சவுதி கௌரவ பிச்சை எடுத்து பார்த்திருக்கிறீர்களா?

சவுதி அரசானது சில மாதங்களுக்கு முன்பு வேலையில்லா இளைஞர்கள் அனைவரும் தங்களின் அடையாள அட்டையை காட்டி 1500 ரியால் உதவி தொகை பெற்றுக் கொள்ளலாம் என்ற அறிவிப்பை விடுத்தது. அவர்களுக்கு நிரந்தர வேலை கிடைக்கும் வரை இந்த உதவித் தொகை கிடைத்துக் கொண்டிருக்கும். இதனால் பல இளைஞர்கள் பயனடைந்தனர். சவுதி நாட்டவருக்கு அரசு தரப்பிலேயே நிறைய வேலைகள் காத்துக் கொண்டிருக்கிறது. என்னதான் வாய்ப்புகள் இருந்தாலும் சிலருக்கு உழைக்காமல் சாப்பிட வேண்டும் என்ற குறிக்கோளில் வாழ்பவர்களை நாம் ஒன்றும் செய்ய இயலாது. சில சவுதி இளைஞர்கள் மக்களின் ஈகை குணத்தை எவ்வாறு தவறாக பயன்படுத்திக் கொள்கின்றனர் என்பதை இந்த காணொளி நமக்கு விளக்குகிறது.

இந்த இளைஞர் முதலில் தனது உடையை அழுக்காக்கிக் கொள்கிறார். அதன் பிறகு தொழுகைக்கு பள்ளிக்குச் செல்கிறார். தொழுகை முடிந்தவுடன் எழுந்து 'அஸ்ஸலாமு அலைக்கும்! எனது தகப்பனார் கிட்னி பெயிலரில் மருத்துவ மனையில் கிடக்கிறார். என்னிடம் போதிய பணம் இல்லை. உங்களால் முடிந்த உதவிகளை செய்யுங்கள்' அல்லது 'எனக்கு இருதய நோய் உள்ளது. என்னால் வேலை செய்ய முடியாது. உங்களால் இயன்ற உதவிகளை செய்வீர்களாக' இப்படி இடத்துக்கு தக்கவாறு இவர் கோரிக்கை வைத்து பள்ளியின் வாசலில் அமர்ந்து கொணடால் சில நிமிடங்களிலேயே ஓரளவு பணம் சேர்த்து விடலாம். இவ்வாறு இநத சவுதிக்கு அரை மணி நேரத்தில் கிடைத்த தொகை 165 ரியால். இவ்வாறு இவர் ஐந்து நேரமும் ஒவ்வொரு பள்ளியாக ஏறி இறங்கினால் ஒரு மாதத்துக்கு 25000 ரியாலை எந்த சிரமமுமின்றி சம்பாதித்து விடலாம். தற்போது சில இந்தியர்களும் பாகிஸ்தானியர்களும் கூட இவ்வாறு ஏதாவது காரணத்தை சொல்லி பள்ளிகளில் பிச்சை எடுப்பதை பார்க்கிறோம். இது அரசால் தடை செய்யப்பட்டது. பலரும் பரிதாபப் பட்டு அரசிடம் புகார் அளிப்பதில்லை.

இன்னும் ஒரு பிச்சை எடுக்கும் முறையானது சிக்னல்களில் ஆரம்பமாகிறது. ஒவ்வொரு சிக்னலிலும் நீங்கள் நின்று ஒரு ரியால் இரண்டு ரியாலாக சேமித்தால் ஒரு மணி நேரத்தில் 150 ரியாலை சம்பாதித்து விடலாம். இதையும் காணொளியில் பார்க்கலாம்.



மூன்றாவது முறையாக காட்டப்படுவது பெட்ரோல் நிரப்பும் இடங்களில். 'பெட்ரோல் தீர்ந்து விட்டது. பணம் எடுக்க மறந்து விட்டேன். உங்கள் செல் நம்பரை கொடுத்தால் பணத்தை அனுப்பி விடுகிறேன்.' என்று கௌரவமாக சொல்லி பணத்தை வாங்கும் முறையானது நூதனமாக தெரியும். இந்த முறையிலும் பிச்சை எடுப்பதை நாம் பரவலாக பார்க்கலாம். இவ்வாறு சிலர் பொய் சொல்லி பிச்சை எடுப்பதால் உண்மையிலேயே பாதிக்கப்படும் பலர் அல்லலுக்கு உள்ளாகின்றனர்.

இவ்வாறு சிறுக சிறுக பலருக்கும் நீங்கள் பிச்சை கொடுப்பதால் அவர்களை ஊக்ககுவிக்கிறீர்கள். எனவே அரசு சார்ந்த பல நிறுவனங்கள் முறையாக வசூலித்து பல வறிய நாடுகளுக்கும் உள் நாட்டிலேயே தேவையுடையவர்களுக்கும் அளிக்கிறது. அத்தகைய இடங்களை தேடிச் சென்று உங்களின் தர்மங்களை செலுத்துங்கள் என்று இந்த காணொளி சவுதி நாட்டவரை கேட்டுக் கொள்கிறது. இந்த காணொளி நம் நாட்டுக்கும் பொருந்தும்.

-------------------------------------------------------

பிச்சை எடுப்பதில்தான் எத்தனை ரகம். எத்தனை நடிப்பு. சிலர் பிச்சை எடுப்பதற்காக குழந்தைகளை ஊனமாகக் கூட ஆக்குகிறார்களாம். பாலா தனது 'நான் கடவுள்' படத்தில் மிக அழகாக இந்த காட்சிகளை தத்ரூபமாக எடுத்திருப்பார்.



-------------------------------------------------------

முந்தய அடிமைகள் இன்றும் பிச்சைத் தொழிலைத் தொடர்கிறார்களா?

முன்பு அடிமைகள் சவுதியில் கணக்கற்று இருந்தனர். இவர்களை சுதந்திரம் பெற்றவர்களாக மாற்றுவதற்கு இஸ்லாம் சொன்ன வழிமுறைகளைப் பார்ப்போம்.

• ஒருவர் அல்லாஹ்வின் மீது சத்தியம் செய்து விட்டு அதை முறித்தாலோ அல்லது நோன்பை முறித்தாலோ இது போன்ற குற்றங்களுக்குப் பரிகாரமாக வசதியுள்ளவர்கள் அடிமைகளை விடுதலை செய்ய வேண்டும் என்று இஸ்லாம் ஆணையிட்டது.
(பார்க்க திருக்குர்ஆன் 2:177, 4:92, 5:89, 9:60, 58:3, 90:13)

• ஒப்பந்த அடிப்படையில் அடிமைகள் விடுதலை யாவதற்கும் இஸ்லாம் ஏற்பாடு செய்தது. உன்னை நான் விடுதலை செய்கிறேன். நீ உழைத்து சிறிது சிறிதாக எனது கடனை அடைக்க வேண்டும் என்று எஜமானர்கள் அடிமைகளிடம் உடன்படிக்கை செய்து விடுக்க ஆர்வமூட்டினார்கள்.
(பார்க்க திருக்குர்ஆன் 24:33)

• யாரேனும் அடிமையை விடுதலை செய்தால் அந்த அடிமை பிற்காலத்தில் சம்பாதிப்பவைகளுக்கு அவனது எஜமான் வாரிசாவார் என்று சட்டம் கொண்டு வந்து அடிமைகளை விடுவிக்க இஸ்லாம் தூண்டியது.
(பார்க்க புகாரி 456, 1493, 2155, 2156, 2168, 2169, 2561, 2562, 2563, 2564, 2565, 2578, 2717, 2726, 2729, 2735, 5097, 5279, 5284, 5430, 6717, 6751, 6752, 6754, 6757, 6759)

இன்னும் சில இடங்களில் அரபுகளுக்கு கல்வி பயிற்றுக் கொடுத்தால் நீங்கள் அடிமை முறையிலிருந்து விடுபடலாம் என்ற ரீதியிலும் பல அடிமைகள் விடுவிக்கப்பட்டனர்.
இஸ்லாம் வந்த ஆரம்ப காலங்களில் அடிமை வியாபாரம் கொடி கட்டி பறந்தது. முகமது நபி தான் கொண்டு வந்த மார்க்கத்தின் மூலம் மேற்சொன்ன சட்டங்களை கடமையாக்கி அவரது வாழ்நாளிலேயே அடிமைகள் அற்ற சமூகத்தை உருவாக்கி விட்டு சென்றார். ஆனால் அன்று விடுதலையான இவர்களில் இன்னும் சிலர் பிச்சை எடுப்பதையே தங்கள் குறிக்கோளாக கொண்டுள்ளனர். அரசு இவர்களுக்காக பல திட்டங்களை போட்டாலும் இவர்கள் உழைக்க முற்படுவதில்லை. பலர் படித்து சிறந்த உத்தியோகத்தில் இருந்தாலும் இது போன்ற ஒரு சிலர்களால் ஆப்ரிக்க சமூகத்துக்கே சமூகத்தில் கெட்ட பெயர் ஏற்படுகிறது.



பொதுவாக பல மதங்களும் ஏழைகளுக்கு உதவுவதை வலியுறுத்துகின்றன. அதிலும் குறிப்பாக இஸ்லாத்தில் சற்று அதிகமாகவே வலியுறுத்தப்பட்டுள்ளது. நோன்பு தொழுகை போன்ற வணக்கங்களை உடல் நிலை சரியில்லாது யாராவது விட்டால் அதற்கு பரிகாரமாக ஏழைகளுக்கு உணவளிக்க சொல்லி இஸ்லாம் கட்டளையிடுகிறது. அதே போல் இஸ்லாத்தில் தடை செய்யப்பட்ட சில காரியங்களை சிலர் செய்து விட்டால் அதற்கு பரிகாரமாக 30 ஏழைகளுக்கு உணவளி: 40 ஏழைகளுக்கு உணவளி என்று இஸ்லாம் கட்டளையிடுகிறது. சில நேரங்களில் சவுதியில் சாப்பாடு கொடுக்க ஏழைகளை தேடிச் செல்வோரும் உண்டு.

வயது முதிர்ச்சி, கை கால்களில் ஊனம், சொந்தங்கள் கை விட்டு விடுதல் போன்ற காரணங்களால் பிச்சை எடுக்க சிலர் தொடங்கி விடுகின்றனர். இவர்களைப் பற்றி பிரச்னையில்லை.

ஆனால் நல்ல உடல் ஆரோக்கியம் உள்ள நபர்களும் இதை ஒரு தொழிலாக நடத்த ஆரம்பித்து விடுகின்றனர். தங்களின் இயலாமையை எடுத்துச் சொல்வதற்காக பல பொய்களையும் இவர்கள் சொல்லத் தயங்குவதில்லை. இதனால் உண்மையாக பிச்சை எடுக்கும் தகுதியுடையவர்களுக்கு சிரமத்தையும் கொடுக்கிறார்கள்.

நாம் பிச்சை போடும்போது ஒரு ரூபாய் ஐந்து ரூபாய் என்று 1000, 2000 என்று மாற்றி வைத்துக் கொண்டு வரிசையாக போட்டுக் கொண்டு செல்கிறோம்.

இப்படி செய்வதால் நாம் பிச்சைக்காரர்களை இன்னும் ஊக்குவிக்கிறோம். 100 பேருக்கு சில்லறைகளாக கொடுக்கும் பணத்தை ஒருவரை தேர்ந்தடுத்து கொடுத்தால் அவர் பிச்சை தொழிலை விடுவதற்கு வாய்ப்பாக அமையும். ஒரு தள்ளு வண்டியோ, ஒரு பிளாட்பார கடையோ அமைத்து கொடுத்து 'இனி பிச்சை எடுப்பதை நான் பார்த்தால் நான் கொடுத்த பணத்தை திரும்ப தந்துவிட வேண்டும்' என்ற உறுதி மொழியோடு தர வேண்டும். இப்படி செய்வதற்கு எல்லோரும் முன் வந்தால் வெகு சீக்கிரத்தில் பிச்சைக்காரர்களை ஒழித்து விடலாம். ஆனால் நம் அரசாங்கமோ மக்களுக்கு இலவசங்களை வாரி வழங்கி அவர்களை மேலும் சோம்பேறி ஆக்குகிறது. கொடுக்கும் இலவசங்களும் உரியவர்களை சேராமல் வட்டம் மாவட்டம் பாதியை சாப்பிட்டு மீதியை சம்பந்தப்பட்டவர்களிடம் சேர்ப்பிக்கும் அவலத்தையும் பார்த்து வருகிறோம்.

மனிதனுக்கு சுயமரியாதை அவசியம். சுயமரியாதையை விற்று இப்படி தகுதியில்லாதவர்கள் பிச்சை எடுப்பவர்களை இஸ்லாமும் தடுக்கிறது. பிச்சை எடுத்தல் சம்பந்தமாக இஸ்லாம் என்ன சொல்கிறது என்பதனை பின் வரும் நபிமொழிகளில் பார்ப்போம்.


"ஒரு கவளம் உணவுக்காக, அல்லது ஓரிரு பேரீச்சம் பழங்களுக்காக மக்களிடம் அலைபவன் ஏழையல்லன்; ஏழை யாரெனில் அவன் தன் தேவையைப் பூர்த்தி செய்து கொள்ள எச்செல்வத்தையும் பெற்றிருக்க மாட்டான்; பிறரும் அவனுடைய நிலையை அறிந்து தர்மம் செய்ய மாட்டார்கள், தானும் வலியச் சென்று கேட்கமாட்டான்." (இத்தகையவனே உண்மையான ஏழையாவான்) (புஹாரி-1479)

இறைத்தூதர் நபி(ஸல்) அவர்கள், மிம்பர் (வெள்ளிக்கிழமை ஜும்மா அன்று சொற்பொழிவு மேடை) மீதேறி, தர்மம், சுயமரியாதை, யாசகம் ஆகியவற்றைப் பற்றி உபதேசம் செய்துவிட்டு, ‘உயர்ந்த கை தாழ்ந்த கையை விடச் சிறந்ததாகும்; உயர்ந்த கை என்பது தர்மம் செய்யக்கூடியதும்; தாழ்ந்த கை என்பது யாசிக்கக் கூடியதும்” என்றும் கூறினார்கள். (புஹாரி-1429)

இறைத்தூதர்(ஸல்) அவர்கள் கூறினார்கள் : "என் உயிர் யாருடைய கைவசம் இருக்கிறதோ அவன் மீது ஆணையாக! உங்களில் ஒருவர் தம் கயிற்றை எடுத்துக் கொண்டு விறகு வெட்டி (கட்டி) அதைத் தம் முதுகில் சுமந்து (விற்று)சம்பாதிப்பது, ஒருவனிடம் வந்து யாசிப்பதை விடச் சிறந்ததாகும். அவன் யாசிப்பவருக்கு கொடுக்கவும் செய்யலாம்; மறுக்கவும் செய்யலாம்." (புஹாரி-1470)

ஹகீம் இப்னு ஹிஸாம்(ரலி) அறிவித்தார். நான், நபி(ஸல்) அவர்களிடம் (பொருளுதவி) கேட்டேன். அவர்கள் எனக்கு வழங்கினார்கள்; மீண்டும் கேட்டேன் வழங்கினார்கள். மீண்டும் கேட்டேன்; வழங்கிவிட்டு, "ஹகீமே! நிச்சயமாக இச்செல்வம் பசுமையானதும் இனிமையானதுமாகும். இதைப் போதுமென்ற உள்ளத்துடன் எடுத்துக் கொள்கிறவருக்கு இதில் அபிவிருத்தி ஏற்படுத்தப்படும்; இதைப் பேராசையுடன் எடுத்துக் கொள்கிறவருக்கு அதில் அபிவிருத்தி ஏற்படுத்தப்படாது. அவன் உண்ட பின்பும் வயிறு நிரம்பாதவன் போலாவான். உயர்ந்த கை தாழ்ந்த கையைவிடச் சிறந்தது" எனக் கூறினார்கள்.

நான், இறைத்தூதர் அவர்களே! உங்களைச் சத்தியத்துடன் அனுப்பி வைத்தவன் மீது ஆணையாக! உங்களுக்குப் பின் உலகைப் பிரியும் வரை வேறு யாரிடமும் நான் எதையும் கேட்க மாட்டேன் எனக் கூறினேன்.

அபுபக்கர்(ரலி) (ஆட்சிக் காலத்தில்) ஸகாத் பெறுமாறு ஹகீமை அழைத்தார். அவர் அதை ஏற்றுக் கொள்ள மறுத்துவிட்டார். பிறகு உமர்(ரலி) (தம் ஆட்சியில்) ஸகாத் பெறுமாறு அவரை அழைத்தார். அவர் எதையும் ஏற்க மறுத்தார். அப்போது உமர்(ரலி), ‘முஸ்லிம் சமுதாயமே! தம் உரிமையைப்பெறுமாறு நான் ஹகீமை அழைக்கிறேன். அவரோ அதைப் பெற மறுக்கிறார். இதற்கு நீங்கள் சாட்சி!’ எனக் கூறினார். ஹகீம் நபி(ஸல்) அவர்களுக்குப் பின் வேறு யாரிடமும் தாம் மரணிக்கும் வரை எதையும் கேட்கவேயில்லை என ஸயீத் இப்னு அல் முஸய்யப் கூறுகிறார். (புஹாரி-1472)

இறைத்தூதர்(ஸல்) அவர்கள் கூறினார்கள் "தேவைக்கு அதிகமாக மக்களிடம் யாசிப்பவன் தன் முகத்தில் சிறிதளவுகூடச் சதை இல்லாதவனாக மறுமை நாளில் வருவான்…" (புஹாரி-1474)

சிலர் நபி(ஸல்) அவர்களிடம் யாசித்தார்கள். நபி(ஸல்) அவர்களும் அவர்களுக்குக் கொடுத்தார்கள். பிறகும் நபியவர்களிடம் அவர்கள் கேட்டார்கள். அப்போதும் அவர்களுக்குக் கொடுத்தார்கள். பிறகும் அவர்கள் கேட்க, நபி(ஸல்) அவர்கள் மீண்டும் அவர்களுக்குக் கொடுத்தார்கள். இவ்வாறு நபி(ஸல்) அவர்களிடம் இருந்தது அனைத்தும் தீர்ந்து போன பின் "என்னிடமுள்ள செல்வதை நான் உங்களுக்குத் தராமல் பதுக்கி வைக்கவே மாட்டேன். ஆயினும் யார் சுயமரியாதையைப் பேணிக் கொள்கிறானோ அவனை அல்லாஹ் சுயமரியாதையோடு வாழச் செய்வான்; யார் பிறரிடம் தேவையற்றவனாக இருக்கிறானோ அல்லாஹ் அவனைத் தேவையற்றவனாக ஆக்குகிறான். யார் பொறுமையை மேற்கொள்ள முயற்சி செய்கிறானோ அவனை அல்லாஹ் பொறுமையாளனாக ஆக்குவான்; மேலும், பொறுமையை விடச்சிறந்த, விசாலமான அருட்கொடை எவருக்கும் கொடுக்கப்படுவதில்லை" என்றார்கள். (புஹாரி-1469)

எனவே இந்த நபி மொழிகள் எல்லாம் பொய் சொல்லி பிச்சை எடுப்பது எவ்வளவு பாவம் என்பதை உணர்த்துகிறது. உழைத்து சம்பாதிப்பதையே இஸ்லாம் வலியுறுத்துகிறது. அப்படிப்பட்ட நன் மக்களாக உங்களையும் என்னையும் இறைவன் ஆக்கி அருள் புரிவானாக!


ஏழை வரி என்ற இந்த ஜகாத்தைப் பற்றி சகோதரி ஹூசைனம்மா ஒரு அழகிய பதிவை சில நாட்களுக்கு முன்பு இடுகையாக்கியிருந்தார். மேலதிக விபரத்துக்கு இதனையும் பாருங்கள். வறுமையை ஒழிக்க என்ன அழகிய ஒரு திட்டம் என்பது நமக்கு விளங்கும்.

-------------------------------------------------------------------

மனக்குழப்பத்திற்கு மகத்தான தீர்வு - 16