அபு ஜிந்தால்- நாம் செய்ய வேண்டியது என்ன?

"கவலையே படாதீங்க! எல்லா பிரச்னையையும் ஒரு மூலையில தூக்கிப் போடுங்க! நான் ஜனாதிபதியாயிட்டா குப்பனும் சுப்பனும் டாட்டா பிர்லாவா மாறிடலாம். தீவிரவாதம் ஒழிக்கப்படும். பணவீக்கம் கட்டுக்குள் கொண்டுவரப்படும்! நம்புங்க!"

________________________

பாகிஸ்தானின் கராச்சியை மையமாக வைத்து அபு ஜிந்தால் திட்டங்களை தீட்டியிருப்பதாகவும் அரசின் ஒத்துழைப்பு இல்லாமல் இத்தனை பேரை அவன் தேர்வு செய்திருக்க முடியாது என்றும் உள்துறை மந்திரி ப.சிதம்பரம் அறிக்கை வெளியிட்டுள்ளார். திட்டங்களை செயல்படுத்தி விட்டு பங்களாதேஷ் வழியாக சவுதி சென்று இத்தனை நாள் தங்கியிருந்தது கண்டு பிடிக்கப்பட்டுள்ளது. சவுதி அரசும் இந்திய அதிகாரிகளோடு இவனது பாஸ்போர்டில் உள்ள பிரச்னையை வைத்து நம்மிடம் ஒப்படைத்துள்ளது. மதத்தின் பெயரை பயன்படுத்தி நாச வெலையில் ஈடுபட்ட இவனை போன்ற துரோகிகளை சவுதி பாரபட்சம் பார்க்காமல் இந்தியாவிடம் ஒப்படைத்திருப்பது பாராட்டக்குரியது. உண்மையான இஸ்லாத்தில் தீவிரவாதத்துக்கு இடமில்லை என்பதை இந்நிகழ்வு நமக்கு சிறந்த எடுத்துக் காட்டாக திகழ்கிறது.



எனக்கு பழக்கமான பங்களாதேசை சேர்ந்த ஒருவன் அவன் நாட்டுக்கு செல்வதற்காக மும்பைக்கு டிக்கெட் எடுத்திருந்தான். நான் ஆச்சரியப்பட்டு 'நீ பங்காளி அல்லவா? எப்படி மும்பைக்கு டிக்கெட் எடுத்துள்ளாய்?' என்று கேட்டேன்.

சிரித்துக் கொண்டே 'மும்பையில் இறங்கி பிறகு பஸ்ஸில் திரிபுரா அல்லது அஸ்ஸாம் செல்வேன். அங்குள்ள காடுகளை தாண்டினால் எங்கள் நாடு பங்களாதேஷ் வந்து விடும். அங்கிருந்து எங்கள் வீட்டுக்கு சென்று விடுவேன்' என்றான் சர்வசாதாரணமாக.

ஆச்சரியத்தோடு நான் 'பாஸ்போர்ட் எப்படி எடுத்தாய்?' என்று கேட்டேன்.

"பணம் கொடுத்தால் இங்கிருந்தே எனக்கு இன்னொரு பாஸ்போர்டடை மும்பையில் எடுக்க முடியும்" என்றான். இந்த சம்பாஷணை நடந்து பல வருடங்களாகிறது. தற்போது அந்த நிகழ்வு ஞாபகம் வந்தது. வல்லரசாக துடிக்கும் ஒரு நாடு எல்லைப் புறத்தில் இவ்வளவு அசட்டையாக இருக்கலாமா?

பாகிஸ்தானைப் பொறுத்தவரை அந்நாட்டு மக்களை இந்தியாவைக் காட்டி பயமுறுத்தி அடக்கி வைக்க அந்நாட்டு அரசு செயல்படுத்தும் பல தீவிரவாத செயல்களை நாம் அறிவோம். உதவிக்கு வர இஸ்ரேலும் அமெரிக்காவும் எப்போதும் தயாராகவே இருக்கிறது. இந்நிலையில் பாகிஸ்தான் பங்களாதேஷ் போன்ற நாடுகளின் தரை மார்க்கத்தை சுற்றி இரும்பு வேலி அடைக்க ஏன் நிர்வாகம் முயல்வதில்லை. எத்தனையோ காரியங்களுக்கு பணத்தை தண்ணீராக செலவழிக்கும் அரசு நாட்டின் பாதுகாப்பு விஷயததில் ஏன் இவ்வளவு அசட்டையாக இருக்கிறது.

அடுத்து சில மதரஸாக்களில் இஸ்லாம் தவறாக கற்பிக்கப்படுகிறது. ஆதாரமில்லாத இஸ்லாமிய எதிரிகளால் எழுதப்பட்ட சில போலி ஹதீஸ்களை இளைஞர்களுக்கு இதுதான் இஸ்லாம் என்று போதிக்கப்படுகிறது. ஜிஹாதுக்கு தவறாக விளக்கம் கொடுக்கப்படுகிறது. குர்ஆனின் வசனங்களுக்கும் தவறாக மொழி பெயர்ப்பை அந்த மாணவர்களின் மனதில் விதைக்கினறனர். இதற்கு சில கள்ள மார்க்க அறிஞர்களும் உடந்தை. இவற்றையும் முதலில் கண்டுபிடித்து அவ்வாறு தீவிரவாதத்தில் ஈடுபடும் மதரஸாக்களை பாகிஸ்தான் இழுத்து மூட வேண்டும். குர்ஆனையும் ஆதாரபூர்வமான ஹதீஸையும் அடிப்படையாகக் கொண்ட மதரஸாக்கள் உருவாக்கப்பட வேண்டும்.தமிழகத்தில் இவ்வாறு சில மதரஸாக்களில் முன்பு தவறான பாடத் திட்டங்கள் வைக்கப்பட்டிருந்தது. தவ்ஹீத் (வஹாபிகள்) வாதிகளின் தொடர் பிரச்சாரங்களால் அந்த பாடங்கள் தற்போது மத்ரஸாக்களில் போதிக்கப் படுவதில்லை. ஆனால் வட நாடுகளில் இன்றும் போதிக்கப்பட்டு வருகிறது. இது போன்று தவறான பாடத் திட்டங்களில் செயல்படும் மத்ரஸாக்களை இழுத்து மூடினாலே பல பிரச்னைகள் ஒழிய வாய்ப்புண்டு. மத்ரஸாக்களின் துணை இல்லாமலேயே இஸ்லாத்தை பலரும் அதன் தூய வடிவில் அறிந்து வருகின்றனர். நானும் கூட மதரஸா சென்று இஸ்லாத்தை தெரிந்து கொண்டவன் அல்ல. இந்தியா முழுமைக்கும் சீரான பாடத்திட்டத்தை இஸ்லாமிய அறிஞர்களான பி.ஜெய்னுல்லாபுதீன், ஜாகிர்நாயக் போன்றோரின் உதவி கொண்டு அரசு முறைப்படுத்த முயல வேண்டும்.

அடுத்து சந்தேகத்துக்கு இடமின்றி ஒரு குற்றவாளி பிடிபட்டால் அவனை உடன் தூக்கில் தொங்க விட்டால் அடுத்து எல்லை தாண்டி வருவதற்கு பலரும் யோசிப்பர். சவுதியில் பெரும் டிரக்குகளை சில ஆப்ரிக்க கொள்ளையர்கள் டிரைவர்களை கொலை செய்து விட்டு பொருள்களை கொள்ளையடித்து சென்றனர். இது தொடர்கதையானது. மஃப்டியில் ஒரு மாதம் ரோந்துப் பணியில் இருந்த போலீஸார் முடிவில் இரண்டு கொள்ளையர்களை கையும் களவுமாக பிடித்தனர். பிறகென்ன....விசாரணை ஒரு வாரத்தில் முடிக்கப்பட்டு தலை வெட்டப்பட்டது. உடலை பார்வைக்காக சில வாரங்கள் அந்த வழியிலேயே கட்டி தொங்க விட்டிருந்தனர். இதைப் பார்க்கும் எவருக்காவது திருட மனம் வருமா? அன்றிலிருந்து எந்த பிரச்னையும் இல்லாமல் டிரக்குகள் ஒழுங்காக சென்று வருகின்றன.

அஜ்மல் கசாபுக்கு அவனது குடும்பத்திற்கு பல லட்சங்கள் தருவதாக சொன்னதன் பேரிலேயே மும்பை வர ஒத்துக் கொண்டுள்ளான். அடுத்து அவனுக்கு உத்தரவு பிறப்பித்தது யார்? என்பதும் இந்தியாவில் அவர்களை இந்த அளவு சுதந்திரமாக அனுமதித்தது யார் என்பதையும் உலகுக்கு தெரிவிக்க வேண்டும். குஜராத் எல்லையை அவர்கள் பயன்படுத்தியது எவ்வாறு? கடல் கண்காணிப்பில் இருந்த அதிகாரிகள் எப்படி இவ்வளவு பேர் அனுமதியின்றி உள்ளே நுழைய அனுமதிக்கப்பட்டனர்? என்ற விபரங்கள் மக்களுக்கு சொல்ல வேண்டும். மேலும் விசாரணைக் கைதிகளை மறைவில் வைத்து விசாரிக்காமல் பொதுவில் வைத்து விசாரித்தால் சில நாட்களிலேயே உண்மை வெளி வந்து விடும். போலீஸாரின் மிரட்டலுக்கு பயந்து தரும் வாக்கு மூலமாகவும் அது இருக்காது. பாராளுமன்ற தாக்குதலில் அப்சல் குரு எவ்வாறு சிக்கவைக்கப் பட்டார் என்று முன்பு பல பதிவுகளில் பார்த்துள்ளோம். நம் நாட்டு அரசு தரும் சம்பளத்தை வாங்கிக் கொண்டு அரசுக்கு எதிராக செயல்படும் அதிகாரிகளை முதலில் இனம் காண வேண்டும். இதை எல்லாம் நேர்மையாக நடக்கும் சிதம்பரம் மனது வைத்தால் செயல்படுத்த முடியும். ஆனால் அதிகார வர்க்கம் இதை செயல்படுத்த முன் வருமா? என்பது கேள்விக் குறியே!

Pointing out to the Indian nationals nabbed in the Mumbai terror attacks, Mr. Malik said India should look inwards instead of always pointing the accusing finger at Pakistan. “Zabiuddin Ansari is an Indian.” When Ansari did everything in India, he questioned why Pakistan was being held solely responsible for the Mumbai terror attacks. “That means your agencies failed to control their citizens. Please look at your system also.’’
http://www.thehindu.com/news/national/article3576826.ece

சிதம்பரம் இந்த கைதுக்கு பிறகு பாகிஸ்தானை குறை சொன்னதற்காக அந்நாட்டு அமைச்சர் மாலிக் கொடுத்த பேட்டியைத்தான் நாம் மேலே பார்க்கிறோம். நம் உள் நாட்டு பாதுகாப்பிலும் பல குறைபாடுகள் உண்டு. அதையும் சரி செய்ய வேண்டும். அடுத்து பாகிஸ்தான், பங்களாதேஷ், நேபாள், போன்ற நாடுகளின் எல்லையை கண்காணிப்பதில் இன்னும் சிரத்தை எடுக்க வேண்டும். எல்லை தாண்டிய தீவிரவாதத்துக்கு மத முத்திரையை குத்துவதை முதலில் நிறுத்த வேண்டும். தீவிரவாதத்துக்கு எந்த மதமும் இல்லை. அஜ்மல் கசாபை எப்படி பார்க்கிறோமோ அதே நிலையில்தான் சாது பிரக்யாசிங்கையும் நாம் பார்க்க வேண்டும். நாட்டு நலன் முக்கியமாக்கப்பட்டு குற்றவாளிகள் நமது சொந்தங்களாக இருந்தாலும் சட்டத்தின் பிடியில் கொண்டு விடும் பக்குவம் நமக்கு வர வேண்டும். இந்தியாவை சிறந்த தேசமாக பார்க்க நினைக்கும் அனைவரும் இதை கடைபிடித்தே ஆக வேண்டும். இத்தகைய தேசபக்தி மிக்க மக்களாக நம் அனைவரையும் எல்லோருக்கும் பொதுவான அந்த இறைவன் ஆக்கி அருள்புரிவானாக!!