டோண்டு ராகவன் அவர்களுடன் ஒரு சந்திப்பு!

டோண்டு ராகவன் அவர்களுடன் ஒரு சந்திப்பு!

இரண்டு நாட்களுக்கு முன்பு புனித ஹஜ் பயணம் முடித்து வரும் என் தாத்தாவை அழைப்பதற்காக சென்னை சென்றிருந்தேன். இதுவரை முகம் தெரியாமல் இணையத்தின் மூலமே தொடர்பு கொண்டிருக்கும் ஒரு சில வலைப்பதிவர்களை சந்தித்தால் என்ன? என்ற எண்ணம் வரவே நமது டோண்டு ராகவன் சாருக்கு தொலை பேசினேன். டோண்டு சார் 15 நிமிடத்தில் பன்னாட்டு விமான நிலையத்தில் ஆஜர்.

விமானம் ஏழரைக்கு சென்னையை அடைந்தது. இமிக்ரேஷன் முடிந்து தாத்தா வெளியாக 9.30 ஆகி விட்டது. இடைப்பட்ட இந்த இரண்டு மணி நேரத்தை நம் ராகவன் சாரோடு கழித்தேன். முதல் சந்திப்பு என்றாலும் நெடுநாள் பழகியது போல் மிகவும் இயல்பாக பேசினார். மதத்தால் கலாச்சாரத்தால் வேறுபட்டிருந்தாலும் இணையத் தமிழ் எங்கள் இருவரையும் இணைத்துள்ளது. இருந்த இரண்டு மணி நேரத்தில் மனிதர் சளைக்காமல் பல விபரங்களை சொல்லிக் கொண்டும் என்னிடம் சில கேள்விகள் கேட்டுக் கொண்டும் இருந்தார். சிலருக்கு வயது ஏற ஏற இளமை கூடிக் கொண்டு போகும் என்பது இதுதானோ!

தமிழ்மணத்தில் பல வலைப் பதிவர்களின் கருத்தோடு முற்றிலும் மாறுபடக் கூடியவர். தான் சொல்ல வரும் கருத்தை நேரிடையாக யாரைப்பற்றியும் கவலைப்படாமல் சொல்லும் தைரியத்தை நினைத்தும் சில நேரம் ஆச்சரியப்படுவதுண்டு. இதனால் பலரின் எதிர்ப்புகளையும் சம்பாதித்துக் கொண்டவர். அவரோடு பல இடங்களில் கருத்துக்களோடு முரண்பட்டாலும் ஆரம்பம் முதலே அவரை மதித்து வந்திருக்கிறேன். அந்த மதிப்பும் மரியாதையும் என்றும் நிலைக்க வேண்டும் என்பதே என் அவா!

சமீபத்தில் லக்கிலுக் இவரை டெண்டுல்கராக மாற்றிய பதிவைப் பற்றியும் சுவாரஸ்யமாக பேசிக் கொண்டிருந்தோம்.

இஸ்லாத்தில் உள்ள முத்தலாக் பிரச்னை, இஸ்லாமியர் கல்வியில் பின் தங்கி இருப்பது போன்ற பல விபரங்களை பகிர்ந்து கொண்டோம். இவை எல்லாம் மார்க்கம் அறியாத சில மார்க்க அறிஞர்களின் தலையீட்டால் வந்தது என்று விளக்கினேன். இடையில் சோவைப் பற்றியும் பேச்சு வந்தது. காசு கொடுத்து நான் வாங்கிப் படிக்கும் பத்திரிக்கைகளில் துக்ளக்கும் ஒன்று. சோவின் கருத்துக்களில் எனக்குள் பல முரண்கள் இருந்தாலும் விபரங்களைத் தெரிந்து கொள்வதற்காக தொடர்ந்து படிப்பேன். இது போன்று பல விபரங்களையும் பகிர்ந்து கொண்டோம். களைப்பு தீர இடைஇடையே லெமன் டீயும் அருந்தி கொண்டோம்.

ஒன்பதரை மணிக்கு தாத்தா வந்தார். தாத்தாவையும் ராகவன் சார் சந்தித்து ஆசி பெற்றார். வீட்டிலிருந்து அழைப்பு வந்துள்ளது என்று கூறி எங்களிடமிருந்து விடை பெற்றுக் கொண்டார் தமிழ்மணத்தின் இளைய!, இனிய வலைப்பதிவர். என் அழைப்பை ஏற்றுவருகை புரிந்து என்னோடு இரண்டு மணி நேரம் பயனுள்ள வகையில் நேரத்தை செலவழித்த ராகவன் சாருக்கு நன்றிகள் பல.

எங்களின் சந்திப்பு சம்பந்தமாக ராகவன் அவர்கள் போட்ட பதிவு இங்கே
http://www.dondu.blogspot.com/2007/02/blog-post.html

என்றும் அன்புடன்
சுவனப்பிரியன்.