உலக மார்க்கங்களிடையே சமூக நல்லிணக்கம் சாத்தியமா?

உலக மார்க்கங்களிடையே சமூக நல்லிணக்கம் சாத்தியமா?


சவுதி அரேபியாவின் வெளி விவகாரத்துறை சவுதி-இந்திய இளைஞர்களின் கூட்டமைப்பின் (Saudi-Indian Youth Forum) நிறைவு நாளை வியாழக்கிழமை ரியாத்தில் இனிதே நிறைவு செய்தது. வெளி விவகாரத் துறையை கவனித்து வரும் நிஜார் மதனி, கலாசார பிரிவை நிர்வகித்து வரும் யூசுப் அல் சதோன், சவுதி அரேபியாவுக்கான இந்திய தூதர் ஹமீத் அலி போன்ற முக்கியஸ்தர்கள் இந்த விழாவில் கலந்து கொண்டு கௌரவித்தனர். இதற்கு முன்னால் 26 பேர் அடங்கிய சவுதி அரேபிய இளைஞர் குழுமம் ஒன்று சென்ற மார்ச் மாதம் ஹைதராபாத், டெல்லி, பெங்களூர் போன்ற முக்கிய கணிணி நகரங்களுக்கு விஜயம் அளித்திருந்தனர். அதன் தொடர்ச்சியாக இந்த நிகழ்வும் ஏற்பாடு செய்யப்பட்டிருந்தது. இது போன்ற நிகழ்வுகள் பல தரப்பட்ட மார்க்கங்களை பின்பற்றும் இளைஞர்கள் கலந்துரையாடி தங்களுக்கிடையே உள்ள கசப்புகளை நீக்க துணை புரிகிறது.

இந்தியாவுக்கான சவுதி தூதர் இது பற்றி கூறும் போது 'மன்னர் அப்துல்லாவின் ஏற்பாட்டின் படி இந்த இரண்டு நாடுகளின் வேறுபட்ட கலாசார இளைஞர்கள் சமூகங்களுக்கிடையே நல்லுறவை ஏற்படுத்த பாடுபடுவர். இஸ்லாமின் உண்மையான தத்துவம் சகல மார்க்கங்களையும் மதித்து அவர்களோடு முறுகல் நிலையை உண்டாக்காமல் சகோதரத் தன்மையோடு வாழ வேண்டும் என்று போதிப்பதே! அத்தகைய இலக்கை எட்டுவதற்கு இது போன்ற அமைப்புகள் தற்போது அவசியம்' என்கிறார்..

இந்த அமைப்பு இதற்கு முன் மூன்று கலந்தாய்வுகளை இதற்கு முன் மூன்று நாடுகளில் நடத்தி முடித்துள்ளது. சைனா, பிரேசில், ஜெர்மனி போன்ற மூன்று நாடுகளில் இந்த கூட்டம் முன்பு வெற்றிகரமாக நடத்தப் பட்டு நான்காவது மாநாடாக சவுதி அரேபியா ரியாத்திலும் சென்ற வியாழக்கிழமை நடந்து முடிந்துள்ளது.

நிஜார் மதனி தனது பேச்சில் 'இளைஞர்கள் அமைதியையும், சகோதரத்துவத்தையும், இந்த உலகம் முழுக்க எடுத்துச் செல்ல வேண்டும். அதற்கு இந்த மாநாடு பயன்பட வேண்டும்' என்று குறிப்பிட்டார்.

யூசுப் அல் சதோன் தனது பேச்சில் 'இந்த அமைப்பில் அங்கம் வகிக்கும் சவுதி இளைஞர் இளைஞிகளை நான் வெகுவாக பாராட்டுகிறேன். உலகின் மிகப் பெரிய ஜனநாயக நாட்டின் இளைஞர்களோடு ஒரு அமைப்பாக செயல்பட்டு பல முன்னேற்றங்களை இந்த அமைப்பு பெற்றுள்ளது. இந்த அமைப்பு இவ்வளவு சிறப்பாக தனது பணியினை செய்வதற்கு உறுதணையாக இருக்கும் அனைவருக்கும் எனது நன்றியைத் தெரிவித்துக் கொள்கிறேன்' என்றார்.

இந்த விழாவில் மார்ச் மாதம் சவுதி மாணவர்கள் குழு இந்தியாவில் ஹைதரபாத், பெங்களூர், மற்றும் டெல்லி சென்று அங்கு கலந்து கொண்ட நிகழ்வுகளை எல்லாம் காணொளியாக காண்பிக்கப்பட்டது. மேலும் இந்த மாணவர்கள் குழு அரசியல் தலைவர்களையும், கணிணி வல்லுநர்களையும், சந்தித்த நிகழ்வுகளும் காணொளியாக காட்டப்பட்டது.

சவுதி அரேபியாவும் இந்தியாவும் பல துறைகளில் ஒன்றிணைய வேண்டும். இதன் மூலம் இரு நாடுகளும் பலன் பெற பல வாய்ப்புகள் உண்டு என்ற செய்தியை சகோதரர் தாவூத் அறிக்கையாக சமர்ப்பித்தார். ஐநாவின் பான் கி மூனுக்கும் இந்த அமைப்பின் சார்பில் உலக அமைதிக்கான கருத்துரைகள் அனுப்பப்பட்டது.

இந்த விழாவில் நமது முன்னால் ஜனாதிபதி ராக்கெட் விஞ்ஞானி அப்துல் கலாமுக்கும் புகழாரம் சூட்டப்பட்டது. பல அறிவு ஜீவிகளும் கௌரவிக்கப்பட்டதோடு விழா இனிதே நிறைவுற்றது.

-அரப் நியூஸ்
12-05-2012

இது போன்ற அமைப்புகள் இன்னும் ஊக்கப்படுத்தப்பட்டு இரு நாடுகளின் கலாசாரம் மற்றும் வர்த்தகம் பற்றிய புரிந்துணர்வு ஏற்பட வேண்டும். இதில் இரு நாடுகளுக்குமே பலன் உண்டு. படித்த மக்கள் அதிகம் கொண்ட நமது நாடும் பொருளாதாரத்தில் சிறந்து விளங்கும் சவுதியும் கை கோர்த்தால் இரு நாடுகளும் பல வெற்றிகளை அடையும் சாத்தியம் உண்டு..

மேலும் ஒரு சிறந்த ஆட்சியாளரான அப்துல்லாவை அந்த நாடு பெற்றிருப்பதும் இது போன்ற முன்னேற்றங்களுக்கும் காரணம். வானளாவிய அதிகாரம் இவருக்கு இருந்தும் 'சூரா' கவுன்சில் என்ற ஒரு அமைப்பை ஏற்படுத்தி அதில் அறிவு ஜீவிகளை அங்கத்தினர்களாக்கி (நம்மூர் மாநிலங்களவை போல) யுள்ளார். அந்த சூரா கவுன்சிலும் குர்ஆனின் சட்டத்தின் படி தங்களின் கருத்துக்களை சட்டமாக்குகின்றன. நவீன பிரச்னைகளையும் எதிர் கொள்கின்றன.

வஹாபியம் வளர்ந்தால் எல்லோரும் ஒரு முழத்துக்கு தாடியுடனும், ஒரு கையில் கத்தியுடனும் மறு கையில் துப்பாக்கியுடனும் வெறி கொண்டு அலைவார்கள் என்ற கருத்து பரவலாக பரப்பப்பட்டு வருகிறது. இது எந்த அளவு பொய்யான பரப்புரை என்பதை இந்த நிகழ்வுகள் நமக்கு காட்டுகின்றன. வஹாபியத்தை அதாவது குர்ஆன் ஹதீஸின் படி முடிந்த வரை ஆட்சி செய்ய ஆசைப்பட்டு அதனை உரிய முறையில் செயல்படுத்தி வரும் சவுதி அரேபியாதான் மாற்று கலாசார மக்களை அரவணைத்து செல்ல வேண்டும் என்ற போதனையையும் பண்ணுகிறது.



இவர்கள் பாஷையில் வஹாபியம்(குர்ஆனின் வழி) வளர்ந்தால் மூடப் பழக்கங்கள் ஒழியும்: மதங்களுக்கிடையே நல்லுறவு நிகழும்: முஸ்லிம்கள் அனைவரும் படித்த மக்களாக மாறுவர்: பெண்களின் முன்னேற்றம் மிகுதமாக இருக்கும்: அறிவார்ந்த சமூகம் ஒன்று உருவாகும். அப்படி ஒரு சமூகம் நமது நாட்டில் உருவானால் இந்தியன் என்ற வகையில் அனைவரும் பெருமைப்படக் கூடிய நிகழ்வாகுமல்லவா!

-----------------------------------------

சவூதி மன்னரின் உயர்ந்த உள்ளம்!

மன்னர் அப்துல்லா என் தாய் நாட்டுக்கு அரசு முறைப் பயணத்தை முடித்து விட்டு வந்திருக்கும் இந்த தருணத்தில் என் எண்ணங்கள் சிலவற்றைப் பகிர்ந்து கொள்கிறேன். என் பெயர் வி.ஆர்.சோன்டி. இந்து மதத்தைச் சேர்ந்தவன்.. தற்போது அமெரிக்காவில் வசித்து வருகிறேன்.

முதலாவதாக 1955 ஆம் வருடம் மதிப்பிற்குரிய மன்னர் அப்துல் அஜீஸ் இந்தியா விஜயம் செய்திருந்தார். மும்பை நகரத்தில் திறந்த காரில் வலம் வந்தார். அப்போது அங்கு கூடியிருந்த மக்களுக்கு நிறைய தங்க காசுகளை இலவசமாக அளித்தார். ஏழை மக்கள் போட்டி போட்டுக் கொண்டு தங்க காசுகளை வாங்கிச் சென்றார்கள. அது போல் தங்க நாணயம் பெற்றவர்களில் நானும் ஒருவன். ஏழை பணக்காரன் என்ற பாகுபாடு பார்க்காமல் மக்களோடு மக்களாக அனைவரையும் ஒன்றாக நினைத்து அன்பு செலுத்தியது என் மனக்கண் முன் இன்றும் நிழலாடுகிறது.

இரண்டாவது நிகழ்வு 1976 ஆம் ஆண்டு நடந்தது. உலக வங்கி துங்கபத்ரா அணையின் பாக்கி உள்ள கட்டுமான பணிகளை முடிப்பதற்கு 120 மில்லியன் டாலரை இந்திய அரசிடம் கேட்டது. இதை கேள்விப் பட்ட மன்னர் காலித் அப்போதய இந்திய தூதரை அழைத்து அதற்கான ஒரு மாபெரும் தொகைக்கான காசோலையை தன்னுடைய சொந்த பணத்தில் இருந்து கொடுத்தார். இந்த தொகை சவூதி மக்கள் இந்திய மக்களுக்கு அளிக்கும் அன்பளிப்பு என்று மன்னர் காலித் அப்போது கூறினார். அவருக்கு இந்திய மக்களின் பால் உள்ள அன்பை எண்ணி அப்போது வியந்தேன்.

அந்த அணை உள்ள நிலப் பரப்புக்கு பக்கத்தில் தான் என் கிராமம் உள்ளது. அந்த அணையைப் பார்க்கும் போதெல்லாம் எனக்கு மன்னர் குடும்பத்தின் அந்த அன்பளிப்புதான் ஞாபகத்துக்கு வரும். அந்த அணையினால் எத்தனையோ ஆயிரம் பேர் தற்போது பயனடைகிறோம்.

சமீபத்தில் இறந்த மன்னர் பஹதுக்காக சொர்க்கம் கிடைப்பதற்காக இறைவனைப் பரார்த்திக்கிறேன். தற்போதய மன்னர் அப்துல்லாவின் ஆட்சியும் சிறப்புற பிரார்த்தித்து, தீராத தலைவலியாய் இருக்கும் இந்தியா காஷ்மீர் பாகிஸ்தான் பிரச்னையும் ஒரு முடிவுக்கு வர பிரார்த்தித்தவனாக இம் மடலை முடிக்கிறேன்.


வி.ஆர்.சோண்டி, இந்தியானா

வாசகர் கடிதம், அரப் நியூஸ், 1-2-2006

இது போன்ற நல்ல உள்ளங்களைப் பெற்றதால்தான் இந்தியா இன்றும் உலகில் தலை சிறந்த நாடாக மிளிர்கிறது.

-------------------------------------------

இந்த முறை உம்ராவுக்காக மெக்கா இரண்டு மாதம் முன்பு சென்றபோது ஒரு வித்தியாசத்தை உணர்ந்தேன். கஃபாவுக்கு அருகில் மன்னரின் வீடு ஒன்று இருந்தது. ஹஜ்ஜூக்கோ உம்ராவுக்கோ வந்தால் அங்குதான் மன்னர் தங்குவது வழக்கம். இந்த முறை அந்த அரண்மனை போன்ற வீடு இடிக்கப்பட்டு கஃபாவின் விரிவாக்கம் நடந்து கொண்டிருந்தது. அங்கு வேலை செய்து கொண்டிருந்த பாகிஸ்தானியிடம் இது பற்றிக் கேட்டேன். 'நாளுக்கு நாள் உலக மக்கள் ஹஜ்ஜூக்கு வருவது அதிகரித்த வண்ணம் உள்ளது. தற்போதய இடம் போதவில்லை யாதலால் அருகில் உள்ள ஹோட்டல்கள் அரண்மனைகள் அனைத்தும் இடிக்கப்பட்டு உலக முஸ்லிம்களின் வசதிக்காக கஃபா விஸ்தரிக்கப்படுகிறது. எனவே மன்னர் தனது வீட்டை சற்று தூரத்துக்கு மாற்றிக் கொண்டார். அவரின் வீட்டை இடிக்கும் பணிதான் தற்போது நாங்கள் பார்த்து வருகிறோம்' என்றார்.

நம் ஊரில் ரோட்டை அகலப்படுத்தவதற்காக ஆக்கிரமித்து புறம் போக்கு இடத்தில் கட்டப்பட்ட பல வீடுகளை கடைகளை அதிகாரிகள் இடிக்கச் சென்றால் 'நான் வட்டம். நான் மாவட்டம்' என்று திமுக கொடியையோ அதிமுக கொடியையோ ஏற்றிக் கொண்டு தர்ணா செய்யும் உடன் பிறப்புக்களை நாம் பார்த்திருப்போம். ஆனால் பணம் கொடுத்து கட்டிய வீட்டை உலக முஸ்லிம்களுக்காக இடிக்கச் சொல்லி இன்னும் சற்று தூரம் சென்று விட்ட இந்த மன்னர் குடும்பத்தையும் இங்கு நினைத்துப் பார்க்கிறேன்.

சவுதி அரேபியாவைப் பற்றிய சில புதிய செய்திகளை நண்பர் கலையரசன் தொகுத்துள்ளார். அதையும் பார்த்து விடுங்கள்.

டிஸ்கி: உடனே 'பாலாறும் தேனாறும் சவுதியில் ஓடுவதாக நான் பதிவிட்டு விட்டேன்' என்று எதிர் பதிவு போட வேண்டாம். சவுதியிலும் பல குறைகள் இருந்தாலும் நிறைகள் அதிகம் இருக்கிறது. அதாவது 'பாலாறும் தேனாறும் ஓடா விட்டாலும் குறைந்தபட்சம் கூவம் ஓடுவதில்லை' என்பதே நான் சொல்ல வருவது. :-)