மன்னர் அப்துல்லாவின் ஒரு அழகிய வேண்டுகோள்!

சவுதி அரேபிய மன்னர் அப்துல்லாஹ் உலக இஸ்லாமிய அறிஞர்களுக்கு ஒரு வேண்டுகோள் விடுத்துள்ளார். அதாவது தற்போதய நவீன உலகின் பிரச்னைகளுக்கு தீர்வு சொல்லும் போது அதற்கு அடிப்படையாக குர்ஆனும் நபி மொழிகளும் இருக்க வேண்டும் என்று அறிவுறுத்தியுள்ளார்.

முஸ்லிம் வேல்ட் லீக் மற்றும் இஸ்லாமிய சட்ட கவுன்சிலும் இணைந்து நடத்திய விழாவில் மேற் கண்டவாறு மன்னர் அப்துல்லா வேண்டுகோள் விடுத்துள்ளார்.

முஸ்லிம்களுக்கு ஏற்படும் நவீன பிரச்னைகளுக்கு ஒரு தீர்வை எட்டும்போது அது இஸ்லாமிய அடிப்படையை தகர்க்காததாக இருக்க வேண்டும். இஸ்லாமிய தத்துவமானது எந்த காலத்துக்கும் எந்த நாட்டுக்கும், எந்த மொழி பேசுபவருக்கும் ஏற்ற வகையில் அமைந்துள்ளது இதன் சிறப்பாகும். இதற்கு காரணம் இந்த மார்க்கமானது இறைவன் புறத்திலிருந்து வந்ததாலேயே ஆகும்.

சமீபத்திய அரசியல் கலாசார மாற்றங்கள் நமது வாலிப ஆண்களையும் பெண்களையும் தடம் புரளச் செய்யாது கண்காணிக்க வேண்டும். இன்று முஸ்லிமகள் சந்திக்கும் பிரச்னைகளில் தலையாயது சொந்த சகோதரர்களே ஒருவரை ஒருவர் மோதிக் கொள்ளும் சூழ்நிலைதான். இது மிகவும் வருத்தப்பட வேண்டிய நிகழ்வு. பிரிவுகளாகவும் இயக்கங்களாகவும் பிரிந்த ஒரு சில நபர்களின் தவறான வழி காட்டுதலால் இன்று முஸ்லிமகளுக்குள்ளேயே மோதிக் கொள்ளும் நிலை உருவாகியுள்ளது. இஸ்லாமிய அறிஞர்கள் இதற்கொரு தீர்வு கண்டு ஒன்றுபட்ட இஸ்லாமிய சமூகம் உருவாக முயற்சிக்க வேண்டும்.

மேற்கண்டவாறு மன்னர் அப்துல்லாவின் செய்தி உலக இஸ்லாமிய அறிஞர்களுக்காக மெக்கா கவர்னர் காலித் அல் ஃபெய்சலால் வாசித்தளிக்கப்பட்டது.

தகவல் உதவி அரப் நியூஸ்
09-12-2012

-----------------------------------------------------------

இது ஒரு புறம் இருக்க இன்று புதிய தலைமுறை செய்தியை பார்த்துக் கொண்டிருந்தேன். அதில் சமையல் கலை சம்பந்தமாக தொடர் நிகழ்ச்சியை ஒளி பரப்புகிறார்கள். அதில் நாகூரில் புலவு, இனிப்பு வகைகள் எவ்வாறு செய்வது என்பதை செய்முறை விளக்கமாக ஒருவர் செய்து கொண்டிருந்தார். இதன் இடையே நாகூர் தர்ஹாவின் சிறப்புகளைப் பற்றி தொலைக்காட்சி நிருபர் சில சம்பவங்களை சொன்னார்.

அதாவது கடலில் ஒரு கப்பலில் ஓட்டை விழுந்து மூழ்கும் அபாயத்தில் இருந்ததாம். அப்போது கப்பலில் இருந்தவர்கள் உதவி கோரினார்களாம். கடற்கரையோரம் சென்று கொண்டிருந்த நாகூர் பாவா உடனே தனது கையிலிருந்து ஒரு பொருளை எடுத்து வீசினாராம். அது சரியாக சென்று அந்த கப்பலின் ஓட்டையை அடைத்து விட்டதாம். உயிர் தப்பிய அந்த மக்கள் நாகூர் பாவாவை வெகுவாக புகழ்ந்நதனராம். இவ்வாறாக நிகழ்ச்சி வர்ணனையாளர் கதை அளந்து கொண்டிருந்தார்.

அந்த கதையைக் கேட்டு எனக்கு மயக்கம் வராத குறைதான். இஸ்லாத்தின் பெயரால் இப்படி ஒரு பொய்யான கதை. அறிவியல் பூர்வமான ஒரு அழகிய மார்க்கத்தை ஒரு சிலர் தங்களின் வயிற்றுப் பிழைப்புக்காக எந்த அளவு நகைப்பிற்குரியதாக ஆக்கி விட்டனர் என்று வருத்தமுற்றேன். ஷாகுல் ஹமீது என்ற இந்த பெரியவரைப் பற்றி இன்னும் நிறைய கட்டுக் கதைகள் சொல்லக் கேள்விப்பட்டுள்ளேன். இவை அனைத்தும் இவர் காலத்துக்கு பின்னால் வந்தவர்கள் கட்டி விட்டவையே.

ஒரு அரசருக்கு வயிற்று வலியை போக்கினாராம். ஒரு வாரிசு உருவாகவும் வைத்தியம் செய்தாராம். இதனால் சந்தோஷமடைந்த தஞ்சை அரசர் அவர் இறப்புக்குப் பிறகு நிறைய சொத்துக்களை நாகூர் தர்ஹா பேரில் எழுதி வைத்துள்ளார். ஒருக்கால் இது உண்மையாக இருக்கலாம். சில நபர்களுக்கு இஸ்லாமிய போதனையும் செய்திருக்கலாம். ஒரு மார்க்க போதகராகவும் ஒரு நாட்டு வைத்தியராகவும் பார்க்கப்பட வேண்டியவரை அநியாயத்துக்கு மகான் என்றும் பொய்யான கதைகளை இட்டுக்கட்டியும் ஒரு பெரும் கூட்டத்தையே உண்டாக்கி விட்டனர்.

இது போன்று தர்கா கட்டுவதும், அதற்கு மாலை மரியாதைகள் செய்வதும், சந்தனக் கூடு எடுப்பதும் முற்றிலுமாக இஸ்லாத்துக்கு மாற்றமான வழிமுறைகள். இது போன்ற கட்டடங்களை இடித்து தரை மட்டமாக்க வேண்டும் என்பது முகமது நபியின் கட்டளை. இறந்து போக சில நாட்களுக்கு முன்பே கூட தனது சமாதியில் கட்டடிடம் கட்ட வேண்டாம் என்றும் விழா நடத்தும் இடமாக ஆக்கி விட வேண்டாம் என்றும் சொன்னவர் நபிகள் நாயகம். அவருக்கு சமாதியில் கட்டிடமோ, அல்லது விழாவோ நடப்பதில்லை என்பது நாம் அறிவோம். அவ்வாறிருக்க முகமது நபியை விட நாகூரில் அடங்கியிருக்கும் ஷாகுல் ஹமீது பெரிய மகானாக ஆகி விட்டாரா? ஆக முடியுமா? என்பதை சம்பந்தப்பட்டவர்கள் யோசிக்க வேண்டும். தவறுகளிலிருந்து விடுபட்டு ஏக இறைவனை மட்டுமே வணங்கி இம்மை மறுமை பேறுகளை பெற்றுக் கொள்வார்களாக!.