ராசிபுரம் மக்களும் தின மலரும்!

ராசிபுரம்: மத நல்லிணக்கத்துக்கு எடுத்துக்காட்டாக, 100 ஆண்டுகளுக்கு மேல் தொடர்ந்து வரும் இந்து, முஸ்லிம் சந்தன பூச்சு நிகழ்ச்சி, குருசாமிபாளையத்தில் கோலாகலமாக நடந்தது.

நாமக்கல் மாவட்டம் ராசிபுரம் அடுத்த குருசாமிபாளையம், சிவசுப்ரமணியர் கோவிலில், பங்குனி உத்திர தேர்த்திருவிழா கடந்த 10ம் தேதி கிராம சாந்தியுடன் துவங்கியது. 11ம் தேதி கொடியேற்றம் நிகழ்ச்சி நடந்தது. ஸ்வாமிக்கு தினமும் அபிஷேக ஆராதனையும், ஸ்வாமி திருவீதி உலா வந்து பக்தர்களுக்கு அருள்பாலித்தார். கடந்த, 19ம் தேதி ஸ்வாமிக்கு திருக்கல்யாணமும், திருத்தேருக்கு எழுந்தருளும் நிகழ்ச்சியும் நடந்தது. தொடர்ந்து, பக்தர்கள் வடம் பிடித்து இழுத்து, முக்கிய வீதி வழியாக பக்தர்களுக்கு அருள்பாலித்தார். நேற்று, மஞ்சள் நீராட்டு விழா நடந்தது. தொடர்ந்து, தொன்று தொட்டு நடந்து வரும் இந்து, முஸ்லிம் சந்தனம் பூசும் நிகழ்ச்சி நடந்தது. குருசாமிபாளையத்தில், கைத்தறி நெசவு முக்கிய தொழிலாக விளங்குகிறது. அப்பகுதியில், கைத்தறிக்கு அச்சு கட்டி கொடுக்கும் தொழிலை முஸ்லிம் மதத்தை சேர்ந்தவர்கள் செய்து வந்தனர். கடந்த, 100 ஆண்டுகளுக்கு முன் பிளேக் நோயால் இவ்வூர் மக்கள் பாதிக்கப்பட்டனர்.

இந்நிலையில், முஸ்லிம் மதத்தினர் சிலர் ஊருக்கு பொதுவான இடத்தில் சென்டா மரம் என்று அழைக்கப்படும் புளியமரத்தின் கீழ், நோயால் பாதிக்கப்பட்டவர்களுக்கு "பாத்தியா ஓதி' பொட்டுக் கடலையும், நாட்டு சர்க்கரையும் வழங்கினர். அதை தொடர்ந்து நோய் குணமானதாக கூறப்படுகிறது. இந்த முறை தொடர்ந்து பின்பற்றப்படுகிறது. மேலும், மத நல்லிணக்கத்துக்கு எடுத்துக் காட்டாகவும், முஸ்லிம் மதத்தினருக்கு மரியாதை செய்யப்பட்டது. பங்குனி உத்திரத் தேர்த்திருவிழாவுக்கு ஒரு வாரத்திற்கு முன், ஊர் பெரிய தனக்காரர் கேசவமூர்த்தி தலைமையில், ராசிபுரம் அச்சு கட்டித்தெரு கிழக்கு பள்ளி வாசலுக்கு, தேங்காய் பழத்தட்டுடன் சென்று விழாவுக்கு அழைப்பர். முஸ்லிம் மதத்தினரும் விழாவில் பங்கேற்று, வீடு தோறும் சந்தனம் பூசுவார்கள். அந்நிகழ்ச்சி நேற்று நடந்தது,

சிவசுப்ரமணியர் கோவிலில் இருந்து கிழக்கு தெரு பள்ளி வாசல் நிர்வாகி ஹனிபா தலைமையில், அப்துல் அஜிஸ், கவுன்சிலர் காதர்பாஷா உள்ளிட்டவர்கள், குருசாமிபாளையம் வந்தனர். சிவசுப்ரமணியர் கோவிலில் இருந்து, வெள்ளைக்கொடி ஏந்திச் சென்று வீடுகள் தோறும் சுவர்களில் சந்தனத்தை பூசினர். தொடர்ந்து, பாவடி மைதானத்தில் உள்ள சென்டா மரத்தில் (புளிய மரம்) வெள்ளைக் கொடி ஏற்றினர். அப்போது ஊர் பெரியதனக்காரர் கேசவமூர்த்தி கைகளில், பள்ளி வாசல் ஹனிபா சந்தனம் பூசினார். அவருக்கு கேசவமூர்த்தி சந்தனம் பூசினார். ஒருவருக்கு ஒருவர் மாலைகள் மாற்றி கொண்டனர். தொடர்ந்து "பாத்தியா ஓதி' முஸ்லிம்கள் நாட்டு சர்க்கரையும், பொட்டுக் கடலையும் வழங்கினர். நிகழ்ச்சியில், முஸ்லிம் மதத்தினர், நெசவாளர்கள் உள்பட பலர் பங்கேற்றனர். இது, 100 ஆண்டுகளுக்கும் மேலாக தொடர்ந்து நடந்து வருவதால், உலக அமைதி, மத நல்லிணக்கத்துக்கு எடுத்துக்காட்டாக விளங்குகிறது என, அப்பகுதி மக்கள் தெரிவித்தனர்.

-நன்றி தின மலர்.

//தவ்ஹீத் காரர்கள் கவனிக்கவும். இந்து முஸ்லீம் ஒற்றுமையை யாராலும் கெடுக்க முடியாது! பாத்தியா இருவரையும் ஒன்று சேர்த்து வைக்கட்டும்!...//- -இந்த இடுகைக்கு தினமலரில் வந்த பின்னூட்டம்.

திரு ஆருர் ரங்!

இந்து முஸ்லிம் ஒற்றுமைக்கு ஏதோ தவ்ஹீத் வாதிகள் எதிரி போல பின்னூட்டம் அளித்திருக்கிறீர்கள்.

ஒரு மதத்தின் அடையாளங்களை மற்ற மதத்தினர் பின்பற்றுவதுதான் மத நல்லிணக்கத்துக்கு அடையாளம் என்பது ஏற்றுக் கொள்ள முடியாத ஒன்று. கடவுள் மறுப்பில் இருக்கும் நமது முதல்வர் ஒவ்வொரு ரமலானிலும் நோன்பு கஞ்சி குடிப்பது முஸ்லிமகளின் ஓட்டுக்களை குறி வைத்துதானே ஒழிய இஸ்லாமிய மார்க்கத்தில் ஏற்பட்ட பற்றினால் அல்ல. அது போல்தான் ஜெயலலிதா தர்ஹாக்களுக்கு சென்று வணங்குவதும்.

"எவர் (முஸ்லிமல்லாத) உடன்படிக்கை செய்து கொண்டிருக்கின்ற ஒருவருக்கு அநீதியிழைக்கின்றாரோ அல்லது அவரின் உரிமையை குறைக்கின்றாரோ அலலது அவரது சக்திக்கு மேல் அவருக்கு பொறுப்புக்களை சுமத்துகின்றாரோ அல்லது அவரின் மனவிருப்பின்றி அவரிடம் இருந்து ஏதேனுமொன்றை பெறுகின்றாரோ அவருக்கு எதிராக மறுமையில் நான் வாதிடுபவனாக இருப்பேன்". (ஆதாரம்: அபூதாவூத்)

• "எவர் உடன்படிக்கை செய்து வாழும் ஒரு முஸ்லிமல்லாத ஒருவரைக் கொலை செய்கிறாரோ அவர் சுவனத்தின் வாடையைக் கூட நுகரமாட்டார்". (ஆதாரம்: ஸஹீஹுல் புகாரி)

• "எவர் முஸ்லிமல்லாத சிறுபான்மை இனத்தைச் சேர்ந்த ஒருவரை இம்சிக்கின்றாரோ நான் அவரது எதிரியாவேன். நான் எவரது எதிரியாக இருக்கின்றேனோ மறுமையில் அவருக்கெதிராக வாதிடுபவனாக இருப்பேன்". (ஆதாரம்: தாரீகு பக்தாத் – அல்கதீபுல் பக்தாதி)

இங்கு நான் குறிப்பிட்டுள்ள முகமது நபியின் வார்த்தைகள் மாற்று மதத்தவருக்கு அதுவும் சிறுபான்மையினருக்கு எந்த அளவு உரிமைகள் கொடுக்கச் சொல்கிறது என்பது விளங்கும். அடுத்து இஸ்லாத்தில் உள்ள தவறான புரிதல்களை இந்துக்கள் உணர வேண்டும் என்பதற்காகவே 'இஸ்லாம் ஓர் இனிய மார்க்கம்' என்ற நிகழ்ச்சியை ஒவ்வொரு ஊரிலும் தவ்ஹீத் ஜமாத் நடத்தி வருவதை நீங்களும் அறிவீர்கள்.

மேலும் இஸ்லாத்தையும் இந்து மதத்தையும் உளப்பூர்வமாக பின் பற்றக் கூடிய எந்த நபரும் கலவரங்களில் ஈடுபட மாட்டார்கள். இது போன்ற கலவரங்கள் நடப்பது மதங்களில் உள்ள ஒரு சில சுயநலக்காரர்களால் திட்டம் போட்டு நடத்தப்படுவது. இதை இரு மதத்தவரும் தற்போது நன்கு உணர்ந்து வருகின்றனர்.

எனவே ஒரு மதத்தவர் மற்றொரு மதத்தவரின் சமய சடங்குகளை செய்வதுதான் மத நல்லிணக்கத்துக்கு அடையாளம் என்பது தவறான புரிதல். அப்படி செய்வது சம்பந்தப்பட்டவரை ஏமாற்றுவதாகத்தான் அர்த்தம். எந்த ஒரு இதயத்திலும் இரண்டு மூன்று கொள்கைகள் இருக்க முடியாது.

அவரவர் மதக் கோட்பாடுகளை அவரவர் பின்பற்றுவோம். பொரி கடலை பாத்திஹா போன்று இஸ்லாமியர் செய்யும் மூடப்பழக்கங்களையும் எதிர்ப்போம். புளிய மரத்துக் கீழ் நின்று கொண்டு பாத்திஹா ஓதி பொரி கடலை கொடுப்பதாலெல்லாம் நோய் நீங்காது. நோய்களை கொடுப்பதும் அதற்கு நிவாரணம் அளிப்பதும் இறைவன் புரத்திலிருந்து வருவதாகத்தான் இஸ்லாமிய நம்பிக்கை. இந்து நண்பர்களோடு சகோதர பாசத்தோடு என்றும் போல் பழகுவோம். அனைவரும் சேர்ந்து நமது இந்தியாவை முன்னேற்றப் பாதையில் கொண்டு செல்வோம்.

-இது தினமலர் வாசகர் கடிதத்துக்கு நான் அனுப்பிய பின்னூட்டம். தினமலர் எனது கருத்தை வெளியிடாது என்றுதான் நினைத்தேன். ஆச்சரியமாக மறுநாளே வெளியிட்டு விட்டது. சில நேரங்களில் நியாயமாகவும் நடந்து கொள்ளும் தினமலர் எனபதற்கு இரு ஒரு எடுத்துக்காட்டு.

'எம்மதமும் சமம்மதம்', 'எல்லோரும் எல்லா கடவுளையும் வணங்க வேண்டும்' என்பது ஏதோ ஒரு சிறந்த கொள்கை என்பதுபோல் பரப்பப்படுகிறது. ஒரு மதத்தின் தனித்தனமையும் அதன் கொளகைகளும் வீழ்வதற்கு இது தான் முதல்படி. ஏனெனில் நமது முன்னோர்கள் 'ஒன்றே குலம் ஒருவனே தேவன்' என்ற கொள்கையில் இருந்தவர்கள்தான். கலாசார படை எடுப்பு நிகழ அந்த மதம் இந்த மதம் என்று எல்லாவற்றையும் ஒன்றாக குழப்பியதால்தான் இந்து மதம் அதன் உண்மை முகத்தை இழந்து நிற்கிறது. ரிக்,யஜூர்,சாம,அதர்வண வேதங்களை நீங்கள் படித்தால் தற்போதுள்ள இந்து மத கொள்கைகளுக்கும், இந்த வேதங்களுக்கும் எந்த சம்பந்தமும் இல்லை என்பதை தெரிந்து கொள்ளலாம்.

இதே நிலைதான் கிறித்தவ மதத்துக்கும். தாழ்த்தப்பட்ட மக்கள் கிறித்தவ மதத்துக்கு மாறினாலும் அங்கும் இதே தீண்டாமைப் பேய் வந்து ஆட்டுவதற்கு காரணம் பல மத சடங்குகளையும் உள்வாங்கிக் கொண்டதுதான்.

இந்து மதம் தழைப்பதற்காக விவேகானந்தர் பாடுபட்டார். சமீபகாலங்களில் கிருபானந்த வாரியார், குன்றக்குடி அடிகளார், மறைந்த காஞ்சிப் பெரியவர் போன்றோரையும் இந்து மதம் தழைக்க பாடுபட்டவர்களில் குறிப்பிட்டு சொல்லலாம். இவர்களால் ஆன்மீகம் வளரும். நாமும் வரவேற்போம்.

அதே நேரம் 'இதே இந்து மதம் வளர நாங்களும் பாடுபடுகிறோம்' என்று கூறும் அத்வானி, மோடி, ராமகோபாலன் போன்றோர்களையும் இங்கு நினைத்து பார்க்கிறோம். இவர்களின் உண்மையான எண்ணம் இந்து மதத்தின் வளர்ச்சி கிடையாது. இந்து மதத்தை சீர்திருத்துவதற்கு பதில் 'இஸ்லாமியர்கள் இந்திய கலாசாரத்தை ஏற்றுக் கொண்டால்: எங்களுக்கும் அவர்களுக்கும் எந்த பிரச்னையும் இல்லை' என்பதுதான் அவர்கள் வைக்கும் வாதம். 'நீ முஸ்லிமாகவே இருந்து கொள்: பெயரையும் அரபியில் வைத்துக் கொள்: அல்லாவை கும்பிடும்போது அதோடு சேர்த்து முருகனையும், வெங்கடாஜலபதியையும் இன்ன பிற கடவுளையும் கும்பிட வேண்டும். வர்ணாசிரம கொள்கையையும் ஏற்றுக் கொள்ள வேண்டும்.' என்கின்றனர் இந்துத்துவவாதிகள். இதைத்தான் தினமலரும் நாசூக்காக சொல்கிறது.

நான் முன்பே குறிப்பிட்டது போல் எந்த ஒரு உண்மையான இறை பக்தனும் மற்றொரு இறை பக்தனை நிந்திக்கவோ சிரமம் தரவோ விரும்ப மாட்டான். எந்த ஒரு மதமும் அப்படி ஒரு கொள்கையை கொண்டிருக்கவில்லை. இன்று ஓரளவு குர்ஆன் ஹதீஸின் படி தங்களது வாழ்வை அமைத்துக் கொண்டிருக்கும் 'தவ்ஹீத் ஜமாத்' என்ற இஸ்லாமிய அமைப்பு மனித நேய பணிகளில் சிறந்து விளங்குவதைப் பார்க்கிறோம். தமிழகத்திலேயே ரத்ததானம் வழங்குவதில் பல ஆண்டுகளாக முன்னணியில் உள்ளது இந்த அமைப்பு. இதனால் பலன் பெறுவது பெரும்பான்மையான இந்து சகோதரர்கள்தான். அதேபோல் சுனாமி,புயல்,வெள்ளம் என்று எந்த பேரிடர் வந்தாலும் முதலில் ஓடி வந்து சாதி மதம் பார்க்காமல் உதவி செய்வதும் இந்த அமைப்புதான். அதே போல் இஸ்லாத்தைப் பற்றிய தவறான எண்ணங்களை களையும் பொருட்டு 'இஸ்லாம் ஓர் இனிய மார்க்கம்' என்ற நிகழ்ச்சியை ஒவ்வொரு ஊரிலும் நடத்தி வருவதும் இந்த அமைப்புதான். இந்து கிறித்தவ சகோதரர்கள் சில நேரங்களில் கிண்டலாக கேள்விகள் கேட்டாலும் அதற்கெல்லாம் கோபப் படாமல் பொறுமையாக விளக்கம் அளித்துக் கொண்டிருப்பதும் இந்த அமைப்புதான்.

இது போன்று இன்னும் பல அமைப்புகள் இருந்தாலும் இந்த அமைப்பை நான் குறிப்பிடக் காரணம் இருக்கிறது. இந்த அமைப்பிடம் எந்த பொதுசேவை மனித நேய பணிகளை நீங்கள் கேட்டாலும் உடன் வந்து பிரதிபலன் பார்க்காமல் உழைப்பார்கள். ஆனால் இறை வணக்கம் என்று வந்து விட்டால் யாரிடமும் எந்த சமரசத்துக்கும் செல்லமாட்டார்கள். இதுதான் சிறந்த நிலை. ஒருவரிடம் அன்பாக இருப்பது மற்ற மதத்தவரை மதிப்பது என்பதையும் அதற்காக மற்ற மத கலாசாரத்தை என் மதத்திலும் புகுத்தலாம் என்ற நினைப்பையும் ஒன்றாக போட்டு குழப்பிக் கொள்வதால்தான் இது போன்ற சிக்கல்கள் வருகின்றன.

எனவே அனைத்து மத சட்டங்களையும் படிப்போம். அவரவர் மதத்தில் உள்ள மூடப்பழக்கங்களை ஒழிக்க பாடுபடுவோம். அவ்வாறு எடுத்துச் சொல்லும் போது மென்மையான அணுகு முறையை கடைபிடிப்போம். வளமுள்ள பாரதத்தை அனைவரும் ஒன்று சேர்ந்து உருவாக்குவோம்.