ஒரு மனிதனின் விலை ஒன்பது லட்சம் இலங்கை ரூபாய்!

இலங்கையைச் சேர்ந்த புஷ்பவல்லி செல்லதுரை என்ற பெண் வீட்டு வேலைக்காக சவுதி வந்துள்ளார். வீட்டில் முதலாளியின் மனைவியோடு வாய்த் தகராறு வந்து அது முற்றி போய் அந்த சவுதி பெண் அடிக்க புஷ்பவல்லி இறந்து விடுகிறார். இந்த வழக்கு கோர்ட்டுக்கு சென்றது. சவுதி பெண் புஷ்பவல்லி குடும்பத்துக்கு 40000 ரியால் (சுமார் ஒன்பது லட்சம் ரூபாய் இலங்கை மதிப்பு) கொடுக்க வேண்டும் என்று தீர்ப்பு வந்துள்ளது. ஒரு மனிதன் மற்றொரு நபரை கொலை செய்து விட்டால் கொலையுண்ட நபரின் வருமானம் குடும்ப சூழலை கணக்கிட்டு 'இரத்த பணம்'(பிளட் மணி) கொலை செய்த நபரிடமிருந்து வசூலிக்கப்படும். கொலை செய்யப்பட்டவரின் வாரிசுகள் மன்னித்து விட்டால் கொலை செய்தவர் தண்டனையிலிருந்தும், இரத்தப் பணம் தருவதிலிருந்தும் விலக்களிக்கப் படுவார்.

இறந்தவரின் சகோதரி சரோஜா 'என் தங்கைக்கு நேர்ந்த கதி வேறு எந்த பெண்ணுக்கும் நேர வேண்டாம். இந்த பணம் அவரது குடும்பத்துக்கு ஓரளவு உதவியாக இருக்கும். அவரது இழப்பு எங்களுக்கு ஈடு செய்ய முடியாத இழப்பாகும்' என்கிறார்.

வீட்டு வேலைக்கு வரும் பெண்களில் பலர் வறுமை காரணமாக சில தவறுகளையும் செய்து விடுகின்றனர். ஒரு வீட்டில் தொடர்ந்து நகை காணாமல் போய் வந்தது. வீட்டு வேலை செய்யும் பங்காளி பெண்ணின் அறையை சோதனையிட்டபோது அனைத்து நகைகளையும் மறைத்து வைத்தது தெரிய வந்தது. அந்த பெண்ணும் அதை ஒத்துக் கொண்டார். போலீஸில் புகார் செய்யாமல் வீட்டினர் கண்டித்து விட்டு விட்டனர்.

இன்னும் சில பெண்கள் மொழி, கலாசாரம், மதம் அனைத்தும் வேறுபட்ட சூழலில் சவுதி வருபவர்கள் மன உளைச்சலுக்கு ஏற்பட்டு வீட்டு பெண்களோடு தகராறு செய்வது. சில நேரம் தற்கொலைக்கு முயற்ச்சிப்பது போன்றவையும் நடக்கிறது.

இன்னும் சில வீடுகளில் ஆண்களால் பாலியல் வக்கிரத்துக்கு வீட்டு வேலைக்கு வரும் பெண்கள் உள்ளாக்கப்படுகிறார்கள். சில வீடுகளில் காலை ஐந்து மணியிலிருந்து இரவு பத்து மணிவரை தொடர்ந்த வேலையும் இருக்கும். எனவே சவுதி வரும் சகோதரிகள் தங்களின் ஆண் சொந்தங்கள் குறிப்பிட்ட வீட்டில் டிரைவராகவோ வேறு வேலையிலோ இருந்தால் மட்டும் வீட்டு வேலைக்கு வரவும். உங்களுக்கு ஏதும் பிரச்னை என்றால் அவர்கள் மூலமாக போலீஸீக்கோ, கோர்ட்டுக்கோ போக ஏதுவாக இருக்கும். அப்படி ஒரு ஏற்பாடு இல்லாத பட்சத்தில் சொந்த நாட்டிலேயே ஏதாவது வேலை செய்து வருமானத்தைப் பார்க்க வேண்டும். இவர்களைப் போன்ற வறியவர்களுக்கு அரசு உதவிகளையும் செய்து வறுமையை நீக்க ஒத்துழைக்க வேண்டும்.

இன்னொரு வழக்கில் அபஹா என்ற ஊரில் தனது கணவனை கொலை செய்த மனைவிக்கும் தண்டனை அளிக்கப்பட்டது. இரத்த பணமாக 110000 (29300 டாலர்) இறந்தவரின் குடும்பத்துக்கு கொடுக்கப்பட்டது. இறந்தது சவுதி என்பதால் அவரது வருமானத்தை கணக்கிட்டு இந்த தொகையை நிர்ணயம் செய்திருப்பார்கள் என்று நினைக்கிறேன்.

'இறைவன் தடை செய்துள்ள எந்த உயிரையும் தக்க காரணமின்றி கொல்லமாட்டார்கள். விபசாரம் செய்ய மாட்டார்கள். இதைச் செய்பவன் வேதனையை சந்திப்பான்'

-குர்ஆன்: 25:68

18. 'அல்லாஹ்விற்கு இணையாக எதனையும் கருதுவதில்லை; திருடுவதில்லை; விபச்சாரம் செய்வதில்லை; உங்கள் குழந்தைகளைக் கொல்வதில்லை; நிகழ்காலத்திலும் வருங்காலத்திலும் (யார் மீதும்) அவதூறு கூறுவதில்லை; எந்த நல்ல காரியத்திலும் (எனக்கு) மாறு செய்வதில்லை என்று என்னிடம் ஒப்பந்தம் செய்யுங்கள். உங்களில், (அவற்றை) நிறைவேற்றுகிறவரின் நற்கூலி அல்லாஹ்விடம் உள்ளது. மேற்கூறப்பட்ட (குற்றங்களில்) எதையாவது ஒருவர் செய்து, (அதற்காக) இவ்வுலகில் தண்டிக்கப்பட்டால் அது அவருக்குப் பரிகாரமாகி விடும். மேற்கூறப்பட்டவற்றில் எதையாவது ஒருவர் செய்து, பின்னர் அல்லாஹ் அதனை (யாருக்கும் தெரியாமல்) மறைத்துவிட்டால் அவர் அல்லாஹ்வின் பொறுப்பில் இருக்கிறார். அவன் நாடினால் அவரை மன்னிப்பான்; அவன் நாடினால் அவரைத் தண்டிப்பான்' இவ்வாறு இறைத்தூதர்(ஸல்) அவர்கள் தம்மைச் சுற்றித் தோழர்களில் ஒரு குழு அமர்ந்திருக்கும்போது கூறினார்கள்.
Volume :1 Book :2

3475. ஆயிஷா(ரலி) அறிவித்தார்.
(மக்கா வெற்றியின் போது) மக்ஸூமீ குலத்துப் பெண் ஒருத்தி (ஃபாத்திமா பின்த் அல் அஸ்வத்) திருட்டுக் குற்றம் செய்திருந்தாள். அவள் விஷயமாக குறைஷிகள் மிகவும் கவலைக்குள்ளாயினர். 'அவள் விஷயமாக அல்லாஹ்வின் தூதரிடம் யார் பேசுவார்கள்?' என்று தமக்குள் பேசிக் கொண்டனர். அவர்களில் சிலர், 'அல்லாஹ்வின் தூதருடைய செல்லப் பிள்ளையான உஸாமா இப்னு ஸைத்(ரலி) அவர்களைத் தவிர இதற்கு யாருக்குத் துணிவு வரும்?' என்று கூறினர். (உஸாமா(ரலி) அவர்களிடம் பரிந்துரை செய்யும்படி அவர்கள் கேட்டுக் கொள்ள, அவ்வாறே) உஸாமா(ரலி) நபி(ஸல்) அவர்களிடம் (அவள் விஷயமாகப்) பேசினார்கள். அதற்கு இறைத்தூதர்(ஸல்) அவர்கள், 'அல்லாஹ்வின் தண்டனைகளில் ஒரு தண்டனையின் விஷயத்திலா (அதைத் தளர்த்தும்படி என்னிடம்) நீ பரிந்துரை செய்கிறாய்" என்று (கோபத்துடன்) கேட்டுவிட்டு, பிறகு எழுந்து நின்று உரை நிகழ்த்தினார்கள். பிறகு (அவ்வுரையில்), 'உங்களுக்கு முன்னிருந்தவர்கள், அழிக்கப்பட்டதெல்லாம் அவர்களில் உயர் குலத்தவன் திருடிவிட்டால் அவர்கள் அவனை (தண்டிக்காமல்)விட்டு வந்தார்கள்; அவர்களில் பலவீனமான (பிரிவைச் சேர்ந்த)வன் திருடிவிட்டால் அவனுக்கு தண்டனையளித்து வந்தார்கள் என்பதால் தான். அல்லாஹ்வின் மீதாணையாக! முஹம்மதின் மகள் ஃபாத்திமா திருடி விட்டிருந்தாலும் அவரின் கையையும் நான் துண்டித்திருப்பேன்" என்று கூறினார்கள்.
Volume :4 Book :60

3893. உபாதா இப்னு ஸாமித்(ரலி) அறிவித்தார்.
இறைத்தூதர்(ஸல்) அவர்களிடம் உறுதிமொழி கொடுத்த (மதீனாவின்) தலைவர்களில் நானும் ஒருவனாவேன். நாங்கள் அல்லாஹ்வுக்கு எதனையும் இணை கற்பிக்க மாட்டோம் என்றும், திருட மாட்டோம் என்றும், விபச்சாரம் புரிய மாட்டோம் என்றும், அல்லாஹ் புனிதப் படுத்தியுள்ள (மனித) உயிரை நியாயமின்றிக் கொல்லமாட்டோம் என்றும், நாங்கள் (பிறர் பொருளை) அபகரிக்க மாட்டோம் என்றும், இந்த வாக்குறுதிகளை நாங்கள் நிறைவேற்றினால் (எங்களுக்கு) சொர்க்கம் உண்டு என நாங்களாகத் தீர்ப்பளித்துக் கொள்ள மாட்டோம்; (இறைவனிடமே ஒப்படைத்து விடுவோம்) என்றும், இக்குற்றங்களில் எதையேனும் நாங்கள் செய்தால் அதன் தீர்ப்பு அல்லாஹ்விடமே உண்டு என்றும் நாங்கள் நபி(ஸல்) அவர்களிடம் உறுதிமொழி கொடுத்தோம்.
Volume :4 Book :63

இதன் காரணமாகவே, “நிச்சயமாக எவன் ஒருவன் கொலைக்குப் பதிலாகவோ அல்லது பூமியில் ஏற்படும் குழப்பத்தை(த் தடுப்பதற்காகவோ) அன்றி, மற்றொருவரைக் கொலை செய்கிறானோ அவன் மனிதர்கள் யாவரையுமே கொலை செய்தவன் போலாவான்; மேலும், எவரொருவர் ஓராத்மாவை வாழ வைக்கிறாரோ அவர் மக்கள் யாவரையும் வாழ வைப்பவரைப் போலாவார்” என்று இஸ்ராயீலின் சந்ததியினருக்கு விதித்தோம். மேலும், நிச்சயமாக நம் தூதர்கள் அவர்களிடம் தெளிவான அத்தாட்சிகளைக் கொண்டு வந்தார்கள்; இதன் பின்னரும் அவர்களில் பெரும்பாலோர் பூமியில் வரம்பு கடந்தவர்களாகவே இருக்கின்றனர்.

-குர்ஆன் 5:32

தவறாக அன்றி, ஒரு முஃமின் பிறிதொரு முஃமினை கொலை செய்வது ஆகுமானதல்ல; உங்களில் எவரேனும் ஒரு முஃமினை தவறாக கொலை செய்துவிட்டால், அதற்குப் பரிகாரமாக முஃமினான ஓர் அடிமையை விடுதலை செய்ய வேண்டும்; அவனுடைய குடும்பத்தாருக்கு நஷ்ட ஈடு கொடுக்க வேண்டும் - அவனுடைய குடும்பத்தார் (நஷ்ட ஈட்டுத் தொகையை மன்னித்து) அதை தர்மமாக விட்டாலொழிய; கொல்லப்பட்ட அவன் உங்கள் பகை இனத்தைச் சார்ந்தவனாக (ஆனால்) முஃமினாக இருந்தால், முஃமினான ஓர் அடிமையை விடுதலை செய்தால் போதும் (நஷ்ட ஈடில்லை; இறந்த) அவன் உங்களுடன் சமாதான (உடன்படிக்கை) செய்து கொண்ட வகுப்பாரைச் சேர்ந்தவனாக இருந்தால் அவன் சொந்தக்காரருக்கு நஷ்ட ஈடு கொடுப்பதுடன், முஃமினான ஓர் அடிமையை விடுதலை செய்யவும் வேண்டும்; இவ்வாறு (பரிகாரம்) செய்வதற்கு சக்தியில்லாதவனாக இருந்தால், அல்லாஹ்விடம் மன்னிப்புப் பெறுவதற்காகத் தொடர்ந்து இரண்டு மாதங்கள் நோன்பு வைக்க வேண்டும் - அல்லாஹ் நன்கு அறிந்தவனாகவும், பூரண ஞானமுடையவனாகவும் இருக்கிறான்.

- குர்ஆன் 4:92

அவர்களுக்கு நாம் அதில், “உயிருக்கு உயிர், கண்ணுக்கு கண், மூக்குக்கு மூக்கு, காதுக்கு காது, பல்லுக்குப் பல் ஆகவும்; காயங்களுக்கு(ச் சமமான காயங்களாகவும்) நிச்சயமாக பழி வாங்கப்படும் என்று விதித்திருந்தோம்;” எனினும் ஒருவர் (பழி வாங்குவதை) தர்மமாக விட்டுவிட்டால், அது அவருடைய பாவங்களுக்குப் பரிகாரமாகும்; எவர்கள் அல்லாஹ் இறக்கி வைத்த (வேதக் கடடளைப்)படி தீர்ப்பு வழங்கவில்லையோ நிச்சயமாக அவர்கள் அநியாயக் காரர்களே!

- குர்ஆன் 5:45