இஸ்லாமிய கருத்தை வளைக்கும் சம்சுதீன் காசிமி!!

இஸ்லாமிய கருத்தை வளைக்கும் சம்சுதீன் காசிமி!!

சென்னையில் மெக்கா பள்ளியின் இமாமாக பணிபுரிந்து வரும் இந்த நபர் தனக்கும் கூட்டம் சேர வேண்டும் என்ற ரீதியில் அவ்வப்போது தடாலடியாக ஏதாவது உளருவது வழக்கம். முன்பு உஸாமா பின்லாடனுக்கு தொழுகை நடத்தி பரபரப்பை ஏற்படுத்தினார். சமீப காலமாக இந்தியாவில் உள்ள ஜனநாயக நடைமுறை இஸ்லாத்துக்கு விரோதமானது என்ற ரீதியில் பேச ஆரம்பித்து இருக்கிறார். அதற்காக இவர் எடுத்து வைக்கும் ஆதாரம் என்ன என்பதையும் அது எதற்காக சொல்லப்பட்டது என்பதையும் பார்ப்போம்.

'நான் என் இறைவனிடம் வந்த சான்றுடன் இருக்கிறேன். அதைப் பொய்யெனக் கருதுகிறீர்கள். நீங்கள் அவசரப்படுவது என்னிடம் இல்லை. அதிகாரம் இறைவனுக்கே தவிர வேறு எவருக்கும் இல்லை'
-குர்ஆன் 6:57

'அவனன்றி நீங்கள் வணங்குபவை வெறும் பெயர்களே! நீங்களும் உங்களின் முன்னோர்களும் அவற்றுக்குப் பெயரிட்டீர்கள். இது குறித்து இறைவன் உங்களுக்கு எந்த சான்றையும் அருளவில்லை. அதிகாரம் இறைவனைத் தவிர எவருக்கும் இல்லை. 'அவனைத் தவிர எதையும் நீங்கள் வணங்கக் கூடாது' என்று அவன் கட்டளையிட்டுள்ளான். இதுவே நேரான மார்க்கம். எனினும் அதிகமான மனிதர்கள் விளங்குவதில்லை.'
-குர்ஆன் 14:40

ஆட்சி அதிகாரம் சட்டமியற்றும் அதிகாரம் இறைவனுக்கு மட்டுமே உண்டு என்ற ரீதியில் மேற்கண்ட வசனத்தின் கருத்துகள் தெளிவுபடுத்துகின்றன. ஆனால் ஆட்சி அதிகாரமும் சட்டமியற்றும் அதிகாரமும் மனிதர்களுக்கு உண்டு என்று இந்திய ஜனநாயகம் கூறுகிறது. எனவே ஜனநாயகம் குர்ஆனுக்கு எதிரானது. இறைவனின் அதிகாரத்தைப் பறித்து மனிதர்களுக்கு கொடுப்பதால் மறைமுகமான இணை வைப்பை இது சேரும் என்பது இவரின் வாதம்.

இந்த வாதம் ஏதோ புதிதாக வைக்கப்படுவதாக எண்ண வேண்டாம். ஜனாதிபதி அலி அவர்களின் காலத்திலேயே இப்படி ஒரு வாதம் வைக்கப்பட்டு அது அலி அவர்களாலேயே முறியடிக்கவும் பட்டது. அலியின் மறைவுக்கு பிறகு திரும்பவும் இதே கொள்கையை கொண்டு வந்து குழப்பம் விளைவித்ததால்தான் ஷியா என்ற பிரிவு உருவாக காரணமானது.

இந்த குழப்பங்கள் ஏன் வந்தது என்று சிறிது விளக்கமாக பார்ப்போம். இறைவன் தனக்கென்று சில அதிகாரங்களை வைத்துள்ளான். தான் படைத்த மனிதர்களுக்கு சில அதிகாரங்கள் அந்த இறைவனே கொடுத்திருக்கிறான். மனிதர்களுக்கு மத்தியில் பிரச்னை ஏற்படும் போது மனிதர்களைக் கொண்டு தீர்ப்பு வழங்கிக் கொள்ளுமாறு படைத்த இறைவனே கட்டளையிடுகிறான். இதற்கு ஆதாரமான வசனங்களைப் பார்ப்போம்.

'கணவன் மனைவியருக்கிடையே பிளவு ஏற்படும் என்று நீங்கள் அஞ்சினால் அவன் குடும்பத்தின் சார்பில் ஒரு நடுவரையும் அவள் குடும்பத்தின் சார்பில் ஒரு நடுவரையும் அனுப்புங்கள். அவ்விருவரும் நல்லிணக்கத்தை விரும்பினால் அல்லாஹ் அவ்விருவருக்கிடையே இணக்கத்தை ஏற்படுத்துவான்'
-குர்ஆன் 4:35

தம்பதிகளுக்கு மத்தியில் உலக பிரச்னைகளில் ஏதும் கருத்து வேறுபாடு வந்தால் நடுவர்களைக் கொண்டு தீர்ப்பு வழங்குமாறு இறைவன் கட்டளையிடுகிறான். இது இறைவனின் கட்டளைக்கு மாற்றமாகாது.

'அமானிதங்களை அதற்குரியோரிடம் ஒப்படைக்குமாறும் மக்கள் மத்தியில் தீர்ப்பளிக்கும் போது நீதியாக நீங்கள் தீர்ப்பளிக்க வேண்டும் எனவும் அல்லாஹ் உங்களுக்கு கட்டளையிடுகின்றான்.'
-குர்ஆன் 4:59

'அவர்கள் உம்மிடம் வந்தால் அவர்களிடையே நீர் தீர்ப்பு வழங்கலாம். அல்லது அவர்களை அலட்சியம் செய்யலாம். அவர்களை நீர் அலட்சியம் செய்தால் அவர்களால் உமக்கு எந்தத் தீங்கும் தர முடியாது. நீர் தீர்ப்பளித்தால் அவர்களிடையே நீதியான முறையில் தீர்ப்பளிப்பீராக! நீதி செலுத்துவோரை அல்லாஹ் விரும்புகிறான்'
-குர்ஆன் 5:42

'ஒரு சமுதாயத்தின் ஆடு இன்னொரு சமுதாயத்தின் விளை நிலத்தில் மேய்ந்த போது தாவூதும் சுலைமானும் தீர்ப்பளித்ததை நினைவூட்டுவீராக! அவர்களின் தீர்ப்புக்கு நாம் சாட்சியாக இருந்தோம்'
-குர்ஆன் 21:79

'நம்பிக்கை கொண்டோரில் இரண்டு கூட்டத்தினர் சண்டையிட்டுக் கொண்டால் அவர்களுக்கிடையே இணக்கத்தை ஏற்படுத்துங்கள். அவற்றுள் ஒன்று மற்றொன்றின் மீது வரம்பு மீறினால் வரம்பு மீறிய கூட்டம் அல்லாஹ்வின் கட்டளையை நோக்கித் திரும்பும் வரை அதை எதிர்த்து சண்டையிடுங்கள். அக் கூட்டம் திருந்தினால் நீதியான முறையில் இருவருக்கிடையே நல்லிணக்கத்தை ஏற்படுத்துங்கள். நீதி செலுத்துங்கள்! நீதி செலுத்துவோரை அல்லாஹ் விரும்புகிறான்.'
-குர்ஆன் 49:9

மேலே கூறப்பட்ட அனைத்து வசனங்களும் மனிதர்களுக்கிடையே பிரச்னைகள் வந்தால் மனிதர்களைக் கொண்டே நியாயமான தீர்ப்பு வழங்கச் சொல்லி இறைவன் அனுமதியளிக்கிறான். இப்படி தீர்ப்பளிப்பது இறைவனின் கட்டளைக்கு மாற்றமாகாது. மேலும் பல வசனங்கள் மனிதர்களை சிந்திக்க சொல்கிறது. சிந்தனையின் மூலம் மனிதன் நல்லது எது கெட்டது எது என்பதை விளங்க முடியும் என்பதாலேயே மனிதர்களை சிந்தித்து செயல்பட சொல்கிறான்.

இறைவனுக்குரிய அதிகாரம் என்று வரும்போது மறுமை வாழ்வுக்கான நல்ல அமல்களான தொழுகை, நோன்பு, ஏழை வரி, ஹஜ், போன்ற கிரியைகளை எவ்வாறு செயல்படுத்துவது என்பதில் அடங்குகிறது. இந்த சட்டங்கள் அனைத்தும் குர்ஆனில் பாதுகாக்கப்பட்டும் இருக்கிறது. அந்த சட்டங்களில் சென்று யாரும் கை வைத்தால்தான் நாம் ஆட்சேபணை எழுப்ப முடியும்.

மறுமையில் வெற்றி பெறுவதற்கான வழிகளை காட்டவே இறைவன் நபியாக முகமது நபியை அனுப்புகிறான். மறுமைக்கு தொடர்பில்லாத உலக விஷயங்களை செய்து காட்ட அவர்கள் அனுப்பப்படவில்லை. அந்த அறிவும் ஞானமும் அதிகாரமும் இயல்பாகவே மனிதர்களுக்கு வழங்கப்பட்டுள்ளது. இதை ஒரு சம்பவத்தின் மூலம் கூட அறிந்து கொள்ளலாம்.

நபிகள் நாயகம் அவர்கள் மதினா வந்த போது மதினாவின் நபித் தோழர்களிடம் ஒரு வழக்கத்தைக் கண்டார்கள். பேரிச்சை மரத்தை பயிரிட்டு தொழில் செய்து வந்த மதினாவின் மக்கள் ஒட்டு முறையில் மரங்களை இணைப்பதை வழக்கமாகக் கொண்டிருந்தனர். இதைக் கண்ட நபிகள் நாயகம் அவர்கள் 'இதைச் செய்யாதிருக்கலாமே' எனக் கூறினார்கள். மதினாவாசிகள் அவ்வழக்கத்தை உடனே விட்டு விட்டார்கள். அந்த வருடம் மகசூல் குறைந்து விட்டது. இதைக் கண்ட நபிகள் நாயகம் அவர்கள் 'உங்கள் பேரிச்சை மரங்களுக்கு என்ன நேர்ந்தது'? என்று கேட்டனர். நபிகள் நாயகம் கூறியதை நபித் தோழர்கள் நினைவுபடுத்தினார்கள். அப்போது நபிகள் நாயகம் அவர்கள் 'உங்கள் உலக விஷயங்களில் நீங்களே நன்கு அறிந்தவர்கள்' எனக் குறிப்பிட்டார்கள்.
-நூல் முஸ்லிம் 4358

'நானும் மனிதன் தான். மார்க்க விஷயமாக நான் உங்களுக்கு ஏதும் கட்டளையிட்டால் அதைக் கடைபிடியுங்கள். என் சொந்தக் கருத்தைக் கூறினால் பின் பற்ற வேண்டிய அவசியம் இல்லை'
-நூல் முஸ்லிம் 4357

'நான் எனது கருத்தைக் கூறினேன். அதற்காக என்னை பிடித்து விடாதீர்கள். ஆனால் அல்லாஹ்வின் சார்பாக நான் ஒரு கருத்தைக் கூறினால் அதைக் கடைபிடியுங்கள். ஏனெனில் அல்லாஹ்வின் பெயரால் நான் பொய் சொல்ல மாட்டேன்.'
-நூல் முஸ்லிம் 4356

மேற்கண்ட நபி மொழியில் இறைவனுக்குரிய அதிகாரம் எது மனிதனுக்குரிய அதிகாரம் எது என்பது தெளிவாக விளங்குகிறது. உலகின் ஜனநாயக நாடுகளில் மறுமைக்கான வழிமுறைகளுக்கு எந்த சட்டமும் இயற்றப்படுவதில்லை. எப்படி தொழுவது என்பதை நமது அரசாங்கம் நமக்கு விளக்குவதில்லை. மனிதர்களுக்கு உள்ள அதிகாரங்களை முறைப்படுத்தவே ஜனநாயக அரசுகள் உலகம் முழுவதும் செயல்படுகிறது. பெரும்பான்மை மக்களின் வசதியை முன்னிட்டு சில மார்க்க முரணான சட்டங்களை ஜனநாயக அரசு இயற்றினால் அது போன்ற இடங்களில் மட்டும் நாம் விலகிக் கொள்ள வேண்டும். இவ்வாறு எந்நாட்டுக்கும் ஏற்ற சட்டமாக இஸ்லாம் கட்டளை பிறப்பித்திருக்க இந்த மௌலவி மக்களை குழப்ப நினைக்கிறார்.

இப்பொழுது உதாரணத்திற்கு சம்சுதீன் காசிமி ஒரு இடத்தை வாங்குகிறார். வாங்கியவரிடம் பணத்தைக் கொடுத்து ஒரு காகிதத்தில் எழுதி கையெழுத்து வாங்கிக் கொண்டவுடன் சம்சுதீன் காசிமிக்கு அந்த இடம் இஸ்லாமிய சட்டப்படி உரிமையாகி விடும். அதோடு நின்று கொள்வாரா...

உடனே சம்பந்தப்பட்டவரை ரிஜிஸ்டர் ஆபிஸுக்கு அழைத்து செல்வார். அங்கு சென்று அந்த இடத்துக்கு தக்க வாறு பத்திரங்ளை வாங்குவார். சாட்சிகளை தயார் பண்ணுவார். ரிஜிஸ்டரும் செய்வார். இவை எல்லாம் ஜனநாயக நாடான நமது நாடு போட்ட சட்டங்கள். இங்கு மட்டும் சம்சுதீன் காசிமி போன்றவர்கள் ஜனநாயக சட்டத்தை அமுல்படுத்த துடிப்பார்கள். இங்குதான் இவர்களின் இரட்டை வேடத்தை நாம் பார்க்க முடியும்.

அதேபோல் இஸ்லாம் தாடி வைக்க சொல்கிறது. ஓ.கே. ஆனால் இவர் தலையில் பெண்களைப் போன்று முக்காடு போட்டுக் கொண்டு அடிக்கடி அதை சரி செய்து கொண்டிருப்பது முகமது நபி சொன்ன வழிமுறையா? இல்லை. அவருக்கு அது அழகாக தோன்றுகிறது. தன்னை ஒரு புரோகிதர் என்று மற்றவர்கள் அடையாளம் கண்டு கொள்ள வேண்டும் என்ற மமதையில் சிகப்புத் துண்டை அணிந்து கொள்கிறார். இதை யாரும் குறை சொல்லவில்லை. ஏனெனில் உலக விஷயத்தில் மனிதனுக்கு எது அழகு என்று நினைக்கிறானோ(இஸ்லாமிய சட்டத்துக்கு பங்கம் வராமல்) அந்த உடையை அணிய அனுமதிக்கப்படுகிறது.

இதே போன்றுதான் கல்வியில் இட ஒதுக்கீடு, போலீஸ் அராஜகம், மதக்கலவரம், ஆட்சியாளரின் நிர்வாக குளறுபடிகளைக் கணடித்து சில இயக்கங்கள் ஜனநாயக ரீதியில் போராட்டத்தை நடத்துகின்றன. சில இடங்களில் கோரிக்கைகளில் வெற்றியும் பெற்றிருக்கின்றன. இங்கு இஸ்லாமிய சட்டங்களுக்கு எந்த பாதிப்பும் வரவில்லை.

இந்த போராட்டங்களால் இஸ்லாமியர்கள் கல்வி வேலை வாய்ப்புகளில் குறிப்பிட்ட சதவீதத்தைப் பெற்று பலனடைந்திருக்கிறார்கள். அவர்களைப் பாராட்ட வேண்டாம். தூற்றாமலாவது இருக்க வேண்டும் இந்த சம்சுதீன் காசிமி.

அரசாங்கம் கள்ளுக் கடையை நடத்துகிறது. விரும்பியவர்கள் சென்று குடிக்கலாம். என்னையோ அல்லது சம்சுதீன் காசிமியையோ அவசியம் குடித்தே ஆக வேண்டும் என்று கட்டாயப்படுத்த முடியுமா? முடியாது. ஆனால் பூரண மது விலக்கை கொண்டு வர மற்ற மக்களோடு சேர்ந்து ஜனநாயக முறையில் போராட முயற்ச்சிக்க வேண்டும். ஜனநாயக அரசியலில் உள்ள குறைகளை களைய முயற்ச்சிக்க வேண்டும்.

அடுத்து இவர் பாலஸ்தீன பிரச்னையை நம் நாட்டோடு முடிச்சு போடுகிறார். சொந்த நாட்டு மக்களை அகதிகளாக்கி இஸ்ரேலும், அமெரிக்காவும் அராஜகம் பண்ணுவதை போராளிகள் எதிர்க்கின்றனர். அக்கிரமக்கார ஆட்சியில் ஹமாஸ் போன்ற ஒரு அமைப்பு இருந்தால்தான் இஸ்ரேலை ஒரு வழிக்கு கொண்டு வர முடியும். நமது நாடு தேர்தலால் தேர்ந்தெடுக்கப்பட்டு பல சுதந்திரங்களை அனைத்து மக்களும் அனுபவித்து வரும் நாடு. இங்கு ஜனநாயக பாதையில் சில குளறுபடிகள் இருந்தால் அதை சாதிவீகமான போராட்டத்தின் மூலமே சரி கண்டு விட முடியும்.

இந்த ஜனநாயக முறை தவறென்றால் வேறு எந்த வழி முறை என்பதையும் சம்சுதீன் தெளிவுபடுத்த வேண்டும். அபுபக்கர், உமர் காலங்களிலேயே உறுதிமொழி (பைஅத்) நாட்டு மக்கள் ஆட்சியாளரிடம் செய்த வழிமுறையும் உண்டு. இந்த முறையும் தேர்தலில் பின்பற்றப்படும் வழிமுறையை ஒத்தே இருக்கிறது.

எனவே நாலு வீட்டுக்கு போனோமா...நாலு பாத்திஹா ஓதி குடும்பத்தை ஓட்டிணோமா என்ற ரீதியில் காலத் தள்ளும் சம்சுதீன் காசிமி போன்றவர்கள் தேவையில்லாத சமாசாரங்களில் மூக்கை நுழைத்து அவமானப்பட வேண்டாம். மார்க்க அறிஞர்கள் என்ற பெயரில் இஸ்லாத்தை இத்தனை நாள் மூடி வைத்தது போதும். இனி உங்களைப் போன்ற உலகம் தெரியாத மார்க்க அறிஞர்கள் இஸ்லாத்துக்கு தேவையில்லை. தமிழகத்தைப் பொறுத்தவரை சரியான திசையில் இஸ்லாம் சென்று கொண்டிருக்கிறது. அதைக் குழப்பவேண்டாம் என்று மட்டும் சம்சுதீன் காசிமிக்கு சொல்லிக் கொள்கிறோம்.

சம்சுதீன் காசிமியின் அரைகுறை பேச்சை கேட்டுக் கொண்டு இஸ்லாத்தை சரியாக விளங்காத சில இளைஞர்கள் தவறான வழிக்கு செல்லவும் வாய்ப்புள்ளது. எனவே சம்சுதீன் காசிமி போன்றவர்களின் நாட்டுக்கு எதிரான விஷமக் கருத்துகளை இனியும் பரப்பாமல் தடுக்க வேண்டியது மக்கா மஸ்ஜிதின் நிர்வாகிகளின் பொறுப்பு. அரசும் இவரது பேச்சை கண்காணிக்க வேண்டும்.