காமிக்ஸ்களின் காலங்களுக்குச் செல்வோமா!

காமிக்ஸ்களின் காலங்களுக்குச் செல்வோமா!

ஐந்தாம் வகுப்பு ஆறாம் வகுப்புகளெல்லாம் படிக்கும் காலங்களில் காமிக்ஸ் பைத்தியமாக திரிந்தேன். அதிலும் முத்து காமிக்ஸ் வெளியிடும் புத்தகங்கள் அனைத்தும் மிக அருமையான கதைகளைக் கொண்டிருக்கும். இதில் வரும் ஹீரோக்கள் பலராக இருந்தாலும் எனக்கு பிடித்த ஹீரோ 'இரும்புக் கை மாயாவி' தான். இதற்காக இவர்கள் வரைந்து வெளியிடும் படங்களும் தத்ரூபமாக இருக்கும். வீட்டில் செலவுக்கு கொடுக்கும் சில்லறை பணங்களை எல்லாம் சேமித்து முத்து காமிக்ஸ் வாங்க பயன் படுத்திக் கொள்வேன்.

நண்பர்கள மத்தியிலும் இதனை சுற்றுக்கு கொடுத்து அவர்களிடம் உள்ள மற்ற புத்தகங்களை இரவல் வாங்கியும் படிப்போம். ராணி காமிக்ஸ் என்று பல பெயர்களில் வந்தாலும் முத்து காமிக்ஸூக்கு ஈடாக இதுவரை தமிழில் புத்தகங்கள் வரவில்லை என்றே நினைக்கிறேன்.

காசு கொடுத்து வாங்கி கட்டுப்படியாகவில்லை என்று எங்கள் ஊர் அரசு லைபரரியில் மெம்பராக சேர்ந்தேன். நுலகத்தின் உறுப்பினர் எண் 451. இன்றும் எனக்கு அது ஞாபகம் இருக்கிறது. அங்கு கணக்கிலடங்காத சிறுவர் புத்தகங்கள் காமிக்ஸூகள் என்று அடுக்கி வைத்திருந்தனர். ஒரு பத்தகம் விடாமல் அனைத்தையும் படித்து முடித்து விட்டேன். கொஞ்சம் பெரியவன் ஆனதும் தமிழ்வாணனின் கதைகளை படிக்க ஆரம்பித்தேன். சங்கர்லால் என்ற பெயரில் தமிழ்வாணன் எழுதிய அழகு தமிழில் வ்ந்த அனைத்து கதைகளையும் ஓரளவு படித்து விட்டேன்.

இன்னும் சற்று பெரியவனான பிறகு மு வரதராசனார் கதைகளுக்கு ரசிகனானேன். கல்லோ காவியமோ, கரித்துண்டு போன்ற பல நாவல்கள் முவ வின் கை வண்ணத்தில் மிக அநாயசமாக கதையின் ஓட்டம் செல்லும். அப்பொழுதெல்லாம் வீட்டில் ஒரு மர்ஃபி ரேடியோ ஒன்று மட்டுமே இருக்கும். அதிலும் அதிகம் இலங்கையின் அழகு தமிழில் ஒலிபரப்பாகும் நிகழ்ச்சிகளை கேட்பதும் சிறந்த பொழுது போக்கு. அதை விட்டால் மாலை நேரங்களில் பள்ளி விளையாட்டு திடலில் பேட் மிட்டன் விளையாடுவதும் எனது வழமையான பழக்கங்களில் ஒன்று. அப்போது ஒன்பதாவது படித்துக் கொண்டிருந்தேன். விளையாட்டில் எனக்குள்ள ஆர்வத்தைப் பார்த்த எனது தாத்தா என்னை திருச்சிக்கு அழைத்துச் சென்று புதிய பேட் ஒன்றை எனக்கு பரிசாக வாங்கித் தந்தார். வலங்கைமான் பள்ளி சார்பாக சென்று ஜெயித்து வந்த சமயம் அது.

இன்னும் சற்று பெரியவனான போது சுஜாதாவின் எழுத்துக்கு ஒரு மாதிரியாக அடிமையாகவே ஆகி விட்டேன் என்று சொல்லலாம். எங்கள் வீட்டுக்கு அந்த காலத்திலிருந்தே கல்கண்டும், ஆனந்த விகடனும் தொடர்ந்து வரும். விகடனில் தொடராக வந்த கரையெல்லாம் செண்பகப்பூ வையும் கனவுத் தொழிற்சாலையும் ஒரு வாரம் விடாமல் தொடர்ந்து படித்து வந்தேன். அதன் பிறகு இன்னும் பெரியவன் ஆனபோது சுஜாதாவின் அறிவியல் சம்பந்தமான கணிணி சம்பந்தமாக கதைகள் கேள்வி பதில்கள் போன்றவற்றை தேடித் தேடி படிக்க ஆரம்பித்தேன். சுஜாதாவின் அறிவியல் தொடர்கள் முதலில் சற்று புரியாமல் இருந்தாலும் சில காலத்துக்குப் பிறகு விளங்க ஆரம்பித்தது. பெண் எழுத்தாளர்களில் சிவசங்கரி, லெஷ்மி, போன்றவர்களின் கதையும் புஷ்பா தங்கதுரையின்(இவர் ஆண்) கதைகளையும் விரும்பி படிப்பதுண்டு.

தற்போது புத்தகம் படிக்கும் பழக்கமெல்லாம் போய் கிடைக்கும் ஓய்வு நேரங்கள் எல்லாவற்றையும் இணையமே எடுத்துக் கொண்டு விடுகிறது. அன்று இரும்புக் கை மாயாவில் ஆரம்பித்த படிக்கும் பழக்கம் இடையில் சுஜாதாவிடம் வந்து இன்று மற்றொரு இரும்பு மனிதரான பி..ஜெய்னுல்லாபுதீனிடம் வந்து நிற்கிறது. இனி வரும் காலத்தில் யாருடைய எழுத்தைப் படிக்கப் போகிறேனோ அது இறைவன் கையில் உள்ளது. சரிதானே!

---------------------------------------------------

பிரபஞ்சத்தின் ஆரம்பக் கணம் ? - Big Bang

ஒரு புரோட்டன் என்பது எத்தனை சிறியது ? அதன் 'ட்'டன்னாவின் புள்ளியின் பரிமாணத்தில் 500,000,000,000 புரோட்டான்களை அடக்க முடியும். அல்லது ,ஐந்து லட்சம் ஆண்டுகளுக்கு எத்தனை செக்கண்டுகள் உள்ளனவோ, ஏறத்தாழ
அத்தனை புரோட்டான்களை அடக்க முடியும்.

இந்த புரோட்டனை 100 கோடி பாகமாக்கினால் ஏற்படும் அவ்வளவு சிறிய இடைவெளியில் , ஒரு அவுன்ஸ் மேட்டர் என்னும் பருப்பொருளை அடைத்துப் பாருங்கள். நீங்கள் ஒரு பிரபஞ்சத்தை சிருஷ்டிக்கத் தயார் !

பரிமாணமற்ற அத்தனை சிறிய இடத்தில் பிரபஞ்சத்தின் அத்தனை பருப்பொருள்களின் சாத்தியங்களும் அடர்ந்திருந்த அந்த ஆரம்பக் கணத்தை 'ஒருமித்த கணம்' (சிங்குலாரிட்டி singularity ) என்கிறார்கள். அதிலிருந்து ,காரணமின்றி திடீரென அத்தனை சக்தியும் வெடித்துச் சிதறிப் பரவியது.

-சுஜாதா

அதெப்படி காரணமின்றி வெடித்து சிதறும் என்பதை சுஜாதா விளக்கவிலலை. விளக்க ஆரம்பித்தால் இறைவனின ஆற்றலை ஒத்துக் கொண்டது மாதிரி ஆகி விடும். :-)

.