ஜனநாயகம் என்ற பெயரில் நடக்கும் கேலிக் கூத்து!

நமது நாட்டு ஜனநாயக முறையை நாம் எப்போதும் புகழ்ந்த வண்ணமே உள்ளோம். நமது அண்டை நாடுகளில் ராணுவ ஆட்சியும் சர்வாதிகார ஆட்சிகளும் நடந்து வரும் போது 100 கோடிக்கும் மேல் மக்கள் தொகையைக் கொண்ட நம் நாடு இன்று வரை மக்களால் தேர்ந்தெடுக்கப்பட்டு வருவதை நானும் நீங்களும் பெருமிதத்தோடே சொல்லிக் கொள்கிறோம். ஆனால் நம்நாட்டு தற்போதய தேர்தல் முறை சரியானதுதானா! இதில் உள்ள குறைகளை எவ்வாறு நீக்குவது என்பதை அலசுவதே இந்தப் பதிவு.

வழமையாக நமது தேர்தலில் போட்டியிடும் சட்டமன்ற வேட்பாளர் ஒரு தொகுதியில் 100000 லட்சம் வாக்கு பெறுவதாக வைத்துக் கொள்வோம். இவரை எதிர்த்து போட்டியிட்ட எதிரணி வேட்பாளர் 99999 வாக்குகளே பெறுகிறார். நமது நாட்டு சட்டத்தின்படி 100000 வாக்குகள் பெற்றவர் வெற்றி பெற்று சட்டமன்றத்துக்கும் சென்று விடுகிறார். மற்றொரு வேட்பாளருக்கு 99999 வாக்குகளை கிடைத்ததால் அவர் தோல்வியுறுகிறார். 99999 பேர் போட்ட வாக்குகளுக்கு எந்த மதிப்பும் இல்லாமல் அவர்களின் எண்ணங்கள் சட்டமன்றத்தில் ஒலிக்காமலும் நீர்த்து விடுகிறது. இது ஜனநாயகமா? 99999 பேரின் எதிர் வாக்குகளைப் பெற்றவர் எவ்வாறு மக்கள் பிரதிநியாக சட்ட மன்றம் செல்ல முடியும்?

அதேபோல் ஒரு மாநிலத்தில் 100 தொகுதிகள் உள்ளதாக வைத்துக் கொள்வோம். ஒவ்வொரு தொகுதியிலும் ஆயிரம் வாக்காளர் என்றும் வைத்துக் கொள்வோம். இந்த அனைத்து தொகுதிகளிலும் அதிமுக 501 ஓட்டுகளும் திமுக 499 ஓட்டுகளும் பெறுவதாகக் கொள்வோம். இப்போது நூறு தொகுதிகளிலும் அதிமுக வெற்றி பெற்றதாக அறிவிக்கப்படுகிறது. திமுக ஒரு தொகுதியில் கூட வெற்றி பெறவில்லை என்றும் அறிவிக்கப்படுகிறது. இது நாம் பின்பற்றும் பிரிட்டனின் ஜனநாயக முறை. அதாவது அதிமுகவுக்கு 100 எம்எல்ஏக்கள் கிடைக்க திமுகவுக்கு ஒரு எம்எலஏ கூட கிடைக்கவில்லை. இரண்டு கட்சிகளும் பெற்ற மக்களின் வாக்குகளைக் கூட்டிப் பார்த்தால் மொத்தமாக 200 வாக்குகள்தான் வித்தியாசம் வருகிறது.

அதிமுக நூறு தொகுதிகளில் வாங்கிய ஓட்டுக்கள் 50100. திமுக நூறு தொகுதிகளில் வாங்கிய ஓட்டுக்கள் 499900. மொத்தமாக 200 வாக்குகளை மட்டுமே பெற்ற அதிமுக வெற்றி பெற்றதாக அறிவிக்கப்பட்டு ஆட்சியும் அமைத்து விடுகிறது. இது நியாயமான தேர்தலாகுமா? மக்களின் எண்ண ஓட்டத்தை இந்த முடிவு பிரதிபலிக்கிறதா? கண்டிப்பாக இல்லை.

“கவலைப் படாதீங்க! உங்களுக்கு சிரமம் கொடுக்கப்படாதுன்னுதான் நாங்களே உங்களைத் தேடி வந்துட்டோம். வாங்க வந்து ஓட்டை போடுங்க!”

இந்த தேர்தல் முறையில் உள்ள குளறுபடிகள் தற்போது நமக்கு விளங்கியிருக்கும். சரி இதற்கு மாற்று ஏற்பாடு உண்டா? அதைப் பற்றியும் சிறிது பார்ப்போம்.

ஜெர்மன் ஜனநாயக முறை:

இந்த தேர்தல் முறையில் ஆட்கள் போட்டியிட மாட்டார்கள். சங்கம் அல்லது கட்சி போன்றவைதான் போட்டியிட முடியும். ஒவ்வொரு ஆயிரம் ஓட்டுக்கும் ஒரு சட்டமன்ற உறுப்பினர் அந்த கட்சிக்கு என்று நிர்ணயிக்கப்படும்.

நூறு தொகுதியில் அதிமுக மேலே சொன்னது போல் 50100 வாக்குகள் பெற்றால் ஆயிரத்துக்கு ஒரு உறுப்பினர் என்ற அடிப்படையில் அதிமுகவுக்கு ஐம்பது உறுப்பினர்கள் அரசால் ஒதுக்கப்படும். உறுப்பினர்களை அந்தக் கட்சியே தேர்ந்தெடுத்துக் கொள்ளும். அதே போல் 49900 வாக்குகள் பெற்ற திமுக 49 சட்டமன்ற உறுப்பினர்களைப் பெற்றுக் கொள்ளும். திமுகவும் தனது வேட்பாளர்களை தேர்ந்தெடுத்துக் கொள்ளும். இதனால் வாக்களித்த மக்களுக்கு உரிய பிரதிநிதித்துவம் கிடைக்கிறது. இந்த முறையினால் எம்எல்ஏக்களையும் எம்பிக்களையும் விலைக்கு வாங்கும் குதிரை பேரமும் கட்டுக்குள் வரும். அடுத்து வானளாவிய அதிகாரம் தனக்கு இருப்பதாக நினைப்பவர்களுக்கும் இந்த முறை ஆப்பு வைக்கும்.

அதேபோல் சிறு சிறு லெட்டர்பேட் கட்சிகளெல்லாம் எங்களுக்கு இவ்வளவு வாக்கு வங்கி இருக்கிறது என்று மிரட்டி அதிக எம்பிக்களையும் எம்எல்ஏக்களையும் பெறும் போக்கு மாறும். ஒவ்வொரு தேர்தலிலும் அந்த கட்சி எத்தனை ஆயிரம் ஓட்டுக்கள் பெற்றுள்ளது என்பது தெளிவாகத் தெரிந்து விடும். மக்களுக்கு நல்லது செய்யவில்லை என்றால் அடுத்த தேர்தலில் மக்கள் நம்மை வீட்டுக்கு அனுப்பி விடுவார்கள் என்ற உண்மையான பயம் இருக்கும். இதற்கு முன் நடந்த இடைத் தேர்தலில் எந்த அளவு ஓட்டுக்கள் விலை பேசப்பட்டன என்பதை பார்த்தோம். தற்போது புதுக்கோட்டையிலும் இந்த நாடகம் அரங்கேறப் போகிறது.


நேற்று மதுரை ஆட்சியர் திரு சகாயம் எந்த காரணமும் சொல்லப்படாமல் வேறு இடத்துக்கு மாற்றப்பட்டுள்ளார். கோஆப்டெக்ஸ் நிறுவனத்துக்கு மாற்றப்பட்டுள்ளாராம். கண்டிப்பானவர். ஊழல் செய்யாதவர். கிரானைட் குவாரிகளில் சோதனையிட்டு பல வரி ஏய்ப்புகளையும் கண்டு பிடித்து அரசுக்கு லாபம் பார்த்தவர். விடுவார்களா நம் அரசியல்வாதிகள். எங்கு கவனிக்க வேண்டுமோ அங்கு செம்மையாக கவனித்தவுடன் நேர்மையான அதிகாரி இன்று பிரச்னையில்லாத கோஆப்டெக்ஸூக்கு மாற்றப்பட்டுள்ளார். இது நான் நம் நாட்டு ஜனநாயகம். எந்த கேள்வியும் இல்லை. ஊழல் செய்ய மறுத்ததால் இன்று தடாலடியாக மாற்றப்பட்டுள்ளார். கட்டுக்கடங்காமல் அதிக எண்ணிக்கையை அரசு பெற்றதால்தான் இத்தகைய மோசடிகளை எவரும் தட்டிக் கேட்பதில்லை. விகிதாச்சார அடிப்படையில் கணக்கு பண்ணி பார்த்தோமானால் ஜெயலலிதாவுக்கு 60 அல்லது எழுபது எம்எல்ஏக்கள் கிடைப்பதே சிரமம். எல்லா அரசியல் கட்சிகளின் நிலையும் இதே லெவலில்தான் இருக்கும்.

அடுத்து பல மொழிகள் பல மதங்களைக் கொண்ட தமிழகம் இலங்கை போன்ற இடங்களுக்கும் ஜெர்மனைப் போன்ற ஜனநாயக தேர்தலே சிறப்பானதாக இருக்க முடியும். உதாரணத்துக்கு இலங்கையை எடுத்துக் கொள்வோம். தனி ஈழம் கிடைக்கும் என்பது ஒருபுறம் இருக்கட்டும். அப்படி கிடைத்து அந்த மக்கள் சுபிட்சமாக வாழ நாமும் வாழ்த்துவோம். அது அல்லாமல் சிங்களமக்கள், தமிழ் மக்கள் இந்த இரு சாராரும் தங்களின் எண்ணிக்கைக்கு தக்கவாறு பிரதிநிதிகள் அமைத்துக் கொள்ள ஜெர்மன் தேர்தல் முறை மிக உதவிகரமாக இருக்கும். இனத்தாலும் மொழியாலும் ஒன்றுபட்ட தமிழ் முஸ்லிம்கள் கலாசாரத்தால் முற்றிலுமாக இந்து சகோதரர்களிடமிருந்து வேறுபடுகிறார்கள். இவர்களும் தங்களின் கட்சிகள் பெறும் வாக்குகளின் அடிப்படையில் பிரதிநிதிகளைப் பெற்றுக் கொள்வார்கள். இந்த முறையில் எவரையும் குறை சொல்லவும் வாய்ப்பு ஏற்படாது. ஒட்டு மொத்த இலங்கை தமிழர்களும் பாதிக்கு மேல் தனி ஈழத்தை ஆதரிக்காதபோது அதிலும் பிரச்னைகள் வெடிக்க வாய்ப்பிருக்கிறது. ஒட்டு மொத்த இலங்கை தமிழ் மக்களும் தனி ஈழத்துக்கு ஆதரவு தெரிவிக்கும் வரை இந்த ஜெர்மன் ஜனநாயக முறையை பின் பற்றினால் தற்கால பிரச்னைகள் ஓய வாய்ப்பிருக்கிறது.

எதையோ சொல்ல வந்து பதிவின் சாரம் எங்கெங்கோ சென்று விட்டது. எனது புரிதலில் இப்பொழுது உள்ள தேர்தல் முறையை நீக்கி விட்டு ஜெர்மன் மாடலில் விகிதாச்சார அடிப்படையில் ஆட்சி அமைந்தால் தற்போதய குளறுபடிகள் குறைய வாய்ப்பிருப்பதாகவே எண்ணுகிறேன். இதைப்பற்றி நமது அரசியல்வாதிகள் என்ன சொல்கிறார்கள் என்பதையும் தெரிந்தவர்கள் சொல்லுங்கள்.