புது வருடமும் மூடப்பழக்கங்களும்!

புது வருடமும் மூடப்பழக்கங்களும்!

ஆங்கில புத்தாண்டு வந்து சென்றும் விட்டது. ஏசு நாதர் எதற்காக அவதரித்தார்? எதனை போதித்தார் என்று சிந்திக்கக் கூட மறந்த நம்மவர்கள் அந்த நாளில் குடியும் கும்மாளமுமாக பொழுதை கழித்து புத்தாண்டை அனுப்பியும் விட்டார்கள். உலகம் முழுவதும் ஏறத்தாழ இதே நிலைதான்.

தற்போது இஸ்லாமியர்களின் புத்தாண்டான முஹர்ரம் மாதம் பிறந்து நான்கைந்து நாட்களாகிறது. புத்தாண்டின் முஹர்ரம் முதல் தேதியை முஸ்லிம்கள் யாரும் விமரிசையாக கொண்டாடுவதில்லை. முஹமது நபி கொண்டாட சொல்லி கட்டளையும் இடவில்லை.

ஆனால் முஹர்ரம் 10 ஆம் நாள் ஷியா முஸ்லிம்கள் அதிகம் வாழும் பகுதிகளில் ஆசூரா தினம் என்றும் முஹமது நபியின் பேரர் ஹீசைன் கொல்லப்பட்ட தினத்தில் நாங்கள் துக்கம் அனுஷ்டிக்கிறோம் என்ற பெயரில் விழா எடுப்பதையும் பார்க்கிறோம். இது போன்று உடலை வறுத்திக் கொண்டு நடத்தும் நிகழ்ச்சிகளுக்கும் இஸ்லாத்துக்கும் துளி கூட சம்பந்தம் இல்லை. ஆனால் இஸ்லாத்தின் பெயரால்தான் இது போன்ற நிகழ்ச்சிகள் உலகெங்கும் அரங்கேற்றப்படுகிறது.

ஒருவர் இறந்தால் என்றால் அவருக்காக மூன்று நாள் துக்கம் அனுஷ்டிக்க இஸ்லாம் கட்டளை இடுகிறது. மூன்று நாட்களுக்குப் பிறகு வழமைக்கு திரும்பி விட வேண்டும். ஆனால் இவர்களோ வருடா வருடம் உடலை கிழித்துக் கொண்டு ரத்தம் சொட்ட சொட்ட தங்கள் வருத்தத்தை தெரிவிக்கும் பழக்கத்தை எங்கிருந்து எடுத்தார்கள்? எத்தனையோ அறிவு சார்ந்த இஸ்லாமிய நிகழ்ச்சிகள் உலகெங்கும் வருடா வருடம் நடந்து கொண்டிருக்க பிபிசி யும் சிஎன்என்னும் இந்த நிகழ்ச்சியை மட்டும் பெரிதாக்கி காட்டுவதிலிருந்தே இந்த நிகழ்ச்சியின் போலித்தனம் தெரிய வரும். இஸ்லாம் என்றால் முஹர்ரம் பண்டிகைதான் என்று உலக மக்கள் நினைக்க வேண்டும் என்ற எண்ணத்தில்தான் இதற்கு இவ்வளவு முக்கியத்துவமும் கொடுக்கிறார்கள்.

அடுத்து இதே முஹர்ரம் 10 ஆம் நாள் மற்றொரு நல்ல காரியமும் நடந்தேறியுள்ளது. இறைத்தூதர் மோசே (மூஸா) கொடுங்கோல் அரசன் பாரோ (பிர்அவுன்) விடமிருந்து கடல் பிளந்து காப்பாற்றப்பட்ட நாளும் இதே முஹர்ரம் 10 ஆம் நாள்தான். “Ten Commands” படம் பார்த்தவர்கள் இந்த வரலாறை நன்கு விளங்க முடியும்.

முஹர்ரம் 9, 10 ஆகிய இந்த இரண்டு நாட்களில் மோசேயை இறைவன் காப்பாற்றியதற்கு நன்றி கூறும் விதமாக நோன்பு வைக்க சொல்லி முகமது நபி கட்டளை இட்டுள்ளார். இது ஒன்று தான் முஹர்ரம் மாதத்தைப் பற்றிய இஸ்லாம் வைக்கும் வழிபாடு. எனவே இஸ்லாமிய நண்பர்கள் அறியாமைக்கால மூடப்பழக்கமான பஞ்சா எடுப்பது, மாரில் அடித்துக் கொள்வது, தீ மிதிப்பது, உடலைக் கீறிக் கொள்வது போன்ற பழக்கங்களை விட்டொழித்து முஹர்ரம் 9,10 களில் நோன்பிருந்து அந்த ஏக இறைவனை நினைவு கூறுவோமாக!