நரேந்திர மோடி வீட்டுக்கு அனுப்பப்படுவாரா?

குஜராத் சட்டமன்ற தேர்தலின் இறுதி கட்டத்தில் தற்போது இருக்கிறோம். முன்பு எப்படியும் மோடி அருதி பெரும்பான்மை பலத்துடன் முதல்வராவார் என்று அனைவருமே எதிர் பார்த்தோம். ஆனால் நிலைமை அவ்வளவு சிறப்பாக மோடிக்கு இல்லை. அவர் போட்டியிடும் மணிநகர் தொகுதியிலேயே இரண்டு பெண்கள் மோடிக்கு பிரச்னையை கொடுத்துக் கொண்டுள்ளார்கள்.

அவர்களில் ஒருவர் சஸ்பெண்ட் செய்யப்பட்ட ஐ.பி.எஸ்., அதிகாரி சஞ்சிவ் பட் மனைவி சுவேதா பட். மற்றவர் முன்னாள் உள்துறை அமைச்சர் ஹரேன் பாண்ட்யாவின் மனைவி ஜக்ருதி பாண்ட்யா.மணி நகர் தொகுதியில் முதல்வர் மோடியை எதிர்த்து போட்டியிட பல அரசியல் தலைவர்கள் தயங்கி பின் வாங்கியுள்ளனர். ஆனால் சுவேதா பட் அவரை எதிர்த்து போட்டியிடுகிறார். அவர் காங்கிரஸ் கட்சி வேட்பாளராக போட்டியிடுகிறார். இது குறித்து சுவேதா பட் கூறுகையில், எனது கணவருக்கு நியாயம் கிடைக்க போட்டியிடுகிறேன். எனது கணவர், குடும்பம், மகள் உட்பட பலருக்கு இடைஞ்சல் ஏற்பட்டுள்ளது. நான் ஏன் அமைதியாக இருக்க வேண்டும். எனவே எனது குரலை
வெளிப்படுத்தவே தேர்தலில்போட்டியிடுகிறேன் என கூறினார்.

ஸ்வேதா பட் பிரசாரம் செய்யும் இடத்திலிருந்து சிறிது தூரம் தள்ளி, முன்னாள் அமைச்சர் ஜக்ருதி பாண்டியா பிரசாரம் செய்கிறார். இவர் கொலை செய்யப்பட்ட முன்னாள் உள்துறை அமைச்சர் ஹாரன் பாண்டியாவின் மனைவி ஆவார். தேர்தலில் போட்டியிடுவது குறித்து ஜக்ருதி பாண்டியா கூறுகையில், மோடியை எதிர்த்து பா.ஜ., அல்லாத வேட்பாளராக போட்டியிடுகிறேன். தற்போது பிரச்னை மக்கள் மன்றத்தில் உள்ளது. உண்மை நிச்சயம் வெற்றி பெறும். இதற்கு சிறிது காலம் எடுத்து கொண்டாலும் நிச்சயம் உண்மை வெளிப்படும் என கூறினார்.

தங்கள் கணவருக்கு இழைக்கப்பட்ட துரோகத்துக்கு பழி வாங்க இன்று இரண்டு பெண்களும் களத்தில் குதித்துள்ளனர். நரேந்திரமோடியை தோல்வியுறச் செய்தால்தான் உண்மையான விசாரணையை நடத்த முடியும். அடுத்து படேல் சாதியினரின் ஓட்டுக்கள் கணிசமாக பிரியும் வாய்ப்புள்ளதாக கூறப்படுகிறது. கேசுபாய் படேல் இந்துத்வா ஓட்டுக்களை பாதியாக பிரித்து விடுவார் என்று நோக்கர்கள் கூறுகின்றனர். இஸ்லாமியர்களின் ஒட்டு மொத்த எதிர்ப்பும் மோடியை திணறச் செய்கிறது. சில இஸ்லாமியர்களை மிரட்டி மோடிக்கு(இர்ஃபான் பதான்) ஆதரவாக பிரசாரம் பண்ண வைத்தாலும் ஓட்டளிக்கும் சாமான்ய முஸ்லிமின் எண்ண ஓட்டத்தை நாமும் அறிவோம். இர்ஃபான் பதானுக்கும் என்ன நெருக்கடிகள் மோடியால் கொடுக்கப்பட்டதோ அதை இர்ஃபானே அறிவார்.

மொத்தம் உள்ள, 182 சட்டசபை தொகுதிகளில், 54 தொகுதிகளின், தேர்தல் வெற்றியை நிர்ணயிக்கும் அளவுக்கு, பலம் வாய்ந்த சமூகமாக, படேல் சமூகத்தினர் உள்ளனர். 15 ஆண்டுகளுக்கும் மேலாக, இந்த சமூகத்தினர், பா.ஜ.,வுக்கு ஆதரவாகவே உள்ளனர். பா.ஜ.,வின் ஓட்டு வங்கி என்று கூட, இவர்களை கூறலாம். படேல் சமூகத்தில், செல்வாக்கு மிக்க தலைவரும், குஜராத் முன்னாள் முதல்வருமான, கேசுபாய் படேல், பா.ஜ.,விலிருந்து பிரிந்து, தனிக் கட்சி துவங்கி உள்ளார். நரேந்திர மோடியுடன் ஏற்பட்ட கருத்து வேறுபாடு காரணமாக, சில ஆண்டுகளாக, கட்சி பணிகளில் ஈடுபடாமல் ஒதுங்கியிருந்தார், கேசுபாய் படேல். தேர்தல் தேதி அறிவிக்கப்படுவதற்கு முன், திடீரென, "குஜராத் பரிவர்த்தன் கட்சி' என்ற, கட்சியை துவக்கி, நரேந்திர மோடிக்கு, பெரும் சவாலாக விளங்கி வருகிறார்.

படேல் சமூகத்தில், கடவா மற்றும் லெயுவா என, இரு பிரிவு உண்டு. கேசுபாய் படேல், லெயுவா பிரிவைச் சேர்ந்தவர். படேல் சமூகத்தில், லெயுவா பிரிவினர் தான், எண்ணிக்கையில் அதிகமாக உள்ளனர். தற்போது, கேசுபாய் படேல் துவங்கியுள்ள, புது கட்சிக்கு, லெயுவா பிரிவைச் சேர்ந்த, பெரும்பாலானோர், ஆதரவு தெரிவித்துள்ளனர். லெயுவா பிரிவில், செல்வாக்கு மிக்க தலைவரான, நரேஷ் படேல் என்பவர், மாநிலத்தின் பல இடங்களில், தொடர்ச்சியாக, தங்கள் பிரிவைச் சேர்ந்தவர்களின் கூட்டங்களை நடத்தி வருகிறார். இந்த கூட்டங்களில் எல்லாம், கேசுபாய் படேல் துவக்கியுள்ள கட்சிக்கு, இந்த தேர்தலில், ஆதரவு அளிக்க கோரி வருகிறார். இந்த கூட்டங்களில், கேசுபாய் படேலும், தவறாமல் பங்கேற்கிறார். நரேஷ் படேல்,"நம் சமூகத்தை சேர்ந்தவர்கள், 10 ஆண்டுகளாக, வளர்ச்சி பணிகளில் புறக்கணிக்கப்படுகிறோம். இந்த பிரச்னைக்கு முற்றுப் புள்ளி வைக்க வேண்டுமானால், கேசுபாய் படேல் பின், அணி திரள வேண்டும்'என, தங்கள் பிரிவினருக்கு வேண்டுகோள் விடுக்கிறார்.

மோடி தனது வாழ்நாளில் செய்த அனைத்து அராஜகங்களுக்கும் உரிய தண்டனையை பெற வேண்டுமானால் இந்த முறை காங்கிரஸ் ஆட்சியில் அமர்த்தப்பட வேண்டும். குஜராத் மக்கள் என்ன தீர்ப்பை தருகிறார்கள் என்பது இன்னும் சில நாட்களில் தெரிந்து விடும். நீதி ஜெயிக்கிறதா! அல்லது மோடியின் அராஜக அரசியல் திரும்பவும் சபை ஏறுகிறதா? தேர்தல் முடிவுவரை பொறுப்போம்.