முஸ்லிம்கள் 'பொங்கல் பண்டிகை' யை கொண்டாடுவதில்லையே ஏன்?

முஸ்லிம்கள் இனத்தால் திராவிடர்களாக இருந்து தமிழ் மொழியை தாய் மொழியாக கொண்டிருந்தாலும் 'பொங்கல் பண்டிகை' யை கொண்டாடுவதில்லையே ஏன்?

முதலாவது நாள் போகிப் பண்டிகை எனப்படுகிறது. இந்நாளில் மழையைத் தந்து அதன் மூலம் வளம்மிகு அறுவடைக்கு உதவிய முகில்களின் தெய்வமான இந்திரனுக்கு நன்றி கூறப்படுகிறது.இரண்டாம் நாளான தைப்பொங்கல் நாளில் சூரியனுக்கு பொங்கலிட்டு படைக்கப்படுகிறது. கானும் பண்டிகை அல்லது மாட்டுப் பொங்கல் எனப்படும் மூன்றாம் நாளில் உழுவதற்கு உதவிய மாட்டுக்கும் பாலை வழங்கும் பசுவுக்கும் பொங்கலிட்டு நன்றி கூறுவார்கள்.

தமிழகத்தில் பெரும்பாலான இஸ்லாமியர்களுக்கு சொந்த வயல் இருக்கும். தாராளமாக பொங்கலை கொண்டாடலாம்தான். ஆனால் இந்த பண்டிகையானது வழக்கமாக பிராமணர்களால் ஒரு இந்து பண்டிகையாக மாற்றப்பட்டு விட்டது. பண்டைய தமிழர்கள் உருவமற்ற இயற்கை தெய்வத்தினையே வணங்கி வந்தனர். சூரியனை வணங்குதலும், காளை மாடுகளை பசு மாடுகளை வணங்குவதும் நெருப்பை வணங்குவதும் ஆரிய கலாசாரம். இதற்கு பல ஆதாரங்கள் வரலாற்றில் உண்டு. குர்ஆனிலும் ஆதாரங்கள் உண்டு. ஈரான், ஆப்கானிஸ்தான் போன்ற பகுதிகளிலிருந்து படையெடுத்த ஆரியர்கள் திராவிடர்களை வென்று தங்கள் கலாசாரத்தையும் புகுத்தி விட்டனர்.

சூரியனை வணங்காத, மாடுகளை வணங்காத, நெருப்பை வணங்காத பொங்கல் பண்டிகையாக தமிழ் பேசும் இந்துக்கள் மாற்றினால் அந்த பண்டிகைகளில் இஸ்லாமியரும் கலந்து கொள்வர். தங்கள் வீடுகளிலும் பொங்கலை தாராளமாக கொண்டாடுவர். இனம் சார்ந்த பண்டிகைகளுக்கு, கலாசார நிகழ்வுகளுக்கு இஸ்லாம் தடையில்லை. இங்கு சவுதியில் கூட அரேபிய கலாசாரத்தை யொட்டி கழுகு பந்தயம், பெரும் வாள்களோடு நடனமாடுதல், ஒட்டக பந்தயம், புழுதிப் புயலிலிருந்து பாதுகாக்க தலையின் மேல் துணி அது பறக்காமலிருக்க மேலே ஒரு வட்டு என்று அரபுகளிடத்தில் பார்த்திருக்கலாம். அது அரபு மொழி பேசுபவர்களின் கலாசார உரிமை. அதில் இஸ்லாம் தலையிடாது. இவை எல்லாம் உலக முஸ்லிம்களிடத்தில் காண முடியாது. அது போல் ஓரிறைக் கொள்கைக்கு பங்கம் வராமல் இனம் சார்ந்த பண்டிகையாக பொங்கலை மாற்றுங்கள். நானும் எனது இஸ்லாமிய தோழர்களும் தாராளமாக உங்களோடு சேர்ந்து பொங்கலை கொண்டாடுவோம்.

பொங்கல் பண்டிகையை கொண்டாடும் அனைவருக்கும் எனது பொங்கல் வாழ்த்துக்கள்.