நடிகர் சூர்யாவின் கடப்பா(ஆந்திரா) தர்ஹா வழிபாடு!

பள்ளிவாசல்கள் அல்லாஹ்வுக்கே உரியன. எனவே அல்லாஹ்வுடன் வேறு எவரையும் அழைக்காதீர்கள்!

குர்ஆன் 72:18


ஹஜ்ரத் அலி அவர்கள் அபுல் ஹய்யாஜ் அல் அஸதியை நோக்கி ‘அறிந்து கொள்! நபிகள் நாயகம் என்னை எதற்காக அனுப்பினார்களோ அதற்காக நானும் உன்னை அனுப்புகின்றேன். எந்த ஒரு சிலுவையையும் தரைமட்டமாக்காமல் விட்டுவிடாதே, மற்றும் பூமியின் மட்டத்தை விட்டும் உயர்ந்திருக்கின்ற எந்த ஒரு கப்ரையும் சமப்படுத்தாமல் விட்டு விடாதே எனப்பணித்து அனுப்பினார்கள்.

(ஸஹீஹ் முஸ்லிம்:1662)

“அல்லாஹ்வின் தூதர் அவர்கள் கப்ருகளை பூசுவதையும் அதன் மீது உட்காருவதையும் அதன் மீது கட்டடம் கட்டப்படுவதையும் தடை செய்தார்கள்.”
(அறிவிப்பவர்: ஜாபிர் (ரலி), நூல்: முஸ்லிம்-1610)


‘இறைவா! எனது அடக்கத் தலத்தை வணக்கத்தலமாக ஆக்கி விடாதே என்று அல்லாஹ்வின் தூதர் அவர்கள் பிரார்த்தனை செய்தார்கள்.’
(அறிவிப்பவர்: அபூஸயீத் (ரலி), நூல்: முஸ்னத் அல் ஹுமைதி)

தர்ஹாக்கள் கட்டப்பட்டு வழிபாடு நடத்தப்படுவதற்கு இஸ்லாம் கடுமையாக தடை விதிக்கிறது. கிறித்தவ பைபிளிலும் இதற்கு ஆதாரம் உண்டு.

அவர்களுடைய விக்கிரகங்கள் வெள்ளியும் பொன்னும், மனுஷருடைய கைவேலையுமாயிருக்கிறது. அவைகளுக்குக் காதுகளிருந்தும் கேளாது; அவைகளுக்கு மூக்கிருந்தும் முகராது. அவைகளுக்குக் கைகளிருந்தும் தொடாது; அவைகளுக்குக் கால்களிருந்தும் நடவாது; தங்கள் தொண்டையால் சத்தமிடவும் மாட்டாது. அவைகளைப் பண்ணுகிறவர்களும், அவைகளை நம்புகிறவர்கள் யாவரும், அவைகளைப்போலவே இருக்கிறார்கள்.சங்கீதம் 115:3-8 (Psalms 115:3-8)


ஆனால் இந்த இஸ்லாமிய சட்ட திட்டங்களை குழி தோண்டி புதைத்து நடிகர் சூர்யாவும் தர்ஹாவில் முதல் மரியாதை கொடுக்கப்படுவதை பார்க்கிறோம. பணம் லட்சக் கணக்கில் நன்கொடையாக கொடுத்ததால் இந்த அளவு கவனிக்கப்படுகிறார்.

சூர்யா ஒரு மாற்று மதத்தவர். இஸ்லாத்தை பற்றி அவ்வளவாக தெரியாது. ஆனால் சூர்யாவை வழி நடத்தி செல்லும் அந்த மௌலவிகள் கூட்டத்திற்கு இது இஸ்லாத்துக்கு விரோதமானது என்று தெரியாதா? உழைக்காமல் உண்டு கொழுத்து உடம்பை வளர்த்து வைத்திருக்கும் அந்த மௌலவிகள், சாகிபு மார்களுக்கு இறைவனின் அச்சம் கொஞ்சம் கூட இல்லையா? மரணத்துக்கு பிறகு நாளை இறைவன் 'சூர்யா விளங்காமல் தர்ஹாவுக்கு வந்தால் அவர் கையில் குர்ஆனை கொடுத்து இஸ்லாத்தை போதிக்க வேண்டிய நீ இவ்வாறு பணத்தை வாங்கிக் கொண்டு முதல் மரியாதை கொடுக்கலாமா' என்று கேட்டால் என்ன பதிலை வைத்திருக்கிறார்கள் இந்த மௌலவிகள்?

கேவலம் இந்த உலகில் நாலு காசு சம்பாதிக்க உலகில் எத்தனையோ நல்ல வழிகள் இருக்க இவ்வாறு தர்ஹாக்களை கட்டி அதன் மூலம் வயிறு வளர்ப்பதற்கு இவர்கள் வெட்கப்பட வேண்டாமா? அந்த ஊரில் உள்ள விபரம் மறிந்த முஸ்லிம்களாவது இந்த சாயுபுமார்களுக்கு இஸ்லாத்தை விளங்க வைக்கக் கூடாதா? இறைவனின் கோபப் பார்வைக்கு பயந்து கொள்ளுங்கள் சாயுபுமார்களே! மௌலவிமார்களே!

ஒரு தமிழ் பெண்ணுக்கு அவசர உதவி வேண்டி.....

அன்புடையீர்,

இந்தியத்தூதரகம் ஏற்றெடுத்துள்ள ஒரு தமிழ்ப் பெண்மணியின் கேஸ் ஒன்று உதவிக்காக தூதரக தன்னார்வலர்களால் பரிந்துரைக்கப்பட்டுள்ளது.

சேலத்தைச் சேர்ந்த சித்தாரா பேகம் என்ற பெண்மணி B.A. அரபிக் முடித்துவிட்டு சவூதியில் ஒரு வீட்டில் குழந்தைகளுக்கு அரபிபாடம் சொல்லிக்கொடுக்க வேண்டும் என்ற விசாவில் வந்துள்ளார், அவரை உண்மையில் ஏமாற்றி அழைத்துவந்து ஹவுஸ்மேடாக வேலை செய்யவைத்து பலவிதமான தொல்லைகளுக்குண்டாக்கி சம்பளமும் கொடுக்காமல் இருந்துள்ளார்கள்.

இவருக்கு இரண்டு பிள்ளைகள், அவரின் கணவர் ஒரு பள்ளியில் இமாம் வேலை பார்க்கிறார். கடந்த மாதம் 4 1/2 வயது நிரம்பிய அவர் மகனை பள்ளியில் சேர்த்துவிடுவதற்காக சாலையைக் கடந்த பொழுது சிறுவன் உடல் லாரிக்குள் சிக்கி சம்பவ இடத்திலேயே இறந்துவிட்டான், காப்பாற்றச் சென்ற தந்தையின் கால்களில் சக்கரம் ஏறி ஒரு காலை எடுக்க வேண்டிய சூழ்நிலை வந்து மருத்துவமணையில் இருக்கிறார்.

இந்த தொடர் அதிர்ச்சி சம்பவங்கள் சித்தாரா பேகத்திற்கு இருந்த இருதய நோயை தீவரப்படுத்தி சுகவீனமாகிவிட்டார். சமுதாய ஆர்வலர் சகோ. ஷிஹாப் கொட்டுக்காட் அவர்கள் விபரம் அறிந்து தூதரக தலையீட்டால் இப்பொழுது அவரை ரியாத் முபாரக் ஹாஸ்பிடலில் சேர்க்கப்பட்டு முதலுதவி கொடுத்து இன்னும் சிலதினங்களில் தாயகம் அனுப்பி வைக்க உள்ளார்கள்.இப்பொழுது தூதரகத்தின் கட்டுப்பாட்டில் உள்ள ஒரு இடத்தில் தங்க வைக்கப்பட்டுள்ளார்.

இந்தியாவில் அவரின் மருத்துவ செலவிற்கும், கணவரின் மருத்துவ செலவிற்கும் எதாவது உதவியை எதிர்பார்க்கிறார்கள். உங்கள் உதவிகளை நேரடியாகவோ அல்லது எங்கள் மாறலாகவோ செய்யலாம்.

பெரும்பாலானோர் செய்த உதவியின் காரணமாக Rs. 80,000க்கு சமீபமாக பொருளுதவி இதுவரை கிடைத்துள்ளது. தூதரகத்தில் இருந்து Deportation Center க்கு கடந்த மூன்று நாட்களுக்கு முன்னர் அனுப்பி விட்டார்கள், அங்கு கைரேகை ஏற்பாடுகள் முடிந்து இன்னும் ஒரு சிலதினங்களில் தாயகம் செல்லும் ஏற்பாட்டில் உள்ளார்.

ஒரு சிறிய பெட்டியும் அதில் அவரின் மகளுக்கு ஒரு துணியும், அவருக்கு ஒரு துணியும் கொஞ்சம் அத்தியாவசிய பொருட்களும் வாங்கி மும்பையில் இருந்து சென்னை செல்வதற்கான செலவிற்குண்டான பணத்தையும் நாளை ஒப்படைக்க உள்ளோம். மீதியுள்ள பணத்தை அவர் தகப்பனாருக்கு நேரடியாக அனுப்பிவைக்க அவரிடம் தொடர்பு கொண்டு வங்கி எண்ணைப் பெற்றுள்ளேன்.

யாராவது நேரடியாக உதவிசெய்ய விரும்பினால் கீழேயுள்ள வங்கி கணக்குக்கு அனுப்பலாம்.

NAME : ABDUL SUKKUR
A/C : 877103848
BANK : INDIAN BANK
BANK ADDRESS : GANGAVALLI, ATTUR MAIN ROAD, SELAM

ADDRESS : ABDUL SUKKU, S/O KADARBASHA, 4/15F ATTUR MAIN ROAD, GANGAVALLI, SELAM.

Best Regards,Ahmed Imthias
imthias@imthias.com
+966540753261

பாகிஸ்தானை சரியாக புரிந்து கொண்ட மனிதர்!- பாகம் இரண்டு

மௌலானா அபுல் கலாம் ஆசாத்தின் பேட்டி தொடர்கிறது......

கேள்வி:

முஸ்லிம்கள் தங்களின் அடையாளங்களை எவ்வாறு பாதுகாத்துக் கொள்வது, ஒரு முஸ்லிம் மாகாணத்தின் பிரஜையாக நாம் எவ்வாறு நடந்து கொள்வது என்ற கேள்வியும் எழுகிறதே?

பதில்:

இது போன்ற அர்த்தமற்ற கேள்விகள் கற்பனையான பேச்சுக்களின் மூலம் உண்மையான நடைமுறைகளை நாம் மறைத்து விட முடியாது. இந்த விஷயத்தில் பல கருத்துக்களை திரித்து நம் மக்கள் முன் சிலர் வைக்கின்றனர். சமூக அடையாளங்கள் என்று எதனைக் கூறுகிறீர்கள்? பிரிட்டிஷ் ஆட்சியில் நாடே அடிமைப் பட்டுக் கிடந்தபோது சுதந்திர போராட்டத்துக்கு முஸ்லிம்களை தயார் படுத்தியது எந்த சமூக அடையாளங்கள்? இஸ்லாமிய மாகாணங்களில் எதனை நீங்கள் புகட்டப் போகிறீர்கள்? நமது நாட்டின் சுதந்திர தாகத்தையும் நம்பிக்கையையும் முஸ்லிம்களுக்கு உண்டாக்கியது எது? 90 மில்லியன் முஸ்லிம்களின் உணர்வுகளை எதற்கும் உபயோகமற்ற ஒரு இஸ்லாமிய மாகாணம் தந்து விடும் என்று எதிர் பார்க்கிறீர்களா? நமது நாட்டை ஆண்ட பிரிட்டிஷ் ஆட்சியில் எவருடைய மத உணர்வுகளுக்கும் தடை போடப்பட்டதா? ஹிந்துக்கள் தங்களின் மதக் கடமைகளை நிறைவேற்ற இதுவரை சிக்கல் எதனையும் சந்தித்திருக்கிறார்களா? இதுவரை அவ்வாறு எதுவும் நடைபெறவில்லையே!

இது போன்ற அர்த்தமற்ற கேள்விகளை எழுப்பி மக்களை குழப்புவது மேற்கத்திய கலாசாரத்தில் மூழ்கி திளைத்துக் கொண்டிருக்கும் ஒரு சில முஸ்லிம்களே ஆவர். இவை எல்லாம் அரசியல் சார்ந்த பேச்சுக்கள். சமூக நலன் சார்ந்த பேச்சுக்கள் அல்ல.

இஸ்லாமிய வரலாறு என்பது இந்திய வரலாற்றின் மிக முக்கிய பங்களிப்பைக் கொண்டுள்ளது. இத்தனை காலம் ஆண்ட இஸ்லாமிய மன்னர்கள் இஸ்லாத்துக்காக இந்த மன்னில் குறிப்பிடுமபடியாக எதையும் செய்யவில்லை. பெயரளவு முஸ்லிம்களாகத்தான் வாழ்ந்து மறைந்தார்கள். இஸலாத்தை பரப்புவது அவர்களின் கொள்கையாகவும் இருக்கவில்லை. இஸ்லாமிய சமூகம் சில மார்க்க அறிஞர்களுக்கு நன்றி கூற கடமைப்பட்டுள்ளது. இதே முஸ்லிம் ஆட்சியாளர்களால் பல மார்க்க அறிஞர்கள் கொடுமைப்படுத்தப் பட்டுள்ளார்கள். அதிகமான மன்னர்கள் தங்களுக்கு துதி பாடும் பல கள்ள மௌலவிகளையும் உருவாக்கி வைத்திருந்தனர். இவர்களின் பணியே உண்மையான இஸ்லாத்துக்கு எதிராக செயல்படுவதுதான். இஸ்லாத்தின் பழைய வரலாறுகளைப் பார்க்கும் போது முதல் நூற்றாண்டில் லட்சக்கணக்கான மக்களின் இதயத்தை வென்றெடுத்தது. ஆனால் இந்தியாவுக்குள் இஸ்லாம் பரவியதே வேறொரு அடிப்படையில். இஸ்லாத்தை இந்தியாவுக்கு அறிமுகப்படுத்தியவர்கள் அரபுகள் அல்ல. தென் நாடுகளில் ஒரு சில இடங்களில் வியாபார நிமித்தமாக அரபுகள் வந்து இஸ்லாத்தை பரப்பியும் இருக்கிறார்கள். ஆனால் அதிகமான பேர் அரபுகளிடமிருந்து நேரிடையாக இஸ்லாத்தை பெறவில்லையாதலால் அதன் உண்மை முகத்தை பலரும் அறியாமலேயே இன்றும் உள்ளனர். இன்றும் கூட இந்திய முஸ்லிம்களின் வரலாறு என்று பார்த்தோமானால், மியூசிக், ஆர்ட், கட்டிடங்கள், சமாதிகள், போன்ற பின்னணியிலேயே செல்வதைப் பார்க்கலாம். இஸ்லாம் இந்திய முஸ்லிம்களிடம் என்ன எதிர்பார்க்கிறதோ அந்த எதிர்பார்ப்பை விளங்காதவர்களாகவே அநேக முஸ்லிம்கள் இன்றும் உள்ளனர்.

சுதந்திர இந்தியாவில் முஸ்லிம்கள் இரண்டாந்தர குடி மக்களாக நடத்தப்படுவர் என்ற எண்ணம் இன்னும் முஸ்லிம்களுக்கு இருக்குமானால் அவர்களுக்காக நான் இறைவனிடம் பிரார்த்திக்கிறேன். மனிதன் தனது வாழ்வை உறுதியோடு எதிர் கொள்ள பழகிக் கொள்ள வேண்டும். ஆனால் சிலர் தங்களின் மனோ திடததை ஏனோ இழந்து நிற்கின்றனர். இந்திய முஸ்லிம்களில் பலர் தங்களின் எதிர்காலத்தைப் பற்றி அச்சம் கொண்டிருப்பதை உணர்கின்றேன். முதலில் அசைக்க முடியாத இறை நம்பிக்கை இவர்களுக்கு முதலில் வர வேண்டும். மனிதர்களை கண்டு நாம் ஏன் பயப்பட வேண்டும்? இது போன்ற கற்பனையான கோழைத்தனமான சிந்தனைகளிலிருந்து முதலில் நாம் மீண்டு வர வேண்டும்.

பிரிட்டிஷ் இந்தியாவில் முஸ்லிம்களுக்கு சகல சௌகரியங்களும் செய்து கொடுக்கப்பட்டது. ஆனால் பிரிட்டிஷாரின் பல உதவிகளை ஏனோ முஸ்லிம்கள் ஏற்கவில்லை. வெள்ளையர்களின் ஆட்சியில்தான் முன்பை விட இஸ்லாம் வேகமாக வளர்ந்தது. இஸ்லாத்தின் சிறந்த கலாசாரம் மதிப்பானது அதனை பின் பற்றும் இஸ்லாமியர்களின் கைகளில்தான் உள்ளது. இந்தியாவானது முஸ்லிம் நாடுகளின் எல்லைகளை தனது மூன்று புறமும் கொண்டுள்ளது. எல்லகைள் இவ்வாறு பரந்து கிடக்க முஸ்லிம்களை ஒழித்து விட வேண்டும் என்று ஹிந்துக்கள் எப்படி நினைப்பர். அது நடக்கின்ற காரியமா? இது எவ்வாறு நிகழ சாத்தியம் உள்ளது? 90 மில்லியன் முஸ்லிம்களை அழித்தல் என்பது அவ்வளவு லேசான காரியமா? கண்டிப்பாக சுதந்திர இந்தியாவில் இஸ்லாத்தை தங்கள் வாழ்வியலாக ஏற்றுக் கொள்ளும் மக்கள் அதிகமதிகம் உருவாவார்கள் எனபது எனது எண்ணம்.

இந்த உலகம் அமைதிக்காகவும் அழகிய வாழ்வு முறைக்காகவும் ஏங்கிக் கொண்டிருக்கிறது. ஹிந்துக்கள் கம்யூனிசத்தைப் படிக்கின்றனர். மேற்குலக நாகரிகத்தையும் படிக்கின்றனர். அதே போல் இஸ்லாத்தின் மேல் உள்ள வெறுப்பை தூரமாக வைத்துவிட்டு அதனை அன்போடு நோக்கினால் பல நன்மைகளையும் பல சட்டதிட்டங்களையும் இங்கிருந்து பெற்றுக் கொள்ள முடியும். இந்த புரிதலானது இஸ்லாத்தின் மேலும் முஸ்லிம்களின் மேலும் உள்ள வெறுப்பு பல மடங்கு குறைய வாய்ப்புள்ளது. இஸ்லாம் ஒரு குறுகிய வட்டத்தைப் போட்டு அதற்குள் முஸ்லிம்களை அடக்கி ஆளவில்லை. அது உலக மக்களுக்கு பல அழைப்புகளை விடுக்கிறது. அதிகமான வசனங்கள் 'ஓ..மனிதர்களே!' என்று தான் ஆரம்பிக்கிறது. சில வசனங்கள்தான் முஸ்லிம்களை நோக்கி பேசுகிறது. மனிதர்களுக்குள் உள்ள ஏற்றத் தாழ்வுகளைப் போக்க பல திட்டங்களைக் கொண்டுள்ளது. இஸ்லாம் இறைவனைத்தான் வணங்க சொல்கிறதேயன்றி முகமது நபியை வணங்கச் சொல்லவில்லை என்பதும் ஹிந்துக்களுக்கு நன்றாக தெரியும். ஏக இறைவனை வணங்கச் சொல்வது என்பது இந்து மக்களுக்கு புதிய கொள்கையும் அல்ல. ஓரிறைக் கோட்பாடு, ஏழைகளுக்கு உதவுதல், நீதி தவறாத ஆட்சி, பகுத்தறியும் சிறந்த அறிவு போன்ற பல அடிப்படைக் கொள்கைகளைக் கொண்டு கட்டப்பட்டது இஸ்லாம். ஒரு சில முஸ்லிம்களின் தீவிரவாதப் போக்கினால் இந்து மக்கள் இஸ்லாத்தை வெறுக்கும் சூழலை உண்டாக்கி விடும். நம்முடைய சுய லாபத்துக்காக இஸ்லாத்தின் கொள்கைகளை சிதைக்க அனுமதிக்கக் கூடாது. பாகிஸ்தான் பிரிவினை என்பதானது எந்த விதத்திலும் இஸ்லாத்தோடு தொடர்புபடுத்த முடியாத ஒன்று. ஒரு அரசியல் ஏற்பாட்டின்படி முஸ்லிம் லீக் என்ற கட்சியால் இஸ்லாத்தின் பெயரைச் சொல்லி நடத்தப்படுகின்ற ஒரு நிகழ்வு. இதற்கும் இஸ்லாமிய சட்டதிட்டங்களுக்கும் எந்த சம்பந்தமும் இல்லை. முஸ்லிம்களின் பிரச்னைகளை தீர்க்க பாகிஸ்தான் ஒரு சிறந்த தீர்வாக ஆக முடியாது என்பது எனது எண்ணம். இந்த பிரிவினையானது இந்து முஸ்லிம் சிக்கல்களை மேலும் அதிகமாக்கவே செய்யும்.

நபிகள் நாயகம் 'இந்த உலகம் முழுவதுமே எனக்கு தொழும் இடமாக ஆக்கப்பட்டுள்ளது' என்று சொன்னார்கள். தற்போது அந்த தொழும் இடங்களை பிரித்துக் கொடுக்கும்படி என்னிடம் யாரும் கேட்க வேண்டாம். ஒன்பது கோடி முஸ்லிம்கள் இந்தியாவெங்கும் பரந்து வாழ்ந்து வருகிறார்கள். ஒரு சில மாநிலங்களில் முஸ்லிம்கள் அதிகமாக உள்ளதால் பிரித்துக் கொடுங்கள் என்று கேட்கப்படுகிறது. மீண்டும் இஸ்லாமிய பார்வையில் இவர்கள் பிரிவினையைக் கோரவில்லை என்பதைக் கவனியுங்கள். 'சில மாகாணங்களில் அதிகமாக இருக்கிறோம். அந்த பகுதிகளை பிரித்து தனி நாடாக ஆக்குங்கள்' என்பதே அவர்களின் கோரிக்கை. பல மாநிலங்களில் மிக சிறுபான்மையினராக உள்ள முஸ்லிம்களைப் பற்றிய கவலை அவர்களுக்கு கொஞ்சம் கூட இல்லை. எல்லையோரங்களில் பக்கத்து நாடுகளோடு தொடர்புகளோடும் பல முஸ்லிம் குடும்பங்கள் வாழ்ந்து வருகின்றன. இந்த மக்களின் பிரச்னையை எவ்வாறு தீர்ப்பது என்பதை எனக்குச் சொல்லுங்கள். முஸ்லிம் லீக்கின் கருத்துப்படி இங்குள்ள 30 மில்லியன் முஸ்லிம் குடும்பங்களை நிர்க்கதியாக தவிக்க விட்டு விட்டு தனி நாடு கேட்டு போகப் போகிறீர்களா? இந்து முஸ்லிம் பிரச்னையானது காங்கிரஸூக்குள்ளும் முஸ்லிம் லீக்குக்குள்ளும் பெரும் சிக்கல்களை ஏற்படுத்தி இன்று தனி நாடு கேட்கும் நிலைக்கு வந்துள்ளது. இந்த பிரிவினை நிறைவேறினால் உலக வல்லரசுகளின் பார்வை இந்த பிராந்தியத்தில் விழுந்து காலாகாலத்துக்கும் இரு நாடுகளுக்குமிடையே தீராத தலைவலியை ஏற்படுத்திக் கொண்டிருக்கும்.

முஸ்லிம்கள் தங்களின் எதிர்கால பாதுகாப்புக்கு வேண்டிய அனைத்தையும் செய்து கொள்ள அவர்களுக்கு பூரண உரிமை உள்ளது. ஆனால் நாட்டைப் பிரித்துத்தான் அந்த பாதுகாப்பு கிடைக்ககும் என்ற பிரசாரத்தையே நாம் விமரிசிக்கிறோம். இதில் தவறாக முஸ்லிம்கள் வழி நடத்தப் படுகிறார்கள். இந்த தேச பிரிவினையானது காலத்துக்கும் இந்து முஸ்லிம் பிரிவினையை அதிகப் படுத்திக் கொண்டேயிருக்கும். பிரச்னைகள் தீருவதற்கு தேசப் பிரிவினை ஒரு மார்க்கம் அல்ல என்பதை அனைவரும் உணர வேண்டும்.

இந்தியா பிற்காலங்களில் சாதிப் பிரச்னைகளினால் மிகப் பெரும் சவால்களை சந்திக்கும். அரசியல் பகிர்வு என்பது இரண்டாம் பட்சமாகி ஆதிக்க சாதிகளின் தலையீடுகள் அதிகமாகவே இருக்கும். கம்யூனிஸ்டுகளோ, சோஷலிஸ்டுகளோ இந்த தலையீடுகளை தடுக்க இயலாது. கீழ் மட்டங்களில் உள்ள ஒடுக்கப்பட்ட மக்களின் முன்னேற்றத்திற்காகப் போராடும் இயக்கங்களாகவே அவை இருந்து வரும். ஆனால் பெரும் மாற்றங்களைக் கொண்டு வர முடியாது.

தற்போது முஸ்லிம் செல்வந்தர்களும், பிரச்னை எழுப்பும் சில குழுக்களும் ஒரு வித அச்சத்திற்கு உள்ளாக்கப்பட்டுள்ளனர். தற்போது இவை அனைத்தும் மதம் எனும் ஒற்றை வார்த்தைக்குள் கொண்டு சாமர்த்தியமாக திசை திருப்பப்படுகிறது. பொருளாதார ஏற்ற தாழ்வுகளை மதப் பிரச்னையாக்கி விட்டனர். இதற்கு முஸ்லிம்கள் மட்டுமே காரணமல்ல. இதற்கு பலரும் பொருப்பேற்க வேண்டும். முதலில் வெள்ளையர்களால் ஆரம்பித்து வைக்கப்பட்ட இந்த பிரிவினைவாதம் பின்னர் அலிகரால் தொடரப்பட்டது. அதன் பிறகு குறுகிய மனம் கொண்ட ஒரு சில இந்துக்களால் இந்த கருத்து ஆழமாக பலர் மனதிலும் வேரூன்றி விட்டது. இதனால் இந்திய சுதந்திரம் என்பது இரு நாட்டு பிரிவினையில் கொண்டு போய் நம்மை நிறுத்தியுள்ளது.

ஜின்னா ஹிந்து முஸ்லிம் ஒற்றுமைக்கான தூதுவராகவே முன்பு இருந்துள்ளார். சரோஜினி நாயுடுவும் இவரின் செயல்களை பலமுறை பாராட்டியுள்ளார். ஜின்னா தாதாபாய் நவ்ரோஜியின் மாணவனும் ஆவார். 1906 ஆம் ஆண்டு வாக்கில் இந்தியாவில் முஸ்லிம்களுக்கென ஒரு தனி அமைப்பு தொடங்கப்படுவதையும் எதிர்த்தார். 1919 வரையிலும் நாட்டின் பிரிவினைக்கு எதிராகவே இருந்தார்.

1928 ஆம் ஆண்டு கொண்டு வரப்பட்ட சைமன் கமிஷனை காங்கிரஸோடு சேர்ந்து எதிர்க்கவும் செய்தார். 1937 வரை பாகிஸ்தான் பிரிவினைக்கு எந்த ஆதரவும் தராதவராகவே இருந்து வந்தார். மாணவர்கள் மத்தியில் கூட இந்து முஸ்லிம் ஒற்றுமை நமது நாட்டுக்கு எந்த அளவு அவசியம் என்பதைப் பற்றி பல முறை கலந்துரையாடியுள்ளார். ஆனால் காங்கிரஸ் ஏழு மாநிலங்களில் அரசு அமைத்து அதில் முஸ்லிம் லீக்கை முற்றாக புறக்கணித்தது. இதன் பிறகு தான் 1940 ல் வேறு வழியின்றி பாகிஸ்தான் பிரிவினைக்கு ஆதரவளிக்க முன் வந்தார்.

டைம்ஸ் ஆஃப் இந்தியாவில் 1925 ஆம் ஆண்டு அக்டோபர் 3ல் 'காங்கிரஸ் இந்துக்களின் கூடாரமாகி விட்டது' என்ற தகவலை முதன் முதலில் பதித்தார். 1925 ஆம் ஆண்டில் கூட தான் ஒரு நேஷனலிஸ்ட் என்பதை பகிரங்கமாக பிரகடனப்படுத்தினார். சுருக்கமாக சொன்னால் ஜின்னாவின் பாகிஸ்தான் பிரிவினை என்பதானது அவரது அரசியல் நிகழ்வுகளின் பின்னணியில் நடந்தது. என்னைப் பற்றி எதையும் சொல்ல ஜின்னாவுக்கு முழு உரிமை உண்டு. இதுவரை அவரது அறிவுத் திறனில் எந்த குறையும் நான் கண்டதில்லை. ஒரு அரசியல்வாதியாக பாகிஸ்தான் பிரிவினைக்காக மிக அதிக அளவில் உழைத்துள்ளார். தற்போது இந்த பிரிவினை சமாசாரமானது ஜின்னாவின் கௌரவப் பிரச்னையாக மாறி விட்டது. எதை இழந்தாவது பாகிஸ்தானை அடைந்தே தீருவது என்ற முடிவுக்கு தற்போது தள்ளப்பட்டுள்ளார்.

கேள்வி: முஸ்லிம்கள் பாகிஸ்தான் பிரிவினை வாதத்தை கைவிட மாட்டார்கள் என்று தெளிவாக தெரிகிறது. பிறகு எதற்கு பிரிவினைக்கு எதிராக தேவையற்ற இத்தனை வாக்கு வாதங்கள்?

பதில்: இது மிகவும் கடினமான கேள்வி. கலகக்கார கூட்டம் ஒன்றின் மிகைப்படுத்தப்பட்ட ஆர்வத்தை அடக்குவதென்பது தற்போது இயலாத காரியம். ஒருவரின் உணர்வுகளை அடக்குவதென்பது அவரை கொன்று விடுவதை விட மோசமானது. இன்று முஸ்லிம்கள் நடந்து செல்லவில்லை. ஓடுகிறார்கள். வலுவான ஸ்திரமான நடையை அவர்கள் பயிலவில்லை. கடல் அலைகளைப் போல அவர்கள் தத்தளித்துக் கொண்டிருக்கிறார்கள். ஒரு பெரும் கூட்டமானது தனது நம்பிக்கையையும் சுய மரியாதையையும் இழந்து விட்டால் அவர்களை சுற்றி வீணாண கற்பனைகளும் தங்களைப் பற்றிய எதிர்கால பயமும் சூழ்ந்து கொள்ளும். இதனால் சரி எது? தவறு எது? என்று தீர்மானிக்கும் திறனை இழந்து விடுவர். அதுதான் தற்போது நடந்து வருகிறது.

ஒரு கூட்டத்தின் உண்மையான வெற்றி என்பது அதன் எண்ணிக்கையை பொருத்து அமைவது அல்ல. அந்த மக்கள் தங்களின் நம்பிக்கை, நேர்மை, நாணயம் போன்றவற்றைக் கொண்டு சீரிய வாழ்வை அமைத்துக் கொள்வதே அவர்களின் உண்மையான வெற்றிக்கு அடிகோலியதாகும்.

பிரிட்டிஷாரின் அரசியல் சூழ்ச்சிகளானது பல்வேறு விதமான பயத்தையும் அவ நம்பிக்கையையும் முஸ்லிம்கள் மத்தியில் ஆழமாக வேரூன்ற செய்து விட்டது. வெள்ளையர்கள் இந்த நாட்டை விட்டுப் போவதற்குள் எப்படியாவது பிரித்து விட வேண்டும் என்ற மோசமான எண்ணத்துக்கு பலர் வந்து விட்டனர். இந்த பிரிவினையானது தங்களின் பயத்தையும், தங்கள் மத்தையும், பொருளாதாரத்தையும் காத்து விடும் என்று நம்புகின்றனர். இது தேவையற்ற பயம் என்பதை பின்னர் உணருவார்கள்.

கேள்வி: ஆனால் இந்துக்களும், முஸலிம்களும் வழிபாடு, கலாசாரம், மொழி என்று முற்றிலும் வேறுபட்டிருக்க இந்த இரு குழுக்களும் ஒற்றுமையாக இருந்து விட முடியும் என்று நீங்கள் நம்புகிறீர்களா?

பதில்: இது முன்பே விவாதித்த ஒரு கேள்வி. இது சம்பந்தமாக அல்லாமா இக்பாலும், மவுலானா ஹுசைன் அகமது மதனியும் ஏற்கெனவே நிறைய பேசியிருக்கிறார்கள். குர்ஆனில் 'கௌம்' என்ற வார்த்தை பல இடங்களில் பயன்படுத்தப்பட்டுள்ளது. இந்த வார்த்தை முஸ்லிம்களை மாத்திரம் குறிப்பதாகாது. உலக மக்கள் அனைவரையும் குறிக்கும் பொதுச் சொல்லாகத்தான் இறைவன் குர்ஆனில் பயன்படுத்துகிறான். மில்லத்(COMMUNITY), கௌம்(NATION), உம்மத்(GROUP) என்ற குர்ஆன் பயன்படுத்தும் வார்த்தைகளை ஆழ்ந்து சிந்தித்தால் நமக்குள் உள்ள பல வேறுபாடுகளை களைய முடியும்.

இந்தியா பல மதங்களை தன்னகத்தே கொண்ட சிறந்த வீடாக உள்ளது. இந்துக்கள், முஸ்லிம்கள், கிறித்தவர்கள், பவுத்தர்கள், பாரஸிகள், சீக்கியர்கள், ஜைனர்கள் என்று அனைத்து மதத்தவரும் இம்மண்ணை நேசிக்கின்றனர். இந்து மதத்துக்கும் இஸ்லாமிய மதத்துக்கும் அடிப்படையில் பல வேறுபாடுகள் உள்ளதை நான் மறுக்கவில்லை. வேற்றுமையில் ஒற்றுமை காண்பது என்பது இயலாத காரியம் ஒன்றும் அல்ல. இந்த வேற்றுமையானது நமது நாட்டை பிளந்து விடாமல் இருக்க நம்மால் ஆன முயற்சிகளை நாம் எடுக்க வேண்டும். சுதந்திர தேசம் என்பது ஒரு மனிதனுக்கு மிக அத்தியாவசியமான ஒன்று. அந்த அருமையான சுதந்திரத்தை மதத்தின் பெயரால் பிளவு படுத்திவிட வேண்டாம் என்பதே எனது வாதம்.

முஸ்லிம்கள் ஒன்றை புரிந்து கொள்ள வேண்டும். அவர்கள் இந்த உலகுக்கு மிகச் சிறந்த செய்தியை கொண்டு செல்லும் மகத்தான பணியை இறைவன் தந்திருக்கிறான். குறுகிய மனப்பான்மையில் தங்களுக்குள் இந்த அரிய பொக்கிஷத்தை வைத்துக் கொள்ள அவர்கள் அனுப்பப்படவில்லை. மேலும் இந்திய முஸ்லிம்கள் பல பிரிவுகளாக மொழியாலும், பொருளாதாரத்தாலும், பார்க்கும் வேலைகளாலும் பலவாறாக பிரிந்து கிடக்கின்றார்கள். இவர்களை ஒற்றுமைப் படுத்த இந்துக்களைக் காட்டி பயமுறுத்தல் தற்போது நடத்தப்படுகிறது. இது நிரந்த தீர்வைத் தராது. ஒற்றுமை என்பது குர்ஆனைக் கொண்டு முன் எடுக்கப்பட வேண்டும். அதுதான் முஸ்லிம்களை நிரந்தர ஒற்றுமைக்கு கொண்டு செல்லும்.

வஹ்ஹாபி, சுன்னி, ஷியா, ஷாபி, ஹம்பலி, மாலிக்கி, ஹனபி என்று பலவாறாக முஸ்லிம்கள் சிதறுண்டுக் கிடக்கின்றனர். இங்கு சாதாரண செயல்கள் கூட பெரிதுபடுத்தப்படுகின்றது. தொழுகையில் கைகளை உயர்த்துவது, ஆமீன் சப்தமிட்டு சொல்வதில் கூட ஒரு முடிவுக்கு நம்மால் இன்றும் வர முடியவில்லை. சில உலமாக்கள் தங்களின் சொந்த கருத்துக்களை இஸ்லாமாக்கப் பார்க்கிறார்கள். சில இடங்களில் முஸ்லிம்களை காஃபிர்கள் என்று கூறும் போக்கும் நடந்து வருகிறது. இவை எல்லாம் உண்மையான இஸ்லாத்தை விளங்காததினால் வந்த கேடுகள் ஆகும்.

தற்போது நிலைமை முன்பை விட மோசமாக உள்ளது. இஸ்லாமிய மதத்தையும், இந்திய அரசியலையும் ஒன்றாக்கி பல குழப்பங்களை விதைக்கின்றனர். வரலாற்றை நோக்கும் போது உண்மையான இஸ்லாத்தை பின்பற்றியவர்களை மற்றவர்கள் கேலி செய்தே வந்துள்ளனர். தன்னலமற்ற சேவை செய்து இந்த இஸ்லாத்தை தழைத்தோங்கச் செய்த பல மகான்களின் வரலாறு இன்றும் நம் முன் உள்ளது. பல இறைத் தூதர்களாலேயே அவர்களின் மக்களை முழுவதும் நேர்வழியின்பால் கொண்டு வர முடியாத போது நம்மை போன்ற சாமான்யர்களால் முழுவதுமான மக்களையும் சீர் திருத்தம் செய்து விட முடியுமா? நாம் நமது சீர்திருத்தங்களை மக்கள் முன் வைத்துக் கொண்டிருப்போம். மாற்றம் கொண்டு வர வேண்டியது இறைவன் புறத்திலிருந்து என்ற நம்பிக்கை நம் ஒவ்வொருவர் மனத்திலும் ஆழமாக பதிய வேண்டும்.

கேள்வி: 'அல் ஹிலால்' என்ற உங்களின் பத்திரிக்கையை நிறுத்தி நீண்ட காலமாகிறதே? என்ன காரணம்? இஸ்லாமியர்களின் மீது நீங்கள் நம்பிக்கை இழந்து விட்டீர்களா? அல்லது பலனலிக்காத ஒரு பாலைவனத்தில் அழைப்பு பணி செய்வது வீண் என்று முடிவு கட்டி விட்டீர்களா?

பதில்: உண்மையைச் சொல்வதில் தோற்று விட்டதால் நான் அந்த பத்திரிக்கையை நிறுத்தவில்லை. இந்த பத்திரிக்கையானது துடிப்புள்ள பல ஆர்வமுடைய நபர்களைக் கொண்டு உருவாக்கப்பட்டது. இதன் மூலம் பலர் தங்களின் இஸ்லாமிய நம்பிக்கையை புதுப்பித்துக் கொண்டனர். எனது சொந்த வாழ்வில் இந்த ஈடுபாடானது பல மாற்றங்களை என்னுள் தந்தது. இறைத் தூதர் வழிகாட்டுதலின்படி எமது வாழ்வை அமைத்துக் கொள்ள இந்த துறை மிகவும் உறுதுணையாக இருந்தது.

என் சொந்த விருப்பங்கள் என் மனத்துள் எழும் போதெல்லாம் போனிக்ஸ் பறவையைப் போல அந்த எண்ணங்களை எரித்து விடுவேன். அல் ஹிலால் பத்திரிக்கையானது அத்தகைய மாற்றத்தை என்னுள் ஏற்படுத்தியது. இஸ்லாத்தின் அடிப்படையைக் கொண்டும், எனது தேசத்தின் முன்னேற்றத்தினைக் கருத்தில் கொண்டும் செயல்பட்டதாலேயே இது சாத்தியமானது. என் மனம் ஆசியா ஆப்ரிக்க கண்டங்களின் விடுதலைக்காக ஏங்கியது. இந்தியாவில் இந்து முஸ்லிம் ஒற்றுமை தழைக்க வேண்டும் என்றும் விரும்பியது.

முதல் உலகப் போருக்கு முன்னால் இந்தியா சுதந்திரம் அடைந்து விடும் என்றுதான் நினைத்தேன். அதை தடுத்து விடும் சக்தி எந்த நாட்டுக்கும் இல்லை என்றே நம்பியிருந்தேன். அதே நேரம் சுதந்திர இந்தியாவில் முஸ்லிம்களின் பங்கு என்னவாக இருக்க வேண்டும் என்றும் எண்ணியிருந்தேன். இந்துக்களும் முஸ்லிம்களும் சுதந்திர இந்தியாவில் ஒற்றுமையாக கைகோர்த்து நடந்து செல்வார்கள் என்றே எண்ணியிருந்தேன். இந்திய சுதந்திரத்திற்காக அந்த நாட்டு மக்களே ஒருவரையொருவர் வெட்டிக் கொண்டு ரத்தம் சிந்தினர் என்ற அவப்பெயர் வந்து விடக் கூடாது என்பதற்காக அத்தகைய சூழல் வராதிருப்பதற்காக என்னால் ஆன அனைத்து முயற்சிகளையும் செய்து விட்டேன்.

-முற்றும்.

பாகிஸ்தானை சரியாக புரிந்து கொண்ட மனிதர்!- பாகம் ஒன்று

நண்பர்களே நலமா? தமிழகம் சென்றிருந்ததால் இணையத்தின் பக்கம் அவ்வளவாக வர இயலவில்லை. குழந்தைகளோடும், மனைவி தாயாரோடும் டெல்லி, ஆக்ரா, அஜ்மீர், ஜெய்பூர், என்று வட நாட்டு சுற்றுப் பயணமும் சென்றிருந்தேன். அது பற்றிய பதிவுகளும் இறைவன் நாடினால் பிறகு தருகிறேன். தமிழகம் செல்வதற்கு முன்னால் நான் மொழி பெயர்த்த அபுல் கலாமின் பேட்டியின் முதல் பாகத்தை தற்போது முதல் பதிவாக தருகிறேன். உங்கள் கருத்துக்களையும் தவறாது பதியுங்கள். இனி பதிவுக்குள் செல்வோம்.

அபுல் கலாம் ஆசாத்

முன்னால் காங்கிரஸ் தலைவர் மௌலானா அபுல் கலாம் ஆசாத் ஒரு மிகச் சிறந்த பேட்டி ஒன்றினை பத்திரிக்கையாளர் சொரைஸ் காஷ்மீரிக்கு 1946 ஆம் அண்டு அளித்தார். இந்த பேட்டியானது லாகூரை தலைமையிடமாகக் கொண்டு இயங்கிய உருது பத்திரிக்கையான 'சாட்டன்' ல் ஏப்ரல் மாதம் 1946 ஆம் ஆண்டில் வெளியானது. டெல்லியிலும் சிம்லாவிலும் அரசு அமைப்பதற்காக ஆரம்ப கட்ட நடவடிக்கைகளை எடுத்துக் கொண்டிருந்த சமயம் அது. அந்த பேட்டியில் மத ரீதியாக இந்த நாட்டை துண்டாடுவது என்பது எந்த காலத்திலும் பிரச்னைகளை தீர்த்து விடாது என்று ஆசாத் அவர்கள் தெளிவுபட சொல்லியிருந்தார். பாகிஸ்தானிய தலைவர்கள் முடிவில் அங்கு ராணுவ ஆட்சியையே கொண்டு வருவர் என்பதையும் கோடிட்டுக் காட்டியுள்ளார்.இந்த பேட்டியானது அதிகமாக மக்களை சென்றடையவில்லை. சொரைஸ் காஷ்மீரி தனது 'அபுல் கலாம் ஆசாத்' என்ற புத்தகத்தில் இந்த பேட்டியினை பிரசுரித்துள்ளார். முன்னால் கேபினட் அமைச்சர் ஆரிஃப் முஹம்மது கான் இந்த புத்தகத்தை கண்டெடுத்து பல வருடங்களுக்குப் பிறகு மொழி பெயர்த்தார். அதனை தற்போது பல வேலைகளுக்கிடையில் நான் தமிழில் மொழி பெயர்த்துள்ளேன். இதில் குறைகள் ஏதும் இருந்தால் சுட்டிக் காட்டுங்கள். திருத்திக் கொள்கிறேன். இனி பேட்டியைப் பார்ப்போம்.

கேள்வி:

ஹிந்து முஸ்லிம் பிரச்னையானது அதிகரித்து வருகிறது. சமாதானத்துக்கு எந்த வழியும் தென்படவில்லை. அப்படி இருக்கையில் பாகிஸ்தான் என்ற நாடு பிறந்தே ஆக வேண்டும் என்ற நிர்பந்தம் வந்து விட்டதாக நீங்கள் நினைக்கவில்லையா?

.
பதில்:

ஹிந்து முஸ்லிம் பிரச்னையை தீர்ப்பதற்கு பாகிஸ்தான் ஒன்றுதான் தீர்வு என்பது உண்மையானால் அதனை முதலில் நான் ஆதரிப்பேன். ஆனால் உண்மையோ வேறு விதமாக இருக்கிறது. இவர்களின் முடிவின்படி சிந்த், பலுசிஸ்தானம், பஞ்சாபில் பாதி ஒரு பக்கமும் வங்காளத்தின் ஒரு பகுதி வேறொரு பக்கமும் உள்ள சூழ்நிலையில் அது தனி நாடாக போகும் பட்சத்தில் இந்தியாவுக்கு நிம்மதி கிடைத்து விடும் என்றா நினைக்கிறீர்கள்? உபயோகமான எந்த வொரு நன்மையும் இதனால் விளையப் போவதில்லை.

தனியாக பிரிந்து சென்றால் இஸ்லாத்துக்கு சிறப்பு என்ற ஒரு வாதம் வைக்கப்படுகிறது. இதற்கு முன்னால் 90 சதவீதம் உள்ள இந்துக்கள் தங்களின் பழைய வரலாறுகளை தங்களின் கலாசாரங்களை இத்தனை காலம் எங்காவது இழந்திருக்கிறார்களா? மொகலாயர்கள் ஆட்சி, வெள்ளையர்களின் ஆட்சி என்று பலர் இந்நாட்டை ஆண்டிருந்தாலும் தங்களின் தனித் தன்மையை காத்தே வந்திருக்கின்றனர். எனவே சேர்ந்திருந்தால் இஸ்லாமிய நடவடிக்கைகளுக்கு பாதகம் வரும் என்ற பேசசு அடிப்படை ஆதாரமில்லாதது.

இந்தியாவில் இஸ்லாததின் தாக்கமானது தற்போது சிறப்பாகவே சென்று கொண்டிருக்கிறது. தற்போது மதத்தின் அடிப்படையில் இந்த நாட்டை பிரித்தால் எழுச்சியுறும் தாக்கமானது மிகுந்த பின்னடைவையே சந்திக்கும். பிரிவினை என்ற வெறுப்பானது இந்த நாட்டை நேசிக்கும் பெரும்பான்மை மக்களின் மனதைக் காயப்படுத்தும். இதனால் இஸ்லாத்தின் மீது ஒரு வித வெறுப்பை பெரும்பான்மை இன மக்கள் கொள்ள ஏதுவாகும்.

இனவாத அரசியலானது மதத்துக்கு அப்பாலும் பல காயங்களை உண்டு பண்ணும். இனவாத அரசியல் பங்களிப்பில் நாம் ஆர்வம் கொண்டால் குர்ஆனை விட்டு வெகு தூரம் செல்ல வேண்டிய கட்டாயத்துக்கு அளாகுவோம். குர்ஆனிலிருந்தும் முகமது நபி அவர்களின் வரலாறுகளிலிருந்தும் இன வாத அரசியலுக்காக நாட்டை துண்டாடுவதற்கு எந்த ஆதாரங்களையும் நாம் காண முடியவில்லை. அவர்களோடு சேர்ந்து ஆட்சி அதிகாரங்களை பகிர்ந்து கொள்வதற்குத்தான் ஆதாரத்தை என்னால் பார்க்க முடிகிறது.

மொகலாயர்களின் ஆட்சி இந்தியாவில் வீழ்ந்த போது முஸ்லிம்கள் நமது நாட்டில் 22.5 சதவீதமாக இருந்தனர். இது தற்காலத்தில் மேலும் வளர்ந்துள்ளது. முஸ்லிம் அரசர்கள் தங்களின அதிகாரத்தை துஷ்பிரயோகம் செய்திருந்தால் இந்த வளர்ச்சியை இஸ்லாம் கண்டிருக்காது. மாற்றம் என்பது மனதால் வர வேண்டும். ஆட்சி அதிகாரத்தினால் எக்காலத்திலும் ஒரு கொள்கையை உங்களால் திணித்து விட முடியாது. இன வாதத்தின் அடிப்படையில் ஒரு நாட்டைப் பிரித்து நீங்கள் எதை சாதிக்கப் போகிறீர்கள்? இத்தனை காலமாக இந்து, கிறித்தவ, பார்ஸி, சீக்கிய மக்களோடு அந்நியோன்யமாக பழகி ஒரு சிறந்த பன்முக கலாசாரத்தை நாம் கொண்டு வந்துள்ளோம்.

இந்திய முஸ்லிம்களை எடுத்துக் கொண்டால் தங்களுக்குள் பல பிரிவுகளை உண்டாக்கி வைத்துள்ளனர். சில பிரிவுகள் மொகலாயர்களின் ஆட்சியில் அந்த அரசர்களை திருப்திபடுத்துவதற்காக உண்டானது. மேலும் சில பிரிவுகள் பிரிட்டிஷார் ஆட்சி காலத்தில் புதிதாக உண்டாயின. இது போன்ற பிரிவுகள் உண்மையான இஸ்லாத்தை இந்திய முஸ்லிம்களின் உள்ளங்களிலிருந்து பெரும்பாலும் எடுத்து விட்டது.

இவர்கள் முஸ்லிம்கள் தான. குர்ஆனை பின்பற்றுவதாகத்தான் சொல்கிறார்கள். ஆனால் உண்மையில் அவர்கள் தங்களின் மூதாதையர்கள் என்ன சொன்னார்களோ அதனையோ அல்லது சில மார்க்க அறிஞர்கள் கொடுத்த ஃபத்வாக்களையோ இஸ்லாமாக நம்பினார்கள். இப்படிப்பட்ட இஸ்லாமிய ஞானம் உள்ளவர்களின் கைகளில்தான் மிகப் பெரிய நாட்டின் ஆட்சிப் பொறுப்பு இஸ்லாத்தின் பெயரால் கொடுக்கப்படப் போகிறது. இவர்கள் தாங்கள் ஆட்சி அதிகாரத்தைக் கைப்பற்றுவதற்காக இஸ்லாத்தை பயன் படுத்திக் கொள்கிறார்கள். அதல்லாது இஸ்லாமிய அடிப்படையில் ஒரு ஆட்சியை நிறுவ வேண்டும் என்ற தாகத்தில் அவர்கள் நாட்டை பிரித்துக் கேட்கவில்லை. பாகிஸ்தான் என்பது இவர்களின் அரசியல் வாழ்வுக்காக உண்டாக்கப்பட்ட ஒன்று. இந்திய முஸ்லிம் சிறுபான்மையினரை பற்றியும் எந்த கவலையும் படாமல் எடுத்து வைக்கப்படும் வாதம்தான் இந்த பிரிவினைக் கொள்கை.

எந்த நாட்டில் அல்லது எந்த சட்டத்தில் இஸ்லாமியர், இஸ்லாமியர் அல்லாதார் என்று பாகுபடுத்தி அரசு அமைக்குமபடி சொல்லப்பட்டிருக்கிறது என்று ஆதாரம் கேட்டேன். இதுவரை எந்த பதிலும் இல்லை. குர்ஆனிலிருந்தோ அல்லது நபிகளின் வாழ்விலிருந்தோ இதற்கு ஆதாரத்தை அவர்களால் சமர்ப்பிக்க முடியுமா? அல்லது எந்த நபித் தோழராவது இத்தகைய பிரிவினைக்கு ஆதரவாக பேசியுள்ளனரா? இவ்வாறு நம்பிக்கையின் அடிப்படையில் ஒரு நாட்டை பிளவுபடுத்துவது சரி என்றால் எவ்வாறு இஸ்லாம் ஒரு அகில உலகத்துக்கும் சொந்தமான ஒரு மார்க்கம் என்று நாம் சொல்ல முடியும்? எவ்வாறு நமக்கு இடப்பட்ட கட்டளையான ஏகத்துவத்தை அந்த மக்களுக்கு எத்தி வைக்க முடியும்? இது பொன்ற ஒரு நிலையை இஸ்லாம் அங்கீகரித்திருந்தால் எவ்வாறு நபித் தோழர்கள் மாற்று மதத்தவர்களின் நாடுகளுக்கு சென்று சத்தியத்தின் பால் அழைப்பு விடுததிருக்க முடியும்?

முஸ்லிம் லீகின் கோரிக்கை இஸ்லாமிய நடைமுறைக்கு எதிரானது. இவர்கள் ஆடசி அதிகாரங்களை பகிர்ந்து கொள்ள வேண்டும் என்பதற்காக இஸ்லாமிய நடைமுறைகளை ஓரங்கட்டச் சொல்கிறார்கள்.பாகிஸ்தான் பிரிவினையால் எந்த நன்மையும் விளைந்து விடப் போவதில்லை என்பது எனக்கு கண்கூடாகத் தெரிகிறது. இஸ்லாம் காட்டாத ஒரு வழியில் இந்த நாட்டை பிரித்து இஸ்லாத்துக்கு இவர்களால் என்ன செய்து விட முடியும்?

மேல் நாட்டு கலாசாரமும் அதையொட்டிய ஆட்சியமைப்பும் அது பற்றிய தத்துவங்களும் நமக்கு மேலும் சிக்கலை உண்டு பண்ணும். முஸ்லிம் லீக் தலைவர்களில் பலர் மத சார்பற்ற ஒரு அரசை நிர்மாணிப்பதிலேயே அக்கறை கொண்டுள்ளனர். அதனை சேர்ந்து இருந்து ஒரே நாடாக ஆட்சியை பகிர்ந்து கொள்வதில் என்ன சிக்கல் அவர்களுக்கு வருங்காலத்தில் எப்படி எல்லாம் சூழ்நிலைகள் மாறப் போகின்றன என்பதை அறிந்தவன் இறைவன் ஒருவனே!

தற்போதய சூழலில் இந்த தலைவர்களின் பின்னால் பாகிஸ்தான் அமைந்தால் அங்கு இஸ்லாத்துக்கு எந்த மதிப்பும் இருக்காது என்பதே எனது கணிப்பு. பாகிஸ்தான் பகுதியில் உள்ள பெரும்பான்மையான இளைஞர்கள் மத சார்பற்ற ஒரு நிலையை விரும்புவதாகவே நான் அறிகிறேன். இன்று சிறுபான்மையாக உள்ள பல மாநிலங்களில் முஸ்லிம்கள் மிகுந்த ஈடுபாட்டோடு தங்களின் சமய கடமைகளை செய்து வருவதையும் பார்க்கிறேன். அதே போல் பெரும்பான்மையாக உள்ள மாநிலங்களில் அதே இளைஞர்களின் மார்க்க செயல்பாடுகளில் அலட்சியமாக இருப்பதையும் பார்க்கிறேன். பிரிவினை கோருவோரில் அறிஞர்கள் குறைவாக உள்ளதை கவனித்தேன். இதனாலும் அங்கு இஸ்லாம் தனது வீரியத்தை இழக்கும் அபாயம் உள்ளது.

கேள்வி:

ஆனால் உலமாக்கள் அதிகம் பேர் முகமது அலி ஜின்னாவை ஆதரிக்கிறார்களே?

பதில்:

அதிகமான உலமாக்கள் அக்பரையும் தான் ஆதரித்தர்கள். இதே ஒரு சில உலமாக்கள்தான் 'தீன் இலாஹி' என்ற புது மார்க்கத்தையும் அக்பருக்காக உருவாக்கினார்கள். இவர்களெல்லாம் மத அறிஞர்கள் என்ற கணக்கில் வருவார்களா? தனது வாழ்நாள் முழுக்க குர்ஆனையும் ஹதீஸையும் கடைபிடிப்பதே தங்களின் லட்சியம் என்று வாழ்ந்தார்களே அப்படிப்பட்ட உலமாக்களைப் பற்றி பேசுகிறேன். 1300 வருடங்களாக இது போன்று வாழ்ந்த பல அறிஞர்களை நாம் நமது வாழ்நாளில் கண்டே வருகிறோம். இந்த மார்க்கத்துக்காகவே உழைத்த இது போன்ற சிறந்த அறிஞரகளை ஏனோ நாம் ஒதுக்கி விடுகிறோம்.

கேள்வி:

மௌலானா! பாகிஸ்தான் உருவாகி அது ஒரு சிறந்த ஆட்சியையும் கொடுத்தால் அது இஸ்லாத்துக்கும் மற்றும் முஸ்லிம்களுக்கும் ஒரு பாதுகாப்பைத் தராதா?

பதில்:

இஸ்லாத்தின் பெயரால் ஒரு செயல் நடைபெற்றால் அதற்கு குர்ஆனிலிருந்து அதாரத்தை தர கடமைபட்டுள்ளீர்கள். இஸ்லாமிய வரலாறு நமக்கு பல அத்தாட்சிகளை விட்டுச் சென்றுள்ளது. ஒட்டகப் போரைப் பற்றி நீங்கள் படித்திருப்பீர்கள். இங்கு குர்ஆனின் சட்டத்தைத்தான் பின் பற்றுகிறோம் என்று சொல்லப்பட்டது. இது சரியான வழிமுறைதானா? அதேபோல் கர்பலாவில் நபிகள் நாயகத்தின் குடும்பத்தினரை அவரின் தோழர்களே கொலை செய்யும் நிலை ஏற்பட்டதே! இதுவும் சரியா? ஹஜ்ஜாஜ் என்ற அறிஞர் மெக்காவின் மீது தாக்குதல் நடத்தியதும் சரியான வழியாகுமா? நாம் செய்யும் தவறான செயல்களுக்கு இஸ்லாத்தை காரணம் காட்டி தப்பிக்க முயற்சிக்கக் கூடாது.

பாகிஸ்தான் பிரிவினை ஒன்றுதான் இந்திய முஸ்லிம்களின் பிரச்னைக்கு நிரந்தர தீர்வு என்பது உண்மையானால் அதை ஆதரிக்கும் முதல் ஆள் நானாகத்தான் இருப்பேன். பாகிஸ்தான் ஆதரவாளர்கள் வைக்கும் பொறுப்பற்ற வாதங்களினால் பிற்பாடு எவ்வளவு பெரிய பயங்கர நிகழ்வுகள் உண்டாகப் பொகிறது என்பது எனக்கு ந்ன்றாகத் தெரிகிறது. எனது கருத்துகளையோ என்னையோ மக்கள் பின்பற்ற வேண்டும் என்று நான் எதிர்பார்க்கவில்லை. அனால் அதே சமயம் ஒரு தவறான முடிவை பெரும்பான்மையோர் விரும்புகின்றார்கள் என்பதற்காக அந்த முடிவை நானும் ஆதரிக்க வேண்டும் என்று பலர் விரும்புவது சரியான வாதமாகப் படவில்லை. பிரிவினை வாதங்களை வைத்துக் கொண்டிருக்கும் பெரும்பான்மையோருக்கு அரசியல் அனுபவம் இல்லை. உண்மை நிலவரம் என்ன என்று தெரியாமலேயே பலர் பிரிவினைக்கு ஆதரவான நிலைப்பாட்டினை எடுத்துள்ளனர். இந்த பிரிவினை வாதத்தை ஒன்று அரசாங்கம் கட்டுப்படுத்த வேண்டும். அல்லது ஜின்னா தானாக முன் வந்து தனிநாடு கோரிக்கையை கைவிட வேண்டும். சில புதிய ஷரத்துகளை வேண்டுமானால் பிரிக்கப்படாத ஒன்றுபட்ட இந்தியாவுக்காக அவர் சேர்த்துக் கொள்ளலாம்.

என்னோடு வேலை செய்து வரும் மற்ற தோழர்களின் கருத்துப்படி ஒன்றுபட்ட இந்தியா இரண்டாக பிரியும் கட்டத்தை நெருங்கி விட்டதாகவே கூறுகின்றனர். இந்த பிரிவினையால் இந்தியா மட்டுமே பாதிப்புக்குள்ளாகும் என்று நினைக்க வேண்டாம்.. அதோடு சேர்ந்து பாகிஸ்தானும் மிகப் பெரிய இழப்புகளை சந்திக்க நேரிடும். தேசப்பிரிவினையானது மதத்தின் அடிப்படையில் நடைபெறப் போகிறது. புவியியல் சார்ந்து இந்த பிரிவினை நடக்கப் போவதில்லை. ஆறுகள், மலைகள், காடுகள் இவைகளை அடிப்படையாக வைத்து ஒரு நாட்டை பிரிப்பதுதான் நியாயமானதானதாகவும் இருக்கும். பிரிவினை என்ற ஒரு கோடு போட்டாகி விட்டது. அதை எப்படி செயல்படுத்துவது என்பதில்தான் சிக்கலே இருக்கிறது.

நாம் ஒன்றை ஞாபகத்தில் வைத்துக் கொள்ள வேண்டும். தனது தாய் நாட்டை ஒரு சிலர் பிரிக்கிறார்கள் என்ற வெறுப்பானது அந்த மனிதனின் மனத்தில் ஆறாத வடுவை ஏற்படுத்தி விடும். இந்த வெறுப்பானது காலா காலத்துக்கும் இந்தியா பாகிஸ்தானுக்கிடையே பிரச்னைகளை தோற்றுவித்தவண்ணமாகவே இருக்கும். இப்படிப்பட்ட சூழ்நிலையில் இந்தியா, பாகிஸ்தான் நல்லுறவு என்பது எட்டாக் கனியாகவே காலத்துக்கும் இருக்கும். நாட்டை பிரித்ததினால் இரு நாட்டு மக்களுக்கும் ஒரு மிகப் பெரிய தடுப்பு போடப்பட்டாகி விடும். இந்திய முஸ்லிம்கள் அனைவரையும் பாகிஸ்தானுக்குள் கொண்டு வருவது என்பதும் இயலாத காரியம். அதற்கேற்ற நில வசதிகளோ கட்டுமானப் பணிகளோ போதுமானதாக இல்லை. அடுத்து பாகிஸ்தானில் தங்கும் இந்துக்கள் நிம்மதியான வாழ்வை சுகிக்க முடியாத நிலை ஏற்படலாம். அங்குள்ள ஒரு சில தீவிரவாத முஸ்லிம்கள் இந்துக்களை விரட்டலாம். அல்லது அந்த ஹிந்துக்களுக்கு எந்த உதவிகளும் கொடுக்கப்படாமல் நிர்கதியாக விடப்படலாம். அதே போன்று இந்த பக்கம் முஸ்லிம்களும் மூன்று வழிகளில் பாதிப்படைவர்.

1. இந்திய முஸ்லிம்களின் சொத்துக்கள் சூறையாடப்பட்டும், தாக்கப்பட்டும் பாகிஸ்தானுக்கு விரட்டப்படுவர். அனால் இவ்வாறு செல்லும் அத்தனை முஸ்லிம்களுக்கும் அங்கு இருப்பிட வசதி செய்து கொடுக்க முடியுமா? என்பதும் கேள்விக் குறியே.

2. பலர் கொலையும் செய்யப்படலாம். தங்களின் வாழ்வு பறிக்கப்பட்டு அநாதரவாக விடப்பட்ட அந்த காயம் ஆறுவதற்கு அவர்களுக்கு பல ஆண்டுகள் பிடிக்கும். ஒரு தலைமுறையே வெறுப்பில் தனது வாழ்நாளை கழிக்கும்.

3.அதிகமான முஸ்லிம்கள் வறுமையான வாழ்வுக்குத் தள்ளப்படுவர். அரசியலில் பிரதிநிதித்துவம் இல்லாமல் போகும். வறுமை, வேலை வாய்ப்பு இல்லாமை போன்ற சூழலால் முஸ்லிம்கள் தங்கள் மார்க்க சட்ட திட்டங்களை சிறுக சிறுக இழக்க வேண்டி வரலாம்.

வசதியுள்ள பல முஸ்லிம்கள் தற்போது முஸ்லிம் லீகை ஆதரிக்கின்றனர். அவர்கள் பிரிவினைக்கு பிறகு பாகிஸ்தானுக்கும் சென்று விடுவர். பணம் படைத்த அந்த முஸ்லிம்கள் பாகிஸ்தானின் பெரும்பாலான தொழிற்சாலைகளையும் நிலங்களையும் தொழில்களையும் ஆக்கிரமித்துக் கொள்வர். ஏழை மேலும் ஏழையாவான். பணக்காரன் மேலும் பணம் படைத்தவனாவான். செல்வம் ஒரு சிலரிடத்தில் அபரிமிதமாக குவியும். இந்தியாவில் பல மில்லியன் முஸ்லிம்களை நிர்கதியாக விட்டு விட்டு இவர்கள் பாகிஸ்தானில் அமர்ந்து கொள்வர். இவர்களுக்கு என்ன தீர்வை தரப் பொகிறீர்கள் என்பதை பாகிஸ்தானின் ஆதரவாளர்கள் விளக்க வேண்டும்.

பாகிஸ்தானில் உள்ள இந்துக்களாலும் சீக்கியர்களாலும் பல பிரச்னைகளை பாகிஸ்தான் எதிர் கொள்ள வேண்டி வரும். இதை விட பெரும் பிரச்னை ஒன்று உள்ளது. உலக சக்திகளான அமெரிக்காவும் ரஷ்யாவும் பாகிஸ்தானை ஆக்கிரமித்துக் கொள்ளும் அபாயமும் உள்ளது. அதே சமயம் இது போன்ற அந்நிய ஆக்கிரமிப்பு பிரச்னை இந்தியாவுக்கு வராது. ஆனால் பல பிரச்னைகள் தொல்லைகள் பாகிஸ்தானிலிருந்து இந்தியாவுக்கு வந்த வண்ணம் இருக்கும்.

அடுதது ஒரு முக்கியமான பிரச்னையிலிருந்து தப்பித்துக் கொள்ள ஜின்னா முயற்சிக்கிறார். வங்காள பிரச்னை புறக்கணிக்கப்படுவது சீக்கிரமே நடந்தாலும் ஆச்சரியம் இல்லை. இதை ஜின்னா உணராதவராகவே உள்ளார். இரண்டாம் உலகப் பொரின் போது பஜ்லுல் ஹக் ஜின்னாவின் தலைமையை எதிர்த்ததால் முஸ்லிம் லீக்கிலிருந்து விலக்கப்பட்டார். திரு சஹ்ரவர்த்தி ஜின்னாவின் தலைமைக்கு எந்த முக்கியத்துவத்தையும் கொடுக்கவில்லை என்பதையும் நோக்க வேண்டும். இந்த சந்தர்ப்பத்தில் முஸ்லிம் லீக்கை மட்டும் ஏன் பார்க்க வேண்டும். காங்கிரஸையே எடுத்துக் கொள்ளுங்களேன். சுபாஷ் சந்திர போஸினால் காஙகிரஸூக்குள் ஏற்பட்ட பிரச்னைகளை நாம் அறிவோம். காந்தி சுபாஷ் சந்திர போஸின் தலைமையை விரும்பவில்லை. எனவே தான் ராஜ்காட்டில் சாகும் வரை உண்ணாவிரதம் இருக்கும் நிலைமைக்கு தள்ளப்பட்டார் காந்திஜி. சுபாஷ் சந்திர போஸ் காந்திஜிக்கு எதிராக பல செயல்பாடுகளை காங்கிரஸூக்குள்ளேயே இருந்து கொண்டு எடுத்தார். இது பலமுறை நடந்தது. வங்காளத்தின் தலைமைக்கு அனுசரித்து செல்லும் பக்குவம் இல்லாமல் போனதால் அதன் முன்னேற்றத்தில் பல பின்னடைவுகளை இந்தியாவுக்கு உள்ளேயும் வெளியேயும் பல பின்னடைவுகளை சம்பாதித்துக் கொண்டது.

கிழக்குப் பாகிஸ்தானைப் பொறுத்தவரை ஜின்னாவும் லியாக்கத் அலி கானும் உயிரோடு உள்ளவரை எந்த பிரச்னையும் ஏற்பட வாய்ப்பில்லை. ஆனால் இவர்கள் இருவரின் காலத்துக்குப் பிறகுஒரு சிறிய சம்பவம் கூட மிகப் பெரிய கலவரங்களை உண்டு பண்ணி விடும் சாத்தியக் கூறுகள் உண்டு. வங்காளம் பாகிஸ்தானோடு நீண்ட காலம் நிலைத்திருக்குமா என்பதே எனக்கு சந்தேகமாக இருக்கிறது. இந்த இரு பிராந்திய மக்களுக்கும் எந்த விதத்திலும் ஒற்றுமையை என்னால் காண முடியவில்லை. இவர்கள் இருவரையும் இணைப்பது இஸ்லாம் ஒன்று மட்டுமே. கலாசாரம் அனைத்திலும் இருவருக்கும் பெருத்த வேறுபாடு உள்ளது. அரசியல் காரணங்களுக்காக இவ்விரு துருவங்களும் இணைவது சாத்தியப் படுமா என்பது கேள்விக் குறியே!

உதாரணத்துக்கு அரபு நாடுகளை எடுத்துக் கொள்ளுங்கள். அனைவருக்கும் பொதுவான மதமாக இஸ்லாம் உள்ளது. பண்பாடு பழக்க வழக்கங்கள் அனைத்திலும் ஒத்தே இருக்கின்றனர். மொழி கூட அனைவருக்கும் பொதுவான அரபி மொழிதான். இத்தனை ஒற்றுமைகள் இருந்தும் அவர்கள் அனைவரும் ஒரே ராஜ்ஜியமாக இருக்க முடியவில்லை. ஒவ்வொரு நாடும் தனித்தனி அரசுகளாகவே செயல்படுகின்றன. ஒவ்வொரு நாட்டுக்கும் சட்ட திட்டங்களும் வித்தியாசப்படுகின்றன.

தற்போது வங்காளத்தையும் பாகிஸ்தான் பகுதிகளையும இவ்வாறு ஒப்பீடு செய்து பார்ப்போம். இருவருக்குமே பேசும் மொழியில் மிகப் பெரிய வித்தியாசம் உள்ளது. பாகிஸ்தான் என்ற இந்த மாயை மக்களுக்கு சில காலம் சென்று விலகிய பிறகு பல வித்தியாசங்கள் சிறிது சிறிதாக தலை தூக்க ஆரம்பிக்கும். இதனால் சண்டை சச்ரவுகள் உண்டாகி வெளி நாட்டு சக்தியின் தலையீட்டால் இந்த இரண்டு பிரதேசங்களும் இரு நாடுகளாக பிரியும் சாத்தியதை உள்ளது. இந்த பிரிவினை நடந்த பிறகு பாகிஸ்தானானது இந்த பிராந்தியததில் பல சிக்கல்களை உண்டு பண்ணக் கூடிய ஒரு நாடாக பரிணமிக்கும் அபாயம் அபாயம் உள்ளது.

பஞ்சாப், சிந்த், பலுசிஸ்தானம் போன்ற பல மாநிலங்கள் வெளி நாட்டு சக்திகளின் ஆக்கிரமிப்புக்கு தாராளமாக தங்களின் கதவுகளை திறந்து விடும் அபாயமும் உண்டு. இவ்வாறெல்லாம் நடப்பதற்கு மிகப் பெரிய சாத்தியக் கூறுகள் இருப்பதாகவே நான் நினைக்கிறேன்.

மேலும் முக்கியமாக நாம் கவனிக்க வேண்டியது பாகிஸ்தானின் பொருளாதார முன்னேற்றம். ஒரு நாட்டின் முன்னேற்றமானது ஒரு குறிப்பிட்ட மதத்தின் பெயரால் பிரிந்ததனால் மட்டுமே வந்து விடாது. முஸ்லிம் தொழிலதிபர்களுக்கு பாகிஸ்தான் போன்ற ஒரு புதிதாக உருவாகிய நாட்டில் பணத்தை போட்டு லாபம் ஈட்ட முடியுமா என்ற சந்தேகமும் வந்துள்ளது. அரசு உதவிகளை அவர்கள் அதிகம் எதிர்பார்ப்பர். புதிய நாடும், புதிய சட்டங்களும் அவர்களை அரசின் உதவியையே எதிர் பார்க்க சொல்லும். இது எந்த அளவு வெற்றியைக் கொடுக்கும் என்பது போகப் போகத்தான் தெரியும்.

நான் நினைப்பது சரியானால் பாகிஸ்தானில் பின்வரும் பிரச்னைகள் பெரிதாக கிளம்பி பெரும் அச்சுறுத்தல்களை சமாளிக்க வேண்டி வரும்.

முதலாவது : அரசியல் தலைமை ராணுவத்தினரால் கட்டுப்படுத்தக் கூடிய நிலையை பின்னாளில் சந்திக்க நேரிடும். பல நாடுகளில் இது போன்று நடந்துள்ளது.

இரண்டாவது : அதிகமான வெளி நாட்டு கடன்களை சுமக்க வேண்டி வரும்.

மூன்றாவது : அண்டை நாடுகளோடு சுமூகமான சூழல் மறைந்து ஆயுதங்களை அதிகம் கொள்முதல் செய்யும் நாடாக மாற வாய்ப்புள்ளது.

நான்காவது : உள் நாட்டு கொந்தளிப்பு மற்றும் மக்களின் மாறுபட்ட அபிப்ராயங்களினால் பல சச்சரவுகளை சந்திக்க நேரிடும்.

ஐந்தாவது: பாகிஸ்தானின் விலை மதிக்க முடியாத இயற்கை வளங்கள் பணம் படைத்தவர்களாலும் பெரும் தொழிலதிபர்களாலும் அவர்களுக்கு பங்கு போட்டு கொள்ளப்படும்.

ஆறாவது : பணம் படைத்தவர்களின் சுரண்டலினால் சாமான்யர்களின் போராட்டங்களை சந்திக்க நேரிடும்.

ஏழாவது : மன நிம்மதியின்மையாலும், குழப்பங்களினாலும் பாகிஸ்தானின் இளைஞர்கள் இஸ்லாமிய வரிவு முறையை துறக்கும் அபாயமும் உள்ளது.

எட்டாவது: உலக சக்திகளான அமெரிக்கா, ரஷ்யா போன்ற நாடுகள் பாகிஸ்தானின் ஆட்சி அதிகாரங்களையே கட்டுப்படுத்தும் சக்தியை பெற்று விடும் அபாயமும் உண்டு. இதனால் நாமும் பாதிக்கப்படுவோம்.

இது போன்ற சூழ்நிலையில் பாகிஸ்தானின் இன, மொழி தகராறுகள் தலை தூக்கி மிகப் பெரிய சிக்கலை உண்டு பண்ணக் கூடும். இந்த பிரச்னைகளை தீர்க்க உருப்படியான எந்த ஒரு யோகனைகளையும் இஸ்லாமிய நாடுகளால் கூட தர முடியாது. அப்படியே அவர்கள் வந்தாலும் தங்களின் வழிக்கு இழுக்கவே பலரும் முயற்சி செய்வர். இது மேலும் சிக்கலை உண்டாக்கும்.

.......தொடரும்

பெல்ஜியம் சிறுவர்கள் தவறாக வழி நடத்தப்படுகிறார்களா?

பெல்ஜியம் சிறுவர்கள் தவறாக வழி நடத்தப்படுகிறார்களா?

நூற்றுக் கணக்கான ஐரோப்பிய இறைஞர்களை தற்போது சிரிய சண்டையில் பங்கெடுப்பதை காணக் கூடியதாக இருக்கிறது. பஸர் அல் அசாத்துக்கு எதிரான போரில் இந்த இளைஞர்களை பலர் மூளை சலவை செய்து பயன்படுத்தி வருகின்றனர். போதையிலும், விபசாரத்திலும், நாத்திகத்திலும் தங்களின் வாழ்வை தொலைத்துக் கொண்டிருந்த ஐரோப்பிய இளைஞர்களுக்கு அரு மருந்தாக தற்போது இஸ்லாம் கிடைத்து வருகிறது. ஆனால் சில இஸ்லாமிய அமைப்புகள் இந்த இளைஞர்களை 'ஜிகாத்' என்ற பெயரில் மூளை சலவை செய்து சிரியாவுக்கு அனுப்பி வைக்கிறது. இதற்கு அமெரிக்க ஆதரவும் இருப்பதாக செய்திகள் கூறுகின்றன. கம்யூனிஸ சித்தாந்தத்தில் ஊறிப் போன பஸர் அல் அசாத்தை எப்படியாவது வெளியேற்ற அமெரிக்கா எதையும் செய்ய தயாராக உள்ளது.

முன்பு இதே தவறை ரஷ்ய படைகளை வெளியேற்ற ஆப்கானிஸ்தானத்திலும் அமெரிக்கா செய்ததை நாம் மறந்து விட முடியாது. தாலிபான்களுக்கு பயிற்சியும் ஆயுதங்களும் கொடுத்து வளர்த்து விட்டதே அமெரிக்காதான். முடிவில் அமெரிக்காவுக்கு தாலிபான்களே பெரும் தலைவலியாய் மாறிப் போயினர். இன்று வரை அது ஒரு இடியாப்ப சிக்கலாக போய்க் கொண்டுள்ளது.

படத்தில் உள்ள 19 தே வயதான பிரைன்டி மல்டர் சிறந்த விளையாட்டு வீரர். நன்றாக படிக்கக் கூடியவன். இரண்டு வருடங்களுக்கு முன்பு இஸ்லாத்தின் சட்டங்களின் மேல் விருப்பம் கொண்டு முஸ்லிமாக மாறியுள்ளான். தனது பெயரையும் அபு காசிம் என்று மாற்றிக் கொண்டுள்ளார். தனது சகோதரி இடத்தில் 'நீயும் இஸ்லாத்துக்கு வந்து விடு. தூய இறைவனின் பாதையில் செல்கிறேன். இதுவே நேரான வழி' என்று உபதேசம் செய்ய ஆரம்பித்துள்ளார். தனது பெற்றோர்களையும் இஸ்லாத்தை ஏற்க அழைப்பு விடுத்த வண்ணம் உள்ளார். இது வரை ஓகே.



பிரைன் தற்போது அபு காசிம்

ஆனால் ஒரு சில தவறான இஸ்லாமியர்களின் வழி காட்டுதலால் தனது கல்லூரி படிப்பை நிறுத்தியுள்ளார். தனது பெற்றோர்களை பார்ப்பதையும் தவிர்த்து வந்துள்ளார். தற்போது சிரியாவில் அரசு எதிர்ப்பு படையில் தீவிரமாக உள்ளதாக பிபிசி ஆவணப்படம் சொல்கிறது. படததில் இருப்பது தனது மகன்தான் என்பதை அவரது பெற்றோரும் உறுதி செய்துள்ளனர்.

இஸலாமிய நடைமுறை இதற்கு முற்றிலும் மாறானது. கல்வியை கற்கச் சொல்லி இஸ்லாம் ஊக்கமளிக்கிறது. இஸ்லாத்தை பெற்றோர்கள் ஏற்கா விட்டாலும் அவர்களுக்கு பணிவிடை செய்வது அவசியமானது என்றும் அது அவனின் கடமை என்றும் போதிக்கிறது. அடுத்து போர்க் களங்களில் முதியோர், பெண்கள், சிறுவர்கள், சிறுமிகள், மத குருமார்கள் போன்றவர்களுக்கு எந்த தீங்கும் விளைவிக்கக் கூடாது என்று கட்டளையே இடுகிறது. தற்போது இவை அனைத்தையுமே அந்த இளைஞன் 'ஜிஹாத்' என்ற பெயரில் மீறுகிறான்.

ஆப்கானிஸ்தான், பாலஸ்தீன், ஈராக், லிபியா என்று பல நாடுகளை நாசமாக்கிய அமெரிக்க, இஸ்ரேலிய கூட்டுப் படைகள் தற்போது கண் வைத்திருப்பது சிரிய அரசாங்கத்தின் மீது. அஸர் அல் பசாத்தை அகற்ற எந்த விலையையும் கொடுக்க அமெரிக்கா தயாராக உள்ளது. அதற்காக அப்பாவி ஐரோப்பிய இளைஞர்கள் பகடைக் காய்களாக பயன்படுத்தப்படுகின்றனர். 'ஜிஹாத்' என்ற பெயரில் எகிப்தில் ஆட்சி மாற்றம் ஏற்படுத்தி எதனை சாதித்தார்கள்? முர்ஸியும் தற்போது அமெரிக்க கைப்பாவையாக மாறி விட்டார்.

எனவே புது வாழ்வை நோக்கி வசந்தத்தை நோக்கி ஆவலோடு வந்திருக்கும் அந்த இளம் குருத்துக்களை படுகுழியில் தள்ள நாம் அனுமதிக்க கூடாது. சிரிய ஆட்சியை அகற்ற பக்கத்து நாடுகள் தங்களால் ஆன முயற்சிகளை எடுத்துக் கொள்ளட்டும். இதற்காக ஐரோப்பாவிலிருந்து இந்த சிறுவர்களை அழைத்து வருவதற்கு முஸ்லிம்களாகிய நாம் கடுமையான எதிர்ப்பை தெரிவிக்க வேண்டும்.





புத்தகங்கள் படிக்கும் அபு காசிம்



மற்றொரு இளைஞர் தற்போது முஹம்மது மீராவாக...

இந்த நிலை தொடர்ந்தால் இஸ்லாத்தின் வளர்ச்சி ஐரோப்பாவில் வெகுவாக பாதிக்கப்படும். எனவே ஐரோப்பிய நாடுகளில் உள்ள தவ்ஹீத் அமைப்பினர் இதுபோல் சிறுவர்களை போருக்கு அனுப்பும் குழுக்களை கவனித்து அதனை தடுக்க முயற்சிக்க வேண்டும். அவர்களுக்கு உண்மையான இஸ்லாம் என்றால் என்ன? ஜிஹாதுக்கு என்ன விளக்கம்? அது எவ்வாறு தவறாக புரிந்து கொள்ளப்பட்டுள்ளது என்பதை விளக்க வேண்டும். கண்டிப்பாக தூய பிரசாரத்தின் மூலம் சிறந்த மாற்றத்தை ஐரோப்பாவில் உண்டு பண்ணலாம். அமைதி இழந்து தவிக்கும் அந்த மக்கள் இன்று சாரை சாரையாக இஸ்லாத்தை நோக்கி வருகின்றனர். இது தொடர வேண்டுமாயின் சிறுவர்களை போரில் ஈடுபடுத்தப்படும் இந்த நிகழ்வு முற்றாக நிறுத்தப்பட வேண்டும.

தகவல் உதவி:

http://www.bbc.co.uk/news/magazine-22277462