இளையராஜாவிடம் உள்ள ஆணவம் குறைய வாய்ப்பில்லையா?

கேள்வி: உங்களிடம் அவ்வப்போது தோன்றும் ஆணவம் அகம்பாவம் பற்றி?
எ.சி.பி.தாஸ், திருத்துறைப் பூண்டி.

இளையராஜாவின் பதில்: அவ்வப்போது எங்கே தோன்றுகிறது? அது ஒன்றுதானே எப்போதும் கூட இருக்கிறது. அது இல்லை என்றால் இசை எப்படி வரும்?

நனறி குமுதம்.

இப்படி ஒரு பதிலை நமது இசை ஞானி திறமையாக பேசுவதாக நினைத்துக் கொண்டு பேசியுள்ளார். இது ஒரு ஏற்புடைய பதில்தானா? ஒருவனுக்கு திறமை இருந்தால் அவனுக்கு ஆணவமும் அகம்பாவமும் இருந்தே ஆக வேண்டும் என்ற நியதி இருக்கிறதா? அந்த தொனியில்தான் உள்ளது இவரது பதில்.

இசையை பொருத்த வரையில் இளையராஜா திறமையானவர்தான். அதில் மாற்றுக் கருத்து இல்லை. எம்.எஸ். விஸ்வநாதனுக்கும் கே.வி.மஹாதேவனுக்கும் அடுத்து தனது முத்திரையை மிக ஆழமாக தமிழ்த் திரையுலகில் பதித்தவர். ஹிந்திப் படங்களின் பாடல்களையே மாறுதலுக்காக கேட்டு வந்த காலங்களில் இவரது இசை அனைவரையும் திரும்பிப் பார்க்க வைத்தது. இதிலெல்லாம் எந்த குறையும் இல்லை.

ஆனால் ஒருவனின் திறமைக்கு அவனது ஆணவமும் அகம்பாவமும்தான் காரணம் என்பதை எவரும் ஒத்துக் கொள்ள முடியாது. இதற்கு உதாரணமாக ஏ.ஆர்.ரஹ்மானை சொல்லலாம். கடந்த இருபது வருடங்களாக தமிழக அளவில் அல்லாது இந்திய அளவில் அல்லாது உலக அளவில் தனது திறமையை பறை சாற்றி தமிழகத்துக்கு பெருமையை தேடித் தந்து கொண்டிருக்கிறார்.. இத்தனை வருடம் பணி செய்தாலும் யாரிடமும் எந்த நிலையிலும் ஆணவத்துடனோ அகங்காரத்துடனோ நடந்து கொண்டதை நாம் பார்க்கவில்லை. தனது முன்னேற்றத்திற்கும் திறமைக்கும் காரணம் இறைவன் அருளே என்கிறார். எவரிடம் பேசினாலும் பணிவோடும் அன்போடும் தான் என்ற அகங்காரம் இல்லாமலும் பேசுவதை பார்க்கிறோம்.

ஆணவமும் அகம்பாவமும் தான் ஒருவனின் திறமையின் அளவுகோல் என்றால் ரஹ்மான் திமிரின் உச்சத்தில் இருந்திருக்க வேண்டும்.

ஒருமுறை சிஎன்எனில் பேட்டியின் போது 'நீங்கள் இஸ்லாத்தை ஏற்றுக் கொண்டுள்ளீர்கள். ஆனால் இசை இஸ்லாத்தில் தடை செய்யப்பட்டதாக சொல்லப்படுகிறதே...இது பற்றி உங்கள் கருத்து?' என்று பேட்டியெடுத்த பெண்மணி கேட்டார். அதற்கு மிகவும் சமயோசிதமாக 'சாரி....இது பற்றி எனக்கு அதிகம் தெரியாது. இது சம்பந்தமாக நான் கருத்து எதுவும் கூற விரும்பவில்லை' என்று ஒதுங்கிக் கொண்டார். இதற்கு மாற்றாக அதற்கு விளக்கம் சொல்லப் போகிறேன் என்று ஏதாவது சொல்லப் போக அது மிகப் பெரிய பிரச்னையை உண்டு பண்ணும் என்பதை உணர்ந்து தனது நாவை பேணிக் கொண்டார்.

ஒரு மனிதனுக்கு சுய மரியாதை இருக்க வேண்டும். அதை எல்லோரும் விரும்புவோம். ஒரு முறை முன்பு ஜெயலலிதா முதல்வராக இருந்தபோது அரசு சம்பந்தப்பட்ட ஒரு படத்துக்கு இசை அமைக்க இளையராஜா பிரசாத் ஸ்டுடியோவுக்கு வருகிறார். முதல்வர் உள்ளே இருக்கிறார் என்பதால் பாதுகாப்பு காரணம் கருதி இளையராஜாவை வழியிலேயே நிறுத்தி நடந்து போக சொல்கின்றனர் பாதுகாப்பில் இருந்தோர். இதனை பொறுத்துக் கொள்ளாத இளையராஜா வண்டியை திருப்ப சொன்னார். தான் காலாகாலமாக இசையமைத்து வரும் ஒரு ஸ்டுடியோவில் என்னை இறங்கச் சொல்வதா? என்று கோபம் மேலிட்டது. கடைசியில் குடி சம்பந்தமாக அரசு எடுக்கும் அந்த படத்துக்கு இசையே அமைக்கவில்லை. இந்த தன்மான உணர்வு இருப்பதில் தவறில்லை.

அதேபோல் ஏ.ஆர்.ரஹ்மானை எடுத்துக் கொண்டால் இன்று வரை எவரது காலிலும் விழுந்ததில்லை. ஏனெனில் தனது தலையை ஒரு மனிதனின் காலடியில் வைப்பது தவறு என்பதை உணர்ந்திருக்கிறார். இறைவனுக்கு மாத்திரமே எனது தலை சாயும். சக மனிதருக்கு எனது சிரத்தை சாய்க்க மாட்டேன் என்பதில் உறுதியாக இருக்கிறார். இதுவும் பாராட்டப்பட வேண்டிய ஒன்று.

ஆனால் அதற்காக திமிரோடு நடப்பேன். அகம்பாவத்தோடு இருப்பேன். அதனால்தான் நான் திறமையான இசையை உங்களுக்கு கொடுக்கிறேன் என்று சொல்வது பெரியோர்க்கு அழகல்ல. இந்த எண்ணத்தை மாற்றிக் கொள்ள வேண்டும். தன்மானத்துக்கும் அகம்பாவத்துக்கும் சிறிய இடைவெளியே உள்ளது. தன்மானம் அளவுக்கு மீறி அதிகரித்தால் திமிரில் கொண்டு போய் விட்டு விடும். எனவே மிக கவனமாக நடந்து கொள்ள வேண்டிய இடம் இது. மனிதன் எந்த அளவு உயர்கிறானோ அந்த அளவு அவனுக்கு பணிவு வர வேண்டும். அது அவனது புகழை மேலும் மேலும் உயர்த்தும் என்பதை இசைஞானி உணர வேண்டும்.

-----------------------------------------

எண்பதத்தால் எய்தல் எளிதென்ப யார்மாட்டும்
பண்புடைமை என்னும் வழக்கு

குறள் 100:991

எல்லோரிடத்திலும் எளிமையாகப் பழகுவதால் பண்புடைமை எனும் நல்ல நெறியை அடைவது அனைவருக்கும் எளிதாகி விடும் என்கிறார் வள்ளுவர்.

------------------------------------------

'மனிதர்களை விட்டும் உனது முகத்தைத் திருப்பிக் கொள்ளாதே! பூமியில் கர்வமாக நடக்காதே! கர்வம் கொண்டு பெருமையடிக்கும் எவரையும் இறைவன் விரும்ப மாட்டான்'
-குர்ஆன் 31:18