இந்தியாவின் மிகப் பெரும் மசூதி!

இதுவரை சாஜஹான் கட்டிய டில்லி ஜூம்ஆ மசூதிதான் இந்தியாவின் மிகப் பெரும் மசூதியாக இருந்தது. ஆனால் இன்னும் சில நாட்களில் கேரளா கோழிக் கோட்டில் திறந்து வைக்கப் பட இருக்கும் புதிய மஸ்ஜித் டில்லி மசூதியின் இடத்தைப் பிடிக்கப் போகிறது. இனி இந்தியாவின் மிகப் பெரும் மசூதியாக கோழிக்கோடு மசூதி விளங்கும்.

கோழிக்கோட்டில் கட்டப்படும் இந்த பள்ளி 250000 ஸ்கொயர் பீட்டில் கட்டப்படுகிறது. 'இந்த பள்ளி உலக சகோதரத்துவத்துக்கு எடுத்துக் காட்டாக அமையும். ஒரு நூலகமும், இஸ்லாமிய ஆராய்ச்சி கூடமும், கான்பரன்ஸ் ஹால் ஒன்றும் சேர்த்து கட்டப்படுகிறது. இங்கு முஸ்லிம் அல்லாதவர்களும் தங்களின் சந்தேகங்களை போக்கிக் கொள்ளும் வகையில் மிக விரிவான ஏற்பாடுகள் செய்யப்பட்டுள்ளன.” என்கிறார் இப்பள்ளியின் நிர்வாகி அபுபக்கர்.

இதுவரை 30000க்கும் மேற்பட்ட இஸ்லாமிய குழந்தைகள் இங்கிருந்து கல்வி கற்று சென்றுள்ளனர். கலவரத்தில் பாதிக்கப்பட்ட குஜராத் குழந்தைகள், காஷ்மீர் குழந்தைகளுக்கு முக்கியத்துவம் கொடுக்கப்பட்டு அந்த மாணவர்கள் சிறந்த கல்வியை கற்று சென்றிருக்கிறார்கள். இன்றும் கற்று வருகிறார்கள்.

'இந்த பள்ளி இன்னும் இரண்டு வருடத்தில் பூர்த்தியாகும். ஐந்து வருடங்களில் மத்ரஸா, நூலகம்,கான்பரன்ஸ் ஹால் என்று அனைத்தும் இன்ஷா அல்லாஹ் கட்டி முடிக்கப்படும். இப்பள்ளியில் ஒரே நேரத்தில் 250000 பேர் தொழ முடியும். பசுமை கட்டிடமாக இருக்க அனைத்து முயற்சிகளும் எடுக்கப்படுகிறது. பள்ளியைச் சுற்றிலும் மரங்களும் செடிகளும் வைக்கப்பட்டு பரமரிக்கப்படுகின்றன. எட்டு ஏக்கரில் மொகல் பாரம்பரியத்தை விளக்கும் முகமாக மிகப் பெரும் தோட்டம் அமைக்கப்படுகிறது. இதன் மொத்த செலவின் மதிப்பீடு 40 கோடி' என்கிறார் இப்பள்ளியின் ஆர்க்கிடெக்சர் ரியாஸ் முகம்மது.

டிஸ்கி: இதெல்லாம் சரிதான். இவ்வளவு சிரமப்பட்டு திறக்கப் போகும் பள்ளியில் அமையவிருக்கும் மத்ரஸா பழைய மாடலில் இல்லாமல் தொழில் கல்வியும் அங்கு கற்று கொடுக்க ஏற்பாடு செய்ய வேண்டும். குர்ஆன், நபிமொழி, ஆங்கிலம், கணிணி, தொழிற்கல்வி, விளையாட்டு என்று அனைத்தும் ஒருங்கே அமையப் பெற்றதாக மத்ரஸா கல்வி அமைய வேண்டும்.

ஏனெனில் முகமது நபியோ, அவரது தோழர்களோ புரோகிதம் செய்து தங்களின் வருமானத்தை பெறவில்லை. அனைவருக்கும் பல தொழில்கள் இருந்தன. முகமது நபியிடம் நூறு ஆடுகள் இருந்தன. அவை குட்டி போடும்போது அதனை விற்று தனது செலவுகளை பார்த்துக் கொண்டதாக நாம் படிக்கிறோம். ஆட்டின் எண்ணிக்கை நூறை விட குறையாமல் பார்த்துக் கொள்வார்கள். எனவே மதரஸா மாணவர்கள் கல்வி கற்று வெளியேறும்போது உலக போட்டியை சமாளிக்கும் திறன் பெற்றவர்களாக இருக்க வேண்டும்.

மத்ரஸா கல்வி வெறும் குர்ஆனையும் சட்டதிட்டங்களை மட்டும் கற்றுக் கொடுப்பதால் அந்த மாணவர்கள் வருமானத்துக்கு புரோகிதத்தை வளர்க்க ஆரம்பித்து விடுகிறார்கள். அதை நியாயப்படுத்தவும் ரொம்பவும் மெனக்கிடுகிறார்கள். எனவே இனி வருங்கால இஸ்லாம் சிறப்புற வேண்டுமானால் கல்விக்கு இஸ்லாமிய சமுதாயம் முக்கியத்துவம் கொடுக்க வேண்டும். தற்போது மிகப் பெரும் மாற்றம் ஏற்பட்டு வருகிறது. இதில் தொய்வடையாமல் கல்வியின் அவசியத்தை நம் மக்களுக்கு எடுத்துச் செல்ல வேண்டியது நம்முன் உள்ள மிகப் பெரிய பணியாகும்.