சமீபத்திய எனது உம்ரா பயணம்!

மதியம் 3 மணிக்கு (03-03-2012) சொகுசு வண்டியில் மெக்கா நோக்கி பயணப்பட்டோம். நாங்கள் வந்த பஸ்ஸில் 15 பேர்தான் இந்திய பாகிஸ்தான் மற்றும் எகிப்தை சேர்ந்தவர்கள். மற்ற அனைவரும் சவுதிகள். குடும்பம் சகிதமாக வந்திருந்தனர். எனது தாயார் உம்ரா பயணமாக தமிழகத்திலிருந்து வருவதால் அவர்களுக்கு உதவும் முகமாக எனது பயணம் அமைந்திருந்தது. இடையில் தொழுகைக்காக ஒரு இடத்தில் பஸ் நிறுத்தப்பட்டது. இரண்டு தொழுகைகளையும் சுருக்கி சேர்த்து தொழுது விட்டு இரவு உணவையும் ஹோட்டலில் கழித்து விட்டு பயணத்தை தொடர்ந்தோம்.

இரவு இரண்டு மணி அளவில் உம்ராவுக்காக உடுத்தப்படும் சீருடையான இஹ்ராம் கட்டுவதற்காக ஒரு எல்லையில் நிறுத்தப்பட்டது. உலகின் பல பாகங்களிலிருந்து வருபவர்களுக்காக நான்கு புறமும் எல்லைகள் நிறுவப்பட்டுள்ளன.

1529. இப்னு அப்பாஸ்(ரலி) அறிவித்தார்.
நபி அவர்கள் மதீனாவ வாசிகளுக்கு துல்ஹுலைஃபாவையும் ஷாம் வாசிகளுக்கு ஜுஹ்ஃபாவையும் யமன் வாசிகளுக்கு யலம்லமையும் நஜ்த் வாசிகளுக்கு கர்னையும் இஹ்ராம் அணியும் எல்லைகளாக நிர்ணயித்தார்கள். இவ்வெல்லைகள் இவர்களுக்கும் ஹஜ் உம்ராவுக்காக இவ்வழியே வருபவர்களுக்கும் உரியனவாகும். இந்த வரையறுக்கப்பட்ட எல்லைகளுக்குள் இருப்பவர்கள், தாம் வசிக்குமிடத்திலேயே எங்கேனும் இஹ்ராம் அணிந்து கொள்ளலாம் என்றும் மக்கவாசிகள் மக்காவிலேயே இஹ்ராம் அணிந்து கொள்ளலாம் என்றும் கூறினார்கள்.
புஹாரி Volume :2 Book :25


எங்களுக்குரிய எல்லை வந்ததும் அனைவரும் குளித்து விட்டு இஹ்ராம் துணியான வெள்ளை உடையை உடுத்திக் கொண்டோம். தைக்கப்படாத தூய வெள்ளை உடையான இந்த உடையையே உம்ரா பயணம் மேற் கொள்பவர் அணிய வேண்டும். பெண்கள் பழைய உடையிலேயே இருக்கலாம். அரபி, இந்தியன், பாகிஸ்தானி, மதராஸி, மலையாளி என்று மக்களை கூறு போடாமல் எல்லோரும் ஒரு தாய் மக்களே என்பதை உணர்த்தும் விதமாக இந்த தூய வெள்ளை உடுத்துவது உம்ரா ஹஜ் செய்பவர்களுக்கு கடமையாகும்.

பேண்ட் சர்ட், பஞ்சாபி ஆடை, சவுதிகள் அணியும் நீள அங்கி எல்லாம் மாறி பஸ் முழுக்க தூய வெள்ளைக்கு மாறியது.(ஒரு சில பெண்களைத் தவிர) பல மொழிகளைப் பேசிக் கொண்டிருந்த அனைவரும் 'லப்பைக் அல்லாஹூம்ம லப்பைக்' என்ற பிரார்த்தனையை மனதுக்குள் சொல்ல ஆரம்பித்தனர்.



'வந்து விட்டேன்! இறைவா! உன்னிடமே வந்து விட்டேன்! உனக்கு யாதொரு இணையுமில்லை. உன்னிடமே வந்து விட்டேன். நிச்சயமாக புகழும் அருட்பாக்கியங்களும் ஆட்சியும் உனக்கே உரியன. உனக்கு யாதொரு இணையுமில்லை.'

என்ற பிரார்த்தனையை மனதுக்குள் சொல்லிக் கொண்டே வந்தோம். மெக்கா எல்லையை பஸ் அடைந்தவுடன் எங்களின் லாட்ஜூக்கு சென்று உடைமைகளை வைத்து விட்டு காஃபாவை நோக்கி நடக்க ஆரம்பித்தோம். பதினைந்து நிமிடத்தில் பள்ளியை அடைந்தோம். உலக மக்கள் அனைவரும் ஒரே உடை, ஒரே வாக்கியம், ஒரே மாதிரியான பிரார்த்தனைகளோடு பலரும் கஃபாவுக்குள் நுழைந்தனர். இப்படி ஒரு ஒற்றுமையை உலகில் வேறு எங்கும் நம்மால் பார்க்க முடியாது. உலக மக்கள் அனைவருக்கும் சொந்தமான ஒரு மார்க்கம் இது என்பதை இந்த நிகழ்வு நமக்கு தெரிவிக்கிறது.

நான் மெக்கா வருவதற்கு முன்பே எனது தாயார் முன்பே ஜெத்தாவிலிருந்து மெக்கா வந்து விட்டார். எனவே அந்த குரூப்போடு சேர்ந்து உம்ரா கடமையை நிறைவேற்றி விட்டார். நானும் எனது குரூப்பும் உம்ராவை முடித்து விட்டு ரூமுக்கு திரும்பி விட்டோம்.. அதன் பிறகு குளித்து விட்டு தாயாரின் ஹோட்டலை தேடினேன். ஆச்சரியமாக நாங்கள் தங்கியிருந்த பகுதியிலிருந்து 100 மீட்டர் வித்தியாசத்தில் எனது தாயாரின் ரூமும் இருந்தது. நெகிழ்ச்சியான சந்திப்பு. பிறகு தாயாரோடு மதிய உணவு அருந்தி விட்டு 4 மணி அளவில் கஃபாவுக்கு சென்றோம். தொழுதுவிட்டு சேர்ந்தே வலம் வந்தோம். பல பிரார்த்தனைகள். உலக அமைதிக்காகவும், எனது தாய் நாட்டின் அமைதிக்காகவும், உலக முஸ்லிம்களின் அமைதிக்காகவும், எனது குடும்பத்தின் அமைதிக்காகவும் எனது தாயாரோடு சேர்ந்து பிரார்த்தனையில் ஈடுபட்டேன்.

இங்கு புரோகிதர் யாரும் கிடையாது. அவரவர் தொழுது விட்டு தங்களது தாய் மொழியில் கேட்டுக் கொள்ள வேண்டியதுதான். இங்கு கேட்கப்படும் பிரார்த்தனைகள் இறைவனால் உடன் அங்கீகரிக்கப்படுவதால் பலரும் அழுது பிரார்த்தனையில் ஈடுபட்டனர்.

“கூட்டம் குறைவாக இரவு இரண்டு மணிக்கு இருக்கும். அப்பொழுது வரலாம்” என்று எனது தாயார் சொல்லவே ரூமுக்கு திரும்பினோம். இரவு இரண்டு மணிக்கு திரும்ப வந்தால் அதே கூட்டம் தான் கொஞ்சம் கூட குறையவில்லை. ஹஜ் நேரம் இல்லையாதலால் கூட்டம் குறைவாக இருக்கும் என்று நினைத்தேன். ஆனால் ஹஜ்ஜைப் போலவே நெரிசல் நாளுக்கு நாள் அதிகமாகிக் கொண்டு தான் இருக்கிறது. உலக முஸ்லிம்களுக்கு இறை பக்தி அதிகமாகி விட்டதையே இது காட்டுகிறது. தமிழகத்தில் கூட நாகூர் தர்ஹாவுக்கு கூட்டம் வருவது இல்லை என்றும் இந்த வஹாபிகள் வந்து அனைவரையும் சந்தனக் கூடு வைபவத்திலிருந்து தூரமாக்குவதாகவும் ஒரு பதிவர் கூட வயிறெறிந்து பதிவிட்டிருக்கிறார். அந்த அளவு தூய்மையான இஸ்லாமிய ஆர்வம் சமீப காலங்களில் மக்களிடம் வந்துள்ளது. அந்த ஆர்வம் தமிழகத்தையும் விடவில்லை. தர்ஹா வணக்கம், சூஃபியிசம் எல்லாம் மறைந்து ஏகத்துவவாதிகளாக தமிழக முஸ்லிம்களும் மாறி வருகின்றனர். மகிழ்ச்சிக்குரிய விடயமல்லவா!

முஸ்லிம்களைத் தவிர்த்து மற்ற மார்க்கங்களில் நாத்திகம் அதிகரித்து வருவதை நாம் பார்க்கிறோம். இந்த நவீன உலகில் நாத்திகனாக இருப்பது அறிவு ஜீவிக்கு அடையாளமாக பொய்யான தோற்றத்தில் காட்டப்படுகிறது. ஆனால் முஸ்லிம்களைப் பொருத்த வரையில் படித்தவரிலிருந்து பாமரர் வரை இறை பக்தியில் திளைப்பதை பார்க்கிறோம். நாத்திகம் இங்கு மிகவும் குறைவு. அதற்கு காரணம் மனித கரம் புகாத இறை வேதமான குர்ஆன் என்றால் மிகையாகாது.



வரும் கூட்டத்தை சமாளிக்க கஃபாவை விஸ்தரிக்கும் பணியில் சவுதி அரசு ஈடுபட்டுள்ளது. அருகில் இருக்கும் பெரும் பெரும் கட்டிடங்கள் எல்லாம் இடிக்கப்படும் காட்சியை பார்த்துக் கொண்டே சென்றோம். 2020 வாக்கில் புதுப் பொலிவுடன் காஃபா மிளிரும் இன்ஷா அல்லாஹ்.
காஃபாவில் ஆப்ரஹாம் நபி நின்று பிரார்த்தனை செய்த இடத்தில் நாமும் நின்று பிரார்த்தித்தால் இறைவன் உடன் ஏற்றுக் கொள்வான் என்ற நம்பிக்கை இருப்பதால் அங்கு எப்போதுமே கூட்டமாக இருக்கும். தொழுது துவா கேட்டனர் பலர் அந்த நெரிசலிலும். அங்கு நின்ற ஒரு பெண் போலீஸ் என் தாயார் அதிக நேரம் பிரார்த்தனை செய்வதைப் பார்த்து மற்றவர்களுக்கு வழி விடச் சொன்னார். ஆனால் என் தாயாரோ நகருவதாக இல்லை. தொழுது பிரார்த்தனையில் ஈடுபட்டார்கள். அந்த பெண் போலீஸோ என்னிடம் சொல்லி அழைத்து செல்லுமாறு சொன்னார். என தாயாரோ அந்த பெண் போலீஸிடம் 'இந்தியாவிலிருந்து வந்திருக்கிறோம். எங்களுக்கு கொஞ்சம் அதிக நேரம் கொடுத்தால் என்ன?' என்று தமிழிலேயே சற்று சூடாக அந்த பெண் பொலீஸிடம் பேச ஆரம்பித்தார். 'ஆஹா...நமக்குக் கூட இவ்வளவு தைரியமாக பேச வராதே!” என்று மனதுக்குள் நினைத்துக் கொண்டேன். அவர்கள் நாட்டில் வந்து: நேற்று வந்த எனது தாயாருக்கு: இந்த இடத்தின் மீது அவர்கள் எடுத்துக் கொண்ட உரிமையை நினைத்து ஆச்சரியப்பட்டுப் போனேன்.

அந்த பெண் போலீஸோ புன்முறுவலோடு அவர்கள் சொல்வதை கேட்டுக் கொண்டே மற்ற பக்கம் சென்று விட்டார். சில பெண்கள் அருகில் இருக்கும் கருப்புக் கல்லை தொட்டு விட வேண்டும் என்று ரொம்பவும் முயற்ச்சிக்கின்றனர். முடியாதவர்கள் தூரத்திலிருந்தே சைகையின் மூலமாக கைகளை உயர்த்தினாலே போதுமானது. அந்த நன்மை கிடைத்து விடும். இது பலருக்கு விளங்காதலால் அந்த இடத்தில் பெரும் தள்ளு முள்ளு. அங்கு ஒரு இரும்பு வேலி அமைத்து ஒவ்வொருவராக விட்டால் பல வயதானவர்கள் சிரமப்படுவது குறையும். இதை சவுதி அரசு ஆவண செய்ய வேண்டும். இங்குள்ள தாவா சென்டரிலும் இதைப் பற்றி பேசிக் கொண்டிருந்தேன்..

அடுத்த நாள் கஃபாவில் வலம் வரும் போது நானும் தாயாரும் பிரிந்து விட்டோம். கூட்டத்தில் எங்கு தேடுவது? சுற்றை முடித்து விட்டு தாயாரை செல் போனில் தொடர்பு கொண்டேன். அவர்களோ மர்வா குன்றுக்கு பக்கத்தில் உள்ள வெளி வாயிலில் காத்திருக்கிறேன் என்று அழகான வழியை சொன்னார்கள். மற்றவர்களிடம் விசாரித்துக் கொண்டு அந்த இடத்தை சென்று அடைந்தேன். மெக்காவில் அவர்களுக்கு வழி காட்ட நான் ரியாத்திலிருந்து போக முடிவில் எனக்கு அவர்கள் வழி காட்டினார்கள். :-) எப்படியோ நல்லமுறையில் மூன்று நாட்கள் மெக்காவில் தாயாரோடு தங்கி விட்டு அலுவலகத்தில் ஆள் இல்லாததால் ரியாத் திரும்பினேன். எனது தாயாரோ இன்னும் நான்கு நாட்களில் மெதினா சென்று விட்டு அங்கிருந்து ஜெத்தா பின் மெட்ராஸ் செல்வார்கள் இறைவன் நாடினால்.

ஓர் உம்ராச் செய்வது மறு உம்ரா வரையில் உள்ள பாவங்களின் பரிகாரமாகும்... (நூல்கள்: புகாரி 1773. முஸ்லிம் 2624. திர்மிதீ 855. நஸயீ, அஹ்மத், இப்னுமாஜா. முஅத்தா ஆகிய நூல்களிலும் இடம்பெற்றள்ளது)
''ரமளானில் செய்யப்படும் ஓர் உம்ரா ஹஜ்ஜுக்கு நிகரானதாகும், அல்லது என்னோடு ஹஜ் செய்வதற்கு நிகரானதாகும்'' என்று நபி (ஸல்) அவர்கள் கூறினார்கள். (நூல்கள்: புகாரி 1782, 1863. முஸ்லிம் 2408, 2409)

டிஸ்கி: உம்ரா முடிந்து விட்டது. திரும்பவும் ஊருக்கு சென்று சன் டிவி ராஜ் டிவி குடும்ப சீரியல்களை பார்த்துக் கொண்டு கண்ணைக் கசக்கிக் கொண்டு இருக்காமல் செய்திகள், உலக நடப்புகள், தவ்ஹீத் புரோக்ராமகள் அதிகம் பாருங்கள் என்று மறைமுகமாக சொன்னேன். ஒத்துக கொண்டார்கள். அப்பாடா....சீரியல்களுக்கு கொஞ்சம் விடுதலை. :-)