாலும் அவை அனைத்துமே ஒரு தெய்வத்திலிருந்து பிரிந்தவைகளே! எனவே பிரச்னையில்லை' என்றார். அதாவது தனக்கு கூட்டம் சேர்க்க வேண்டும் என்பதற்காக இங்கு ஏக தெய்வத்தை கொண்டு வருகிறார். ஆக பல தெய்வ வணக்கம் தவறு என்று தெரிந்து கொண்டே தனது சாதியின் மேலாண்மையை காப்பாற்றிக் கொள்ள ஏக தெய்வ மார்க்கமான இஸ்லாத்தை எதிர்க்கிறார். இப்படி பல குளறுபடிகளுக்கு மத்தியில் கருத்தரங்கு நிறைவுற்றது.

பெருமபான்மையான இந்து மக்களின் நலனுக்காக என்ற போர்வையில் இந்த கூட்டம் நடத்தப்படுகிறது. ஆனால் கூட்டமோ ஒரு ஆயிரத்தைக் கூட தாண்டவில்லை. அந்த அளவு இந்து மக்கள் இந்துத்வாவின் உண்மை முகத்தை உணர்ந்து கொண்டுள்ளனர்.

நீலகண்டனும், ஜடாயுவும் சிறந்த அறிஞர்கள். அதில் சந்தேகமில்லை. ஆனால் அஸ்திவாரம் பலமாக இல்லாமல் அடுக்கு மாடி கட்டிடம் கட்ட நினைத்ததுதான் இவர்கள் செய்த தவறு. சாதிகளை ஒழிக்காமல், பல தெய்வ வணக்கத்தை ஒழிக்காமல் இந்துக்களுக்குள் ஒற்றுமையை எக்காலத்திலும் உங்களால் கொண்டு வர முடியாது. சாதிகளை ஒழிக்க ஆரம்பித்தால் இந்து மதமும் இந்து மத வேதங்களும் காணாமல் போய் விடும். நமது முன்னோர்கள் வழிபட்ட 'ஒன்றே குலம் ஒருவனே தேவன்' என்ற கொள்கைக்கு திரும்பவும் பயணிக்க வேண்டி வரும். அப்படி பயணித்தால் மேட்டுக்குடியான உங்களைப் போன்றவர்களின் பிடி தளரும். இதற்கு நீங்களோ உங்களின் இந்துத்வாவின் தலைவர்களோ உடன் படபோவதில்லை. எனவே இந்த ஆரிய திராவிட பிரச்னை என்பது ஒரு தொடர்கதை........

மேலும் பெரியார் வாழ்ந்த இந்த மண்ணில் சாதி இருந்துதான் ஆக வேண்டும் என்று இந்த நூற்றாண்டிலும் சொல்வதற்கு ஒரு தைரியம் வேண்டும். அது ஜடாயுவிடமும் அரவிந்தனிடமும் அதிகமாகவே உள்ளது.