ஏ.ஆர்.ரஹ்மானின் ஈகை குணம்!

ஒரு ஏழைப் பெண் தனது அனாதையான தம்பியின் இரண்டு குழந்தைகளை வளர்க்க கஷ்டப்படுகிறார். கூடவே வயதான தாய். சேரி பகுதியில் வீட்டு வேலைகளை செய்து இரண்டு பிள்ளைகளையும் படிக்க வைக்கிறார். தனது தாயையும் காப்பாற்றுகிறார் அந்த பெண். இவர்படும் கஷ்டம் பலர் மூலமாக ஏ.ஆர்.ரஹ்மானை சென்றடைகிறது. அந்த பிள்ளைகளின் படிப்பு செலவுக்காகவும் அந்த பெண்மணியின் குடும்ப கஷ்டத்தை நீக்குவதற்காகவும் ரஹ்மான் தனது சொந்த நிதியிலிருந்து பதினோரு லட்சம் ரூபாயை அந்த தாய்க்கு இலவசமாக தருவதைத்தான் மேலே பார்க்கிறீர்கள்.

நம்மில் எத்தனையோ செல்வந்தர்கள் கோடிக் கணக்கில் பணம் புரண்டாலும் வறியவர்க்கு கொடுப்போம்: அவர்கள் சந்தோஷத்தில் பங்கு கொள்வோம் என்று சிந்திப்பது கூட கிடையாது.

ஒரு பக்கம் விண்ணை முட்டும் கோபுரங்கள். மறு பக்கம் சேரிகளில் புரண்டு கொண்டிருக்கும் குடிசைவாசிகள்: இருவரின் வித்தியாசங்களும் நாளுக்கு நாள் அதிகரித்துக் கொண்டுதான் போகிறதேயொழிய குறைந்தபாடில்லை. அரசியல்வாதிகளை நம்பி இனி பயன் இல்லை. தங்கள் வாரிசுகளுக்கு சொத்து சேர்ப்பதில்தான் அவர்களின் கவனமெல்லாம் இருக்கிறது. இந்த நிலை இப்படியே நீடித்தால் கொலை கொள்ளைகள் அதிகமாகும் வாய்ப்பிருக்கிறது. இப்பொழுதே பட்டப் பகலில் பூட்டை உடைத்து கொள்ளை என்ற செய்தி வராத நாளே இல்லை.

'அண்ணாந்து பார்க்கின்ற மாளிகை கட்டி:

அதன் அருகினில் ஓலை குடிசை கட்டி:

பொன்னான உலகென்று பெயரும் இட்டால்:

இந்த பூமி சிரிக்கும் அந்த சாமி சிரிக்கும்'

என்ற பட்டுக் கோட்டை கல்யாண சுந்தரத்தின் பாடல் வரிதான் எனக்கு ஞாபகம் வருகிறது.

நம்மில் உள்ள ஒவ்வொரு செல்வந்தரும் ஒரு ஏழையை தத்தெடுத்துக் கொண்டால் இந்த பிரச்னை வெகு இலகுவாக தீர்ந்து விடும். இங்கு சவுதியில் செல்வம் பரவலாக்கப்பட்டிருக்கிறது. ஜகாத் என்ற ஏழை வரி அனைவரிடமும் கட்டாயமாக வசூலிக்கப்படுவதால் அந்த செல்வம் ஏழைகளை சென்றடைகிறது. எனது ஓனரும் ஒவ்வொரு வருடமும் ஜகாத்தைக் கணக்கிட்டு அரசாங்கத்துக்கு இவ்வளவு, தனது சொந்தங்களுக்கு இவ்வளவு என்று பணத்தை செலுத்துவதை நான் பார்க்கிறேன். வருமானத்தை அரசுக்கு குறைத்து காட்டுவதும் இல்லை. ரோடுகளில் பிச்சை எடுப்பவர்களை சவூதி அரசு சில நேரங்களில் கைதும் செய்கிறது.

நம்மில் பலரும் ஓரளவு ஏழைகளுக்கு கொடுத்து வருகிறோம். எப்படி கொடுக்கிறோம்? ஒரு ரூபாயை மாற்றி வைத்துக் கொண்டு பள்ளிவாசலிலும் கோவில்களிலும் அமர்ந்திருக்கும் ஏழைகளுக்கு வரிசையாக கொடுத்துக் கொண்டு செல்வோம். இதனால் பிச்சைக்காரர்களை நாம் மேலும் வளர்க்கிறோம். இப்படி சில்லரையாக கொடுக்கும் பணத்தை நாம் சேர்த்து வைத்து ஒரு ஏழையை தேர்ந்தெடுத்து அவன் சொந்த தொழில் தொடங்க நாம் உதவி செய்தால் அவன் வாழ்நாள் முழுவதும் நன்றியுடையவனாக இருப்பான். கௌரமான வாழ்க்கையையும் அவன் வாழ்வான்.

சுயமரியாதை உடையோர்!

'அவர்களைப் பற்றி அறியாதவர் அவர்களின் தன்மான உணர்வைக் கண்டு அவர்களைச் செல்வந்தர்கள் என்று எண்ணிக் கொள்வார்கள். அவர்களின் அடையாளத்தை வைத்து அவர்களை அறிந்து கொள்வீராக! மக்களிடம் கெஞ்சி கேட்க மாட்டார்கள்.' - குர்ஆன் 2:273

நம் சொந்தங்களிலேயே சிலர் மிக வறுமையில் உழல்வார்கள். ஆனால் சுய மரியாதை காரணமாக யாரிடமும் கையேந்த மாட்டார்கள். இப்படிப்பட்ட உறவினர்களையும் அக்கம் பக்கத்திலுள்ளோரையும் தேடிச் சென்று நாம் உதவ வேண்டும் என்று குர்ஆன் கட்டளையிடுகிறது.

என் உறவினரில் ஒருவர் மிகப் பெரும் செல்வந்தர். ஏழைகளுக்கு கொடுப்பதில் மிகவும் கராராக இருப்பார். ஆனால் தனது வீட்டை மிகவும் ஆடம்பரமாக கட்டி பல முறை ஹஜ்ஜூம் செய்திருக்கிறார். ஹஜ்ஜூக்கு போவதற்கு முன்பு ஊரில் உள்ள செல்வந்தர்களை எல்லாம் அழைத்து தடபுடலாக விருந்துகளும் கொடுப்பார். சவுதி அரசு ஒரு வெளிநாட்டவருக்கு நான்கு வருடத்துக்கு ஒரு முறைதான் ஹஜ்ஜூக்கு அனுமதிக்கிறது. இல்லை என்றால் அவர் வருடா வருடம் மக்காவுக்கு ஹஜ்ஜூ செய்ய சென்று விடுவார். செல்வந்தருக்கு வாழ்நாளில் ஒருமுறை ஹஜ் செய்தாலே போதுமானது. இரண்டு மூன்று முறை ஹஜ் செய்யும் பணத்தை உறவினருக்கும் ஏழைகளுக்கும் கொடுத்தால் ஹஜ் செய்வதைப் போன்ற நன்மை இதிலும் கிடைக்கிறது. ஏனெனில் அந்த அளவு வறியவர்களை கொண்ட சமூகமாக நம் சமூகம் இருக்கிறது.

'தர்மங்களை நீங்கள் வெளிப்படையாக செய்தால் அது நல்லதே. அதைப் பிறருக்கு மறைத்து ஏழைகளுக்கு வழங்கினால் அது உங்களுக்கு மிகச் சிறந்தது.'-குர்ஆன் 2:271

இதன்மூலம் தர்மங்களை வெளிப்படையாகவும் கொடுக்கலாம். மறைமுகமாகவும் கொடுக்கலாம். இரண்டுக்கும் நன்மை இருக்கிறது என்கிறது குர்ஆன்.

வறியார்க்கொன்று ஈவதே ஈகைமற் றெல்லாம்

குறியெதிர்ப்பை நீர துடைத்து.-குறள்

ஒன்றும் இல்லாத ஏழை எளியோருக்கு கொடுப்பதே ஈகை எனப்படும். மற்றவர்களுக்கு கொடுப்பது ஈகையாகாது. சுருங்கச் சொன்னால் வட்டியை எதிர்பார்த்துக் கடன் கொடுப்பது போன்றது ஆகும். இல்லாதவர்க்கு கொடுப்பதே கொடையாகும் என்கிறார் வள்ளுவர்.

இத்தகைய ஈகை குணத்தை நாம் வளர்த்துக் கொண்டு சமதர்ம சமுதாயம் படைக்க முயற்ச்சிப்போமாக!