சந்தீப் தேசாய் + நூருல் இஸ்லாம் - வெற்றிக் கூட்டணி!

எதற்கெடுத்தாலும் அரசையே குற்றம் சாட்டிக் கொண்டிருக்காமல் தனி மனிதர்களாக நின்று இன்று பல ஏழை குழந்தைகளின் கல்விக் கனவை நனவாக்கியிருக்கிறார்கள் புரபசர் சந்தீப் தேசாயும் அவரது நண்பர் நூருல் இஸ்லாமும். மும்பையில் குடிசை பகுதிகளில் உள்ள ஏழை குழந்தைகள் இன்று கான்வென்டில் இவர்கள் தயவால் படிக்கின்றனர். இதற்கான பொருளாதாரத்தை தினமும் ரயிலில் உண்டியல் குலுக்கி சேர்த்து வருகிறார் தேசாய். ஒரு பொறியியல் வல்லுனரான இவரும் இவரது குழுமமும் கல்விக்காக பொதுவில் பிச்சை எடுப்பதை கேவலமாக நினைப்பதில்லை.

'கற்கை நன்றே! கற்கை நன்றே! பிச்சை புகினும் கற்கை நன்றே'

என்ற பழமொழிக்கு உயிர் கொடுத்துள்ளார்கள் இந்த டிரஸ்டின் உறுப்பினர்கள். வருடத்துக்கு ஒரு பள்ளி வீதம் குடிசை ஏரியாக்களில் திறப்பது என்ற குறிக்கோளுடன் செயல்படுகின்றனர்.

'ஒவ்வொரு கிராமங்களிலும் 3500 லிருந்து 4000 மக்கள் வசிக்கின்றனர். இவர்களின் குடிசை பகுதிகளில் கல்விக் கூட வசதி இல்லாததால் பல குழந்தைகள் கல்வியறிவே இல்லாமல் வளர்க்கப்படுகின்றனர். அரசு இதைப் பற்றி எல்லாம் கவலைபட்டதாகவே தெரியவில்லை.இருக்கும் ஒன்றிரண்டு கல்விக் கூடங்களோ அதிக கட்டணம் வசூலிக்கின்றன. இங்குள்ள கூலி தொழிலாளிகளால் எவ்வாறு இந்த கல்விக் கட்டணத்தைக் கட்ட முடியும்?'

'2005 ல் ஸ்லோகா டிரஸ்ட் என்ற ஒன்றை ஆரம்பித்து மும்பை வடக்கு பகுதியில் ஆரம்ப பள்ளியை துவக்கினோம். முதன் முதலாக 285 குழந்தைகளை வைத்து இந்த குடிசைப் பகுதியில் துவக்கப் பாடங்களைக் கொடுத்தோம். எங்களது பணி தற்போது ராஜஸ்தானுக்கும் விரிவாக்கப்பட்டுள்ளது. ஐந்தாவது கல்விக் கூடத்தை அடுத்த மாதம் திறக்க உள்ளோம்.

ரேணுகா மேத்தா: ரயில்வே பயணி கூறுகிறார்

'புரபசரை தினமும் ரயிலில் பார்ப்பேன். அனைவரிடமும் எந்த சங்கோஜமும் படாமல் உண்டியல் குலுக்கி பணம் வசூலிப்பார். பல ஏழைக் குழந்தைகளின் வாழ்வு சிறப்படைய அல்லும் பகலும் உழைக்கும் இவர்களுக்கு நம்மால் ஆன உதவிகளை கண்டிப்பாக செய்ய வேண்டும்'

திரஜ் டோங்ரே ஆட்டோ டிரைவர் கூறுகிறார்.

'நான் கனவிலும் நினைக்கவில்லை. எனது பிள்ளைகளும் ஆங்கில கல்விக் கூடத்தில் படிக்கும் என்று. எனது குழந்தைகளின் எதிர்காலத்தை வளமுள்ளதாக்கும் இவர்களை என்ன பாராட்டினாலும் தகும்'

தற்போது இந்த டிரஸ்ட் மூலமாக 500க்கும் மேற்பட்ட ஏழை குழந்தைகள் படித்து வருகின்றனர். செல்வந்தர்களும் தன்னார்வத் தொண்டர்களும் இவர்களின் முயற்சிக்கு உறுதுணையாக இருக்கின்றனர். இவர்களை முன்னுதாரணமாகக் கொண்டு நாமும் நமது கிராமங்களில் இது போன்ற கல்விச் சாலைகளை அதிகமதிகம் உருவாக்கி ஏழை மக்களுக்கு சிறந்த கல்வி கிடைக்க முயற்சிப்போமாக!

http://www.rediff.com/news/slide-show/slide-show-1-the-unique-prof-who-begs-so-that-he-can-open-a-school-for-poor-kids/20101221.htm#1

http://www.ndtv.com/article/cities/why-this-professor-begs-on-mumbai-trains-305790

--------------------------------------------

அப்துல்லாஹ் இப்னு மஸ்ஊத் அவர்கள் ஒவ்வொரு வாரமும் வியாழக்கிழமை மக்களுக்குப் போதனை செய்பவர்களாக இருந்தார்கள். ஒரு முறை ஒரு மனிதர் அவர்களை அணுகி, 'ஏன் நீங்கள் தினமும் போதனை செய்யக் கூடாது?' என்று கேட்டார். அதற்கு அப்துல்லாஹ் இப்னு மஸ்ஊத் அவர்கள். 'நான் மக்களைச் சலிப்படையச் செய்வதை வெறுக்கின்றேன். இதுவே அப்படிச் செய்ய எனக்குத் தடையாகவுள்ளது. எங்களுக்குச் சலிப்பு ஏற்பட்டு விடுமோ என்ற பயத்தில் நபி அவர்கள் மிகக் கவனமாக உபதேசித்தது போன்றே நானும் நடந்து கொள்கின்றேன்' என்றார்கள். (ஆதாரம் : புகாரி)

கல்வித் திட்டமானது மாணவர்களை வெருண்டோடச் செய்யாமல் ஆர்வமுடன் கற்கும் வகையில் அமைக்க வேண்டும்.

'நிச்சயமாக அறிவைத் தேடிச் செல்பவனுக்கு, வானவர்கள் அவன் செய்யும் அவ்வேலையில் திருப்தியடைந்து தமது இறக்கைகளை விரிக்கின்றனர். அறிஞனுக்காக, நீரில் உள்ள மீன்கள் உட்பட, வானம் மற்றும் பூமியில் உள்ள அனைத்தும் பாவ மன்னிப்புக் கோருகின்றன. ஓர் வணக்கவாளிக்கு முன்னால், ஓர் அறிஞனின் சிறப்பு, நட்சத்திரங்களுடன் ஒப்பிடும்போது சந்திரனுக்குள்ள சிறப்பைப் போன்றதாகும். மேலும், அறிஞர்கள் நபிமார்களின் வாரிசுகளாவர். நபிமார்கள் தங்க நாணயத்தையோ அல்லது வெள்ளி நாணயத்தையோ வாரிசாக விட்டுச் செல்லவில்லை. அவர்கள் அறிவை மட்டுமே வாரிசாக விட்டுச் சென்றனர். அதனைப் பெற்றுக் கொண்டவர் பெரும் பேற்றைப் பெற்றுக் கொண்டவராவர்.' (அபூதாவுத், அஹ்மத்)

'ஒருவர் அறிவைத் தேடி ஒரு பாதையில் சென்றால், அல்லாஹ் அதனைக் கொண்டு அவருக்கு சுவனம் செல்லும் ஒரு பாதையை இலகுபடுத்திக் கொடுக்கின்றான்.' (முஸ்லிம்)

'இலகு படுத்துங்கள், கஷ்டப்படுத்தாதீர்கள். ஆசையூட்டுங்கள், வெறுப்படையச் செய்யாதீர்கள்' (புகாரி , முஸ்லிம்)

இங்கு கல்வி, அறிவு என்பது வெறும் மத்ரஸா கல்வி என்று பலர் விளங்கி வைத்துள்ளனர். நபி அவர்கள் வெறும் மார்க்க போதனைகளை மட்டும் தனது தோழர்களுக்கு உபதேசிக்கவில்லை. வியாபாரம் எப்படி செய்வது? மனைவி மக்களை எவ்வாறு நடத்துவது? மாற்று மதத்தவர்களோடு எவ்வாறு நடந்து கொள்வது? என்று ஒவ்வொன்றையும் அந்த தோழர்களுக்கு கற்று தந்தனர். சுதந்திர தாகத்தால் வெள்ளையன் கொடுத்த வேலையையும், படிப்பையும் துறந்தோம். அதன் பலனை இஸ்லாமிய சமூகம் இன்று வரை அனுபவித்து வருகிறது.

'அறிந்தோரும் அறியாதோரும் சமமாவார்களா? என்று கேட்பீராக. அறிவுடையோர் தான் நல்லறிவு பெறுவார்கள்.
-குர்ஆன் 39:9

'உங்களில் நம்பிக்கைக் கொண்டோருக்கும் கல்வி வழங்கப்பட்டோருக்கும் இறைவன் பல தகுதிகளை உயர்த்துவான்'
-குர்ஆன் 58:11

மனிதர்களில் ஏற்றத் தாழ்வு கிடையாது அனைவரும் சமம் என்று சொல்லும் குர்ஆன் கல்வி கற்றவர்களை மட்டும் அவர்களின் தகுதியை உயர்த்துவதாக சொல்வதில் இருந்து கல்வியின் முக்கியத்துவத்தை உணரலாம்.

கெடில் விழுச்செல்வம் கல்வி ஒருவருக்கு
மாடல்ல மற்றை யவை
-குறள் 40:400

ஒருவனுக்கு எவ்வகையிலும் அழிவே இல்லாத சிறந்த செல்வமானது கல்வியே ஆகும். அது தவிர்ந்த பொன்னும், மணியும் மற்ற அலங்காரப் பொருட்களும் உண்மையான செல்வங்கள் அல்ல என்கிறார் வள்ளுவர்.

சந்தீப் தேசாய், நூருல் இஸ்லாம் போன்று ஒவ்வொரு கிராமத்திலும் பல இளைஞர்கள், பல செல்வந்தர்கள் உருவாக வேண்டும். 60 ஆண்டு காலம் கல்வியை துறந்த மக்கள் அதை ஈடு செய்யும் முகமாக கல்விக்கு முக்கியத்துவத்தை கொடுத்து வருங்கால சந்ததிகளை அறிவுள்ள மக்களாக ஆக்க முயற்சிப்போமாக!