நெகிழ வைத்த இளைஞர் அம்மார்!

நெகிழ வைத்த இளைஞர் அம்மார்!



அமெரிக்கா, மேட்ஸன், டிசம்பர் 1986

பிறந்தவுடன் பல நோய்த் தாக்கங்களோடு இந்த உலகுக்கு வருகிறார் அம்மார். குழந்தையின் நிலையைக் கண்டு மனம் வருந்திய பெற்றோர் மேல் சிகிச்சைக்காக அமெரிக்காவுக்கு கொண்டு செல்கின்றனர். இது நடந்தது 1986 ஆம் ஆண்டு. மருத்துவ மனையில் குழந்தையை சேர்த்து விட்டு பரிசோதனையின் முடிவுக்காக பெற்றோர் வெளியில் காத்திருக்கின்றனர்.

டாக்டர்: உங்கள் குழந்தையின் நிலை ரொம்பவும் பரிதாபமாக உள்ளது. எலும்புகள் ஒன்றோடொன்று பிரிக்க முடியாத படி ஒட்டியுள்ளன. இந்த நோய் பாதிப்பால் கிட்னி பழுதடைந்துள்ளது. உடலின் அனைத்து எலும்புகளிலும் இந்நோய் பரவியுள்ளது. கண்கள், நாக்கு இந்த இரண்டைத் தவிர மற்ற பகுதிகளை நோய் தாக்கியுள்ளது.

குழந்தையின் தாய்: மருத்துவர் என்ன சொல்கிறார்?

குழந்தையின் தந்தை: ஒன்றுமில்லை. பிறகு சொல்கிறேன். எல்லாம் நல்லபடியாக முடியும்.

டாக்டர்: இதைச் சொல்வதற்கு எனக்கும் வருத்தமாகத்தான் உள்ளது. அதிகமாக போனால் இன்னும் இரண்டு வருடங்களில் உங்கள் குழந்தை இறந்து விடலாம். சாரி.....

குழந்தையின் தந்தை: ஓகே...டாக்டர். நான் வருகிறேன்.

குழந்தையின் தாய்: டாக்டர் என்ன சொன்னார்?

குழந்தையின் தந்தை: கொஞ்சம் வருத்தமான செய்திதான். இறைவன் செய்வது அனைத்தும் நன்மைக்காகவே இருக்கும். சரி வா போகலாம்.

-------------------------------

இனி நோயால் பாதிக்கப்பட்ட அம்மாரே பேச ஆரம்பிக்கிறார்.....

இறைவன் எனக்கு தந்த இந்த வாழ்வை மகிழ்வோடு ஏற்றுக் கொண்டுள்ளேன். 26 வருடங்கள் ஓடி விட்டது. ஒரு சராசரி மனிதன் எந்த அளவு சந்தோஷமாக இருப்பானோ அவ்வாறே இன்று வரை நான் இருக்கிறேன். நாம் நம்முடைய சவால்களை எதிர் கொள்ள பழகிக் கொள்ள வேண்டும். எதையும் நம்மால் செய்ய முடியும் என்ற உறுதி மாத்திரமே நமக்கு தேவை. என்னுடைய ஆரம்ப கால படிப்பு அமெரிக்காவில் கழிந்தது. பனிக் கட்டிகளோடும் புத்தகங்களோடு எனது உறவினர்களோடும் சந்தோஷமாக எனது வாழ்க்கை ஓடியது. எந்த ஒரு குறைபாடும் இல்லாமல் வழக்கமாக நான் பள்ளி சென்று வந்தேன். எனது தாத்தா இதற்காக மிகுந்த சிரமம் எடுத்துக் கொண்டார். இந்த ஏற்பாடுகளெல்லாம் என்னை மிகவும் மகிழ்ச்சிக்குள்ளாக்கியது.

நான் படித்த பள்ளியில் அனைத்து பாடங்களிலும் சிறந்த தேர்ச்சி பெற்றேன். 96 சதவீதம் மதிப்பெண்களை எடுத்து முதல் வகுப்பில் தேர்ச்சி பெற்றுள்ளேன். எனது கனவுகளை நனவாக்கி வைத்த அந்த இறைவனுக்கே புகழ் அனைத்தும். அதன் பிறகு இரண்டு வருடத்தில் குர்ஆனையும் மனனம் செய்தேன்.

மனிதர்கள் எல்லாரும் ஒன்று போல் இருந்து விடுவதில்லை. எனக்கும் சில அவமானங்கள் நிகழ்ந்தது. அதனை பிரச்னையாக்க விரும்பவில்லை. ஏனெனில் என்னுடைய இலக்கும் இன்னும் மேலே போக வேண்டும் என்பதில் குறியாக இருந்ததால் இது போன்ற மனிதர்களை உதாசீனப்படுத்தி விட்டேன். இன்று அதைவிட சிறந்த கல்லூரிகளில் படித்து தற்போது மேலும் சிறந்த சான்றிதழ்களை பெற்றுள்ளேன்.

இன்னும் சில விசித்திரமான கனவுகள் பல எனக்குள் உண்டு. எனது பழைய கனவுகள் பல இன்று நிறைவேறியுள்ளது. இது போல் மற்ற கனவுகளையும் இறைவனின் உதவியால் நனவாக்கிக் காட்டுவேன். எனக்கு வரும் அனைத்து சவால்களையும் என்னை படைத்தவனின் உதவியால் முறியடித்து வெற்றி பெறுவேன்.

நம் வாழ்க்கையானது சில நேரங்களில் திரைப்படங்களை விட விநோதமாக மாறி விடும். டாக்டர் எனக்கு கொடுத்த நேரமோ இரண்டு வருடங்கள்தான். ஆனால் என்னைப்படைத்த இறைவன் என்னை 26 வருடங்கள் சந்தோஷமாக வாழ வைத்துள்ளான். இனியும் வாழ வைப்பான்.

-----------------------------------------

இந்த இளைஞர் பலருக்கு வழிகாட்டியாக இருக்கிறார். இன்று நமது தமிழகத்தை எடுத்துக் கொண்டால் தற்கொலை செய்திகளை தினமும் படித்து வருகிறோம். மதிப்பெண் குறைவாக எடுத்து மனமுடைந்து மாணவி தற்கொலை: காதல் தோல்வியில் பெண் தற்கொலை: வயிற்று வலி தாங்க முடியாமல் ஆண் தற்கொலை: அப்பா திட்டியதால் மனமுடைந்து மகன் தற்கொலை: சினிமா கூத்தாடிக்கான பிறந்த நாளில் கையை கீரிக் கொண்ட ரசிகர்: கூத்தாடி நலமாக இருக்க மொட்டை போட்டுக் கொண்ட ரசிகன்::-)

இவை எல்லாம் நாம் நாள் தோறும் படித்து வருகிறோம். தற்கொலை செய்து கொள்ள அனைத்து காரணங்களும் இந்த இளைஞர் அம்மாருக்கு பொருந்தும். ஏனெனில் இவர் சாப்பிடுவதிலிருந்து கழிவறை செல்வதிலிருந்து படுக்கைக்கு செல்வது வரை மற்றவரின் உதவி தேவைப்படுகிறது. ஆனால் இந்த இளைஞர் என்றுமே தனது வாழ்நாளைப் பற்றிய துன்பத்தில் வீழ்ந்தது இல்லை. இவரது பெற்றோரும் 'இறைவன் செய்வது எல்லாம் நன்மைக்கே' என்ற எண்ணத்துக்கு வந்து விடுவதால் அவர்களும் மன நிம்மதியை அடைகிறார்கள்.

அம்மார் என்ற இந்த இளைஞரும் தனது குறைகளையே நிறைவாக்கி இன்று சிறந்த இடத்தைப் பிடித்துள்ளார். தனது இந்த நிலைக்காக தன்னை படைத்த இறைவனை நிந்திக்கவில்லை: கோபப்படவில்லை: மாறாக போற்றுகிறார். எல்லாப் புகழும் இறைவனுக்கே என்கிறார். இந்த மன உறுதியை கொடுத்தது எது? இவரது பெற்றோருக்கு இப்படி ஒரு மகன் கிடைத்தும் அவனை உதாசீனப்படுத்தாமல் இந்த அளவு முன்னுக்கு கொண்டு வர வழைத்தது எது?

உறுதியான இறை நம்பிக்கை. இந்த உலகம் மிக அற்பமானது. இந்த உலகில் நாம் பெற்றுக் கொள்ளும் சிரமத்திற்கு சிறந்த வெகுமதிகளை இறைவன் மறு உலகில் தருவான். பொறுமையைக் கொண்டு இறைவனிடம் நமது குறைகளை வைத்து விடுவோம் என்ற முடிவுக்கு வந்ததாலேயே இவர்களால் நிம்மதியாக இருக்க முடிகிறது. இறை நம்பிக்கையால் ஆன்மீக வாதிகள் பெரும் பல நன்மைகளில் இதுவும் ஒன்று.

'உங்களில் எவர் செயல்களால் மிகவும் அழகானவர் என்பதைச் சோதிப்பதற்காக அவன் மரணத்தையும் வாழ்க்கையையும் அமைத்தான்'
-குர்ஆன் 67:2

மனிதர்களில் அழகிய செயலுடையவர்கள் யார் என்று அவர்களைச் சோதிப்பதற்காக நிச்சயமாக பூமியில் உள்ளவற்றை அலங்காரமாக நாம் ஆக்கினோம்'
-குர்ஆன் 18:07

ஆம். அம்மாரைப் பொறுத்தவரை இந்த உலகத்தில் பிறந்தது முதல் இன்னும் இறக்கும் காலம் வரை மற்ற மனிதர்கள் அனுபவிக்கும் அனைத்து சுகங்களையும் பெற்றதில்லை. இதற்கு பரிசாக இறப்புக்குப் பிறகு நிரந்தர உலகமான மறுமை வாழ்வில் நம்மை படைத்த இறைவன் அனைத்து சுகங்களையும் அம்மாருக்கு தருவான். இது போன்ற நம்பிக்கை நம் ஒவ்வொரு மனிதனின் உள்ளத்திலும் வர வேண்டும் என்று பிரார்த்திக்கிறேன்.

-----------------------------------------------

அறிவியல் இன்னும் கடவுளை நிரூபிக்கவில்லையாதலால் என்னால் இறை நம்பிக்கையை பெற முடியவில்லை என்பவர்களுக்கு சகோதரர் ஜெயபாரதன் கொடுத்த விளக்கத்தையும் பார்ப்போம்..

மனிதன் பிறக்கும் போதே அவனது தலையில் “கணினித் தாய்மைப் பீடம் (Computer Mother Board), மூளை இயக்கி (CPU -Central Processing Unit) நினைவுத் தகுதி (Memory Capacity), இயக்க ஏற்பாடு (Operating System Like Windows XP, Vista or Window : 7) என்ன வென்று இயற்கை அல்லது ஊழ் விதி தேர்ந்தெடுத்துப் பதிவாக்கி விடுகிறது என்பது என் கருத்து. பிறந்த பிறகு மனிதன் அவற்றை ஓரளவு மேம்பாடு (Upgrade) செய்து கொள்ள அவனுக்குத் திறமை அளிக்கப் பட்டிருக்கிறது. ஆனால் மனிதனால் தனக்குப் பிறவியிலேயே இடப்பட்டுள்ள தாய்மைப் பீடம், மூளை இயக்கி, நினைவுக் களஞ்சியத்தைப் (Mother Board, CPU, Memory Units) பின்னால் அவனாலோ அல்லது எவனாலோ மாற்ற இயலாது ! இயக்க ஏற்பாடு (Operating System) மாறலாம் ! ஆதலால் மனிதன் ஊழ் விதியின் கைப்பிள்ளைதான் ! ஊழ்விதியின் தீராத ஒரு விளையாட்டுப் பிள்ளைதான்.
கடவுளை அதன் படைப்புகளில் ஒன்றான மனிதன் தனது கண்ணால் காண முடியாது.
எப்படி அதை விளக்குவது ?

வயிற்றில் தொப்புள் கொடியுடன் பின்னி வளரும் குட்டி யானை தன் தாயைக் காண முடியாது. வயிற்றிலிருந்து வெளிவந்த பின்னே குட்டி தாய் யானையைக் காண்கிறது. ஆதலால் பிரபஞ்சத்தில் அடைபட்டுப் போன மனிதன் இயற்கையின் தொப்புள் கொடி இணைப்பில் வாழ்கிறான்; மாள்கிறான்.

அதுபோல் மனிதன் பிரபஞ்சப் படைப்பாளியைக் காண வேண்டு மென்றால் இயற்கையின் தொப்புள் கொடி அறுத்து பிரபஞ்சத்தை விட்டு வெளியேற வேண்டும்.
கடவுளைப் பற்றிச் சொல்லவேண்டுமானால் அதன் படைப்புகள் மூலந்தான் நாம் விளக்க முடியும்.

1. தெரிந்தவற்றை வைத்து தெரியாதவற்றை விளக்குவோம்.
2. தெரியாவற்றை யூகித்து தெரிந்தவற்றை மேம்படுத்து வோம்.

இருவேறு உலகத்து இயற்கை; திருவேறு
தெள்ளியர் ஆதலும் வேறு.

இருவேறு உலகம் என்பவை ஆன்மீக உலகம், உலோகாயுத உலகம். சித்தாந்த ஞான உலகத்தின் இயற்கை விதிகள் வேறு. பௌதீக-ரசாயன உலகத்தின் இயற்கை நியதிகள் வேறு. திரு என்பது உலோகாயுதச் சொத்துக்கள். தெள்ளியர் என்பது ஆன்மீக ஞானிகள்.
உயிர் என்பது என்ன, உயிரினத்தை இயக்கும் ஆத்மா என்பது என்ன வென்று விஞ்ஞானம் இதுவரை விளக்க முடிய வில்லை. உயிர் என்பது எவ்வித இரசாயன மூலக்கூறுகளாலும் ஆக்கப்பட்ட தில்லை என்பது என் கருத்து. ஆத்மா ஓர் இயக்க சக்தி. ஆத்மா எந்த வாகனத்தில் (Car, Rail, Ship, Plane, Rocket or Man, Woman or Animals) நுழைகிறதோ அந்த வாகனத்தின் சாதனங்கள் ஆத்மாவின் இயக்க முறைக்கு வரையறையும், எல்லையும் வகுக்கிறது.

ஊர்ந்து செல்லும் இலைப்புழு ஏன், எப்படிப் பறந்து செல்லும் பட்டாம்பூச்சியாய் மாறிச் செல்கிறது ? வகுத்தான் வகுத்த விதி முறைப்படி நிகழும் ஒரு காட்சி இது. இப்படி செய்வது எது ? இது ஏன் நேர்கிறது ? இதுபோல் முட்டைக்குள் உருவாகும் குஞ்சுக்கு உயிர் எப்படி நுழைகிறது ? சிசு பிறக்கும் போது தாய்க் கருவில் உயிர் அதற்கு எப்படி நுழைகிறது ? மனிதன் இறந்த பிறகு போது உயிர் எங்கே போகிறது ?

300 பேர் அமர்ந்து பறக்கும் ஆயிரக் கணக்கான ஜெட் விமானங்களைப் படைத்த மனிதனால் ஒரு பட்டுப் பூச்சியை, மினிமினியை உண்டாக்க முடியுமா ?

மனிதனால் பூமியின் ஈர்ப்புச் சக்தியைக் காணமுடியுமா ?

குரங்கிலிருந்து மனிதன் பிறந்தான் என்பது மெய்யானால், ஏனிப்போது அப்படிப் பிறப்ப தில்லை ? நிகழ்வதில்லை ? மனிதக் குரங்கு எப்படி ஆறறிவு படைத்த மனிதப் பிறவியாய் மாறியது ?

நம் கண்முன் ஊர்ந்திடும் இலைப்புழு பறந்திடும் பட்டாம் பூச்சியாய் ஏன், எப்படி மாறுகிறது ?
இந்த வினாக்களுக்கு விடை எவருக்கும் தெரியாமல் இவை இன்னும் மர்மமாகவும் புதிராகவும் இருந்து வருகின்றன.

'அவனைக் கண்கள் பார்க்காது. அவனோ கண்களைப் பார்க்கிறான். அவன் நுட்பமானவன்: நன்கறிந்தவன்'
-குர்ஆன் 6:103

ஸ்வேதாஸ்வதாரா உபனிஷத் அதிகாரம் 4 : 20
'நா சம்த்ரஸே திஸ்தாதி ரூபம் அஸ்யாஇ நா சக்சுஸா பாஸ்யாதி காஸ் கனைனாம்'
'அவன் உருவத்தை யாரும் பார்க்க முடியாது. அவனது உருவை பார்க்கும் சக்தி எந்த கண்களுக்கும் இல்லை'
(The principal Upanishad by S.Radhakrishnan page 737)
(And in sacred books of the east volume 15, The Upanishad part 2, page 253)

மறு உலகில் நாம் இறைவனை சந்திக்கவுள்ளோம் என்பதை இறைவன் கூறும் போது:

'இறைவனை அஞ்சுங்கள். அவனைச் சந்திக்க உள்ளீர்கள் என்பதை அறிந்து கொள்ளுங்கள்.'
-குர்ஆன் 2:223