தீபாவளியால் எனக்குள் ஏற்பட்ட விபத்து!

(பையன் மனதுக்குள்)

'ஹா...ஹா... செலவுக்கு பணம் தர மாட்டேண்டியா! அதான் உரல்ல வெங்காய வெடியை போட்டேன்.'

------------------------------------------------------

தீபாவளி வருவது இந்து மக்களுக்காக! ஆனால் எங்கள் கிராமத்தில் முன்பெல்லாம் 100 ரூபாயிலிருந்து 1000 ரூபாய் வரை பட்டாசுகளை ஒன்றாக சேர்ந்து வாங்கி வந்து வெடிப்பது வழக்கம். எங்களுக்கு எந்த நரகாசுரன் செத்தான் என்று இன்று வரை விளங்கவில்லை. பெரியவர்கள் 'காசை இப்படி கரியாக்குறீங்களேடா' எனறு சொன்னாலும் எவரும் காதில் வாங்குவது இல்லை. அப்போது எனக்கு 13 வயது இருக்கும் என்று நினைக்கிறேன். இரண்டு பெட்டிகள் நிறைய பட்டாசுகளை வாங்கி இரவு நேரமானதும் வெடிக்க ஆயத்தமானோம். மத்தாப்பு, சங்கு சக்கரம், சுர்வானம், அணுகுண்டு என்று நண்பர்களோடு சேர்ந்து வெடிகளை வெடித்துக் கொண்டிருந்தேன்.

உள்ளதிலேயே மிகப் பெரிய சுர்வாணம் ஒன்று இடையில் வந்தது. அதனை கீழே வைத்து பேப்பரினால் பற்ற வைக்க முயற்சித்தோம். என்ன காரணத்தினாலோ அது பற்றவில்லை. பல முறை முயற்சித்தேன்.

'டேய்! கையில எடுத்து நேரிடையா பத்த வைடா'

பின்னாலிருந்து நண்பன் உசுப்பி விடவும் அதனை கையில் எடுத்து நேரிடையாக அதன் முனையை விளக்கில் காட்ட ஆரம்பித்தேன். வழக்கமாக உடன் பற்றிக் கொண்டு பூப்போல கொட்ட ஆரம்பித்து விடும். ஆனால் ஐந்து நிமிடம் ஆகியும் அது பற்ற வில்லை.

'
"நமத்து போயிருக்கோண்டா! இன்னும் கொஞ்சம் நேரம் காட்டு"

நண்பனின் பேச்சை தட்ட முடியாமல் இன்னும் கொஞ்சம் நேரம் காட்டினேன்.

'படார்'

பயங்கர சத்தத்துடன் சுர்வாணம் வெடித்து சிதறியது. அந்த இடமே ஒரே கருகிய நாற்றம். விளக்கும் அணைந்து விட்டது. சிறிது நேரத்துக்கு பிறகுதான் என் கையை பார்த்தேன். இப்பொழுதுதான் வலி தெரிய ஆரம்பித்தது. வலது கை முழுவதும் வெந்து விட்டது. வலி என்றால் உயிர் போகும் வலி. பெரியவர்கள் யாரும் பக்கத்தில் இல்லை. இங்கும் அங்கும் கத்திக் கொண்டே வீட்டுக்குள் ஓடினேன். ஓடிய வேகத்தில் வாளியில் இருந்த தண்ணீரில் கையை விட்டேன். அதற்குள் விஷயம் தெரிந்து கூட்டம் கூடி விட்டது. வலி பொறுக்க முடியாமல் கத்த தொடங்கினேன்.

உடனே வீட்டுக்கு பக்கத்தில் இருக்கும் தனியார் ஆஸ்பத்திரிக்கு கொண்டு செல்லப்பட்டேன். அங்கு அதை விட வலி உயிர் போனது. மருத்துவர் மருந்துகளை வைத்து பெரிதான ஒரு கட்டை போட்டார். அந்த கட்டோடு கிட்டத்தட்ட ஒரு மாதம் மிகவும் சிரமப் பட்டேன்.

இதை நான் இங்கு பதிய காரணம் நாளை தீபாவளி. எனவே சிறுவர்களில் இருந்து பெரியவர்கள் வரை இதில் மிக கவனமாக இருக்க வேண்டும். நேற்று கூட பட்டாசு கடையில் ஏற்பட்ட தீவிபத்தில் 12 வயது மதிக்கத்தக்க சிறுவன் இறந்துள்ளான். இந்த தீபாவளிக்கு பட்டாசு வெடிக்கும் பழக்கமே பிற்காலத்தில் ஏற்பட்டது. மொகலாய மன்னர் பாபரின் காலத்தில் தான் இது போன்று சிறப்பான பண்டிகை நாட்களில் பட்டாசு வெடிக்கும் பழக்கம் ஏறபட்டது. அதற்கு முன்பு தீபாவளி தினத்தன்று பட்டாசு வெடிப்பது இந்தியர்களின் பழக்கமாக இருந்ததில்லை. இடையில் வந்த பழக்கத்தை சமூக நலன் கருதி படிப்படியாக விட்டு விடலாமே!

-----------------------------------------------------------

கூந்தன்குளத்தில் உள்ள பறவைகள் சரணாலயத்தில் உள்ள பறவைகளுக்கு சிரமம் ஏற்படும் என்பதால் இக்கிராம மக்கள் பட்டாசு வெடிப்பதில்லை.

இதேபோல சிவகங்கை மாவட்டம் சிங்கம்புணரி அருகே உள்ள கொல்லுகுடிப்பட்டி கிராமத்திலும் கடந்த 40 வருடமாக மக்கள் பட்டாசு வெடிப்பதில்லை. இந்த கிராமத்தில் தீபாவளி சீசனின்போது பெருமளவில் வெளிநாட்டுப் பறவைகள் வரும். இதனால் இந்த சமயத்தில் பட்டாசு வெடித்தால் அது பறவைகளுக்கு இடையூறாக இருக்கும் என்பதால் பட்டாசு வெடிப்பதில்லை.

அதேபோல சேலம் மாவட்டம் தலைவாசல் அருகே ஊனத்தூர் கிராமத்திலும் தீபாவளிக்கு யாரும் பட்டாசு வெடிப்பதில்லை. இங்குள்ள மணி அம்மன் கோவிலைச் சுற்றிலும் நிறைய மரங்கள் உள்ளன. இங்கு கடந்த பல வருடங்களாக ஆயிரக்கணக்கான வவ்வால்கள் வசித்து வருகின்றன.

இந்த வவ்வால்களை மிகவும் கவனமாக பார்த்துக் கொள்கின்றனர் இப்பகுதி மக்கள். வவ்வால்களை யாராவது வேட்டையாட வந்தால் துரத்தி விடுகின்றனர்.
இந்த வவ்வால்களுக்கு இடையூறாக இருக்கும் என்பதால், யாரும் இந்த கிராமத்தில் பட்டாசு வெடிப்பதில்லை. தீபாவளி என்றில்லை எந்த விசேஷமாக இருந்தாலும் யாரும் பட்டாசு வெடிப்பதில்லை.

------------------------------------------------------

தீபாவளியன்று வளி மண்டலம் அதிக அளவில் மாசு அடையும் வாய்ப்பு உள்ளது என்று மத்திய மாசுக் கட்டுப்பாட்டு வாரியம் எச்சரித்துள்ளது.தீபாவளிக்கு முன்னரும், பின்னரும் நகரில் மாசு அளவை கணக்கிட மாசுக் கட்டுப்பாட்டு வாரியம் முடிவு செய்தது.

அதன்படி எய்ம்ஸ், லஜ்பத் நகர், கன்னாட் பிளேஸ், மயூர் விகார், கமலா நகர், பிதம்புரா, கிழக்கு அர்ஜூன் நகர், தில்ஷான் கார்டன், பிரகதி மைதானம் ஆகிய 9 இடங்களில் கண்காணிப்பு வசதிகள் ஏற்படுத்தப்பட்டன.

இதுகுறித்து மாசு கட்டுப்பாட்டு வாரிய செயலாளர் ஜே.எஸ்.கம் யோத்ரா கூறுகையில், வளி மண்டலத்தில் காற்றின் அளவு மற்றும் சத்தத்தின் அளவுகள் பதிவு எடுக்கப்பட்டுள்ளன. இதேபோன்று இந்த 9 இடங்களிலும் தீபாவளி அன்று வாயுக்கள், சத்தத்தின் அளவுகள் பதிவு செய்யப்படும்.

கார்பன் மோனாக்ஸைடு, சல்பர் டை ஆக்ஸைடு, நைட்ரோஜன் டையாக்ஸைடு உள்ளிட்ட காற்றை மாசுபடுத்தும் கரியமில வாயுக்களின் அளவு அதிகரித்துள்ளாதா என்பது கண்டறியப் படும். இதுதவிர காற்று மாசு, சத்தத்தின் அளவு குறித்து ஆய்வு செய்யும்படி மாநில மாசுக் கட்டுப்பாட்டு வாரியங்கள், மாசுக் கட்டுப்பாட்டு கமிட்டிகளும் கேட்டுக் கொள்ளப்பட்டுள்ளன.

தீபாவளி வரை தொடர்ந்து இந்த அளவீடுகள் பதிவு செய்யப்படும். பெருநகரங்களில் காற்று மாசுபடுவதைத் தடுக்கும் வகையில் மேற்கொள்ளப்படும் நடவடிக்கையின் ஒரு பகுதியாக இந்த கண்காணிப்பு வசதி ஏற்படுத்தப்பட்டுள்ளது.

தீபாவளியையொட்டி பட்டாசு வெடிப்ப தால் ஏற்படும் மாசு அளவு எவ்வளவு என்பது தெரிவிக்கப்படும். காற்று மாசுபடுவதை கட்டுப்படுத்தும் நோக்கில் கணக்கிடப்படுகிறது. தற்போதைய தட்பவெப்பநிலை (குறைந்த வெப்பம்) நீடித்தால் தீபாவளியன்று வளி மண்டலம் கடுமையாக மாசுபடும் வாய்ப்பு உள்ளது என்றார். எனவே பட்டாசு வெடிப்பதை இந்த பண்டிகை நாளில் முடிந்த வரை குறைத்துக் கொள்ள முயற்சிப்போம்.

நண்பர்கள் அனைவருக்கும் வாழ்வில் இன்று போல் என்றும் மகிழ்ச்சி பூத்துக் குலுங்க பிரார்த்திக்கிறேன்.