இறந்தவர்களின் பெயரால் நடத்தப்படும் சில புதிய பழக்கங்கள்.

 

மார்க்கத்தில்) புதிதாக உருவாக்கப்பட்டவைகளை விட்டும் ‎உங்களை நான் எச்சரிக்கிறேன். புதிதாக உருவாக்கப்பட்டவை ‎அனைத்தும் பித்அத் (எனும் அனாச்சாரம்) ஆகும். ஒவ்வொரு ‎பித்அத்தும் வழிகேடாகும். ஒவ்வொரு வழிகேடும் நரகத்தில் ‎சேர்க்கும் என்று நபிகள் நாயகம் (ஸல்) அவர்கள் எச்சரிக்கை ‎செய்துள்ளார்கள்.‎

அறிவிப்பவர்: ஜாபிர் பின் அப்துல்லாஹ் (ரலி)‎

நூல்: நஸாயீ 1560‎

 

இன்று நமது ஊர்களில் ஒரு முஸ்லிம் இறந்தவுடன் அதன் பெயரில் பல புதிய சடங்குகள் நடத்தப்படுகின்றன. இவை எல்லாம் மார்க்கம் அனுமதித்ததுதானா என்று சீர்தூக்கி பார்க்க கடமைப்பட்டுள்ளோம்.

 

ஜஃபர் பின் அபீதாலிப் (ரலி) அவர்கள் மரணித்த செய்தியை ‎நபிகள் நாயகம் (ஸல்) அவர்கள் மக்களுக்கு அறிவித்துவிட்டு ‎‎ ஜஃபரின் குடும்பத்தினருக்காக நீங்கள் உணவு தயாரியுங்கள், ‎அவர்களைப் பாதிக்கும் செய்தி வந்துள்ளது என்று கூறினார்கள்.‎

அறிவிப்பவர்: அப்துல்லாஹ் பின் ஜஃபர் (ரலி)‎

நூல்கள்: அபூதாவூத் 2725, அஹ்மத் 1660, திர்மிதி 919, இப்னுமாஜா ‎‎1599‎

 

இதன் அடிப்படையில் இறந்தவரின் குடும்பத்தினருக்கு ‎மற்றவர்கள் தான் உணவு அளிக்க வேண்டுமே தவிர அவர்கள் ‎வீட்டில் சாப்பிடக் கூடாது என்று அறியலாம்.‎ சாப்பிட்டதோடு அல்லாமல் அங்கு புதிய முறையில் ஃபாத்திஹாக்கள் ஓதுவதும் கூடாது என்பதை அறிக.

 

இறந்தவருக்காக மூன்று நாட்களுக்கு மேல் துக்கத்தை ‎வெளிப்படுத்தக் கூடாது  என்று நபிகள் நாயகம் (ஸல்) ‎அவர்களால் நாங்கள் தடுக்கப்பட்டிருந்தோம். கணவரைத் தவிர. ‎கணவர் இறந்தால் நான்கு மாதம் பத்து நாட்கள் துக்கத்தை ‎வெளிப்படுத்தலாம்.‎

அறிவிப்பவர்: உம்மு அதிய்யா (ரலி)‎

நூல்: புகாரி 313, 5341, 5343‎

 

ஏழாம் நாள், பத்தாம் நாள், நாற்பதாம் நாள், வருஷத்து ஃபாத்திஹா ஓதி பணத்தை விரயமாக்குபவர்கள் கவனிக்க...

 

அபூ தல்ஹாவின் மகன் உமைர் மரணித்த போது அபூ தல்ஹா ‎‎(ரலி), நபிகள் நாயகம் (ஸல்) அவர்களை அழைத்தார்கள். ‎அவ்வீட்டாரிடம் நபிகள் நாயகம் (ஸல்) வந்தார்கள். அவர்கள் ‎வீட்டிலேயே அவருக்குத் தொழுகை நடத்தினார்கள். நபிகள் ‎நாயகம் (ஸல்) அவர்கள் முன்னே நின்றார்கள். அவர்களின் ‎பின்னால் அபூ தல்ஹா (ரலி) நின்றார்கள். (அவரது மனைவி) ‎உம்மு ஸுலைம் அபூ தல்ஹாவின் பின்னே நின்றார். ‎அவர்களுடன் வேறு யாரும் இருக்கவில்லை.‎

அறிவிப்பவர்: அபூ தல்ஹாவின் மகன் அப்துல்லாஹ்

நூல்: ஹாகிம்

 

ஒருவர் இறந்து விட்டால் அவரது உடலைப் பள்ளிவாசலுக்கோ, ‎அல்லது ஜனாஸா தொழுகைக்காக நிர்ணயிக்கப்பட்ட ‎இடத்துக்கோ கொண்டு சென்று தான் தொழுகை நடத்த ‎வேண்டும் என்பது கட்டாயம் இல்லை.‎

 

எந்த மனிதரின் குடும்பத்தினர் விஷயத்திலும், அவரது ‎அதிகாரத்திலும் அவருக்கு நீ இமாமாக - தலைவனாக ஆகாதே! ‎‎ என்று நபிகள் நாயகம் (ஸல்) அவர்கள் கூறினார்கள்.‎

அறிவிப்பவர்: அபூ மஸ்வூத் (ரலி)‎

நூல்: முஸ்லிம்

 

நபிகள் நாயகத்தின் இந்தப் பொதுவான அறிவுரையில் திருமணம் ‎நடத்தி வைத்தல், ஜனாஸா தொழுகை நடத்துதல் உள்ளிட்ட ‎அனைத்துமே அடங்கும் என்பதால் இறந்தவரின் குடும்பத்தினரே ‎ஜனாஸா தொழுவிக்க உரிமை படைத்தவர்கள் என்பதை ‎அறியலாம்.‎ இதற்கும் பள்ளிவாசல் இமாமைக் கொண்டுதான் தொழ வைப்போம் என்று அடம் பிடிப்பவர்கள் நபிகள் நாயகத்தின் அறிவுரைகளை புறம் தள்ளுகிறார்கள். வாரிசுகள் அனுமதி கொடுத்தால் யார் வேண்டுமானாலும் தொழ வைக்கலாம். இதனை  மார்க்கம் அறிந்த இமாம்கள்தான் நிர்வாகிகளுக்கு சொல்லி புரிய வைக்க வேண்டும்.