பாவம் ஜனங்கள் கட்சியும், பீதியில் ஜெயிக்கும் பிளானும்

" என்னது, எங்க வீட்டு மேலேயே நானே பாம் வீசணுமா?" - கேள்வி கேட்ட திருநாவுக்கரசனை முறைப்பது போல பார்த்தார் பித்தளையழகன், பாவம் ஜனங்கள் கட்சியின் தமிழ் மாநிலத் தலைவர்.

"எலே, குமரா, இவங்கிட்ட ஒண்னும் சொல்லலையாலே..." என்று அருகிலிருந்த சகா எலை.குமரனைப் பார்த்து எரிச்சலாகக் கேட்டார்.

எலை.குமரன் உடனடியாக தலைவருக்கு அந்தப் பக்கமாக அமர்ந்திருந்த எஸ்.ஓஜாவைப் பார்த்து "நீங்க சொல்லலையா?"

"சொழ்ழேன்ல" என்றார் ஓஜா, வெற்றிலைப் பாக்கை மென்றபடி.

மீண்டும் திருநாவுக்கரசை தன்னருகே வரும்படி சைகையில் அழைத்தார். வெற்றிலையை கீழே துப்பினார்.

"இதோ பாரப்பா, நேத்து ஒங்கிட்டே சொன்னேன்ல, ஒனக்கு கட்சியில பெரிய ஆளா ஆவணும்னு ஆச இருக்கா இல்லியா?"

திருநாவுக்கரசு பவ்யமாக "இருக்குண்ணே " எனவும் ஓஜா தொடர்ந்தார்

"நாங்க சொல்றமாரி கேட்டீன்னா, வர்ர எலக்சென்ல ஒனக்கு பஞ்சாயத்து உறுப்பினராவ சீட்டு கெடக்கிம்; உங்க வீட்டு மேலே பாம் போடுவோம்; அத நீதான் ஏற்பாடு செய்யணும்"

";;;;;;;;;;;;;|"

"புரிஞ்சுதா, பாம் னா பயந்துராதே, பெட்ரோல் குண்டு தான். பெட்ரோலை ஒரு பாட்டில்ல ஊத்தி மூடி திரிய வெச்சு எரிய வெச்சுட்டு அதத் தூக்கி வீசறது தான்"

"ஆனா...." தலையைச் சொறிந்தான் திருநாவுக்கரசு "அதனாலே என்னங்க பிரயோஜனம்?"

"இருக்குலே .. "என்ற ஓஜா, கண்ணடித்தார். (நீ கேட்ட பணம் உனக்குக் கிடைக்கும் என்று அதற்கு அர்த்தம் என்று திருநாவுக்கரசு புரிந்துகொண்டான்). "முக்கியமா பெட்ரோல் குண்டு வீசறப்போ நீங்க யாரும் வீட்ல இருக்கக் கூடாது; வீசிட்டு, உடனே போய் போலிஸ் ஸ்டேஷன்ல கம்ப்ளைண்ட் கொடுத்துறனும்.

"என்னன்னு கொடுக்கணும்?"

"அத நீ எழுதறாமாதிரியே நாங்க ரெடியா எழுதி வெச்சிருக்கிறோம். அதுல என்னன்னா, இந்தமாதிரி எதிர்சமுதாயத்தச் சேர்ந்த தீவிரவாதிங்க உன்னை கொல்ல முயற்சி ன்னு இருக்கும் ; ஒனக்கும் ஒரு பப்ளிசிட்டி, என்ன நாஞ்சொல்றது!"

"சரி, போலிஸ் வந்து விசாரிச்சா..?"

"நாங்க சொல்லிக் கொடுக்கற மாதிரி சொன்னா போறும்; இந்த மாதிரி எதிர்சமுதாயத் தீவிரவாதிங்களால தீவிரவாதச் செயல்கள் அதிகரிச்சிட்டு வருது" ன்னு மறக்காம சொல்லிடணும். பீதி கெளப்புறது தான் முக்கிய நோக்கம்"

"அதனால என்னங்க ஆவும்"

"பலே, பலே, அப்டிக் கேளு" என்றார் எலை.குமரன். " உன் பேரு பேப்பர்ல வரும்டா, கட்சிலேயேயும் நீ ஃபேமஸாயிருவ; அப்புறம், அப்படி பீதி கெளப்பினோம்னா, அந்த எதிர் சமுதாயத்தப் பத்தி மோசமான எண்ணம் மக்களுக்கு வரும்; முக்கியமா, நம்ம சமுதாயக் கட்சின்னு நமக்கு ஓட்டு விழும், நாம ஜெயிப்போம் -புரியுதா?"


"ஆனா நம்ம சமுதாயம் ஒன்னுதிரண்டு நமக்கு ஓட்டுப் போடும்னு நெனக்கிறீங்களா சாமி?"

"அதுக்குத் தாண்டா சொல்றோம்... ............. பயலே, நாங்க சொல்றமாதிரி செய், நம்ம தலைவரு கேடி போட்ட ரூட்டு இது.

"அண்ணே, பேசிக்கிட்டிருக்கும் போதே கோவப்படுறீங்க, சாதியத் திட்டிப் பேசறீங்களே.."

"சரி வுடு, நாமெல்லாம் ஒண்ணுமண்ணு தானேடா, என்ன ஒண்ணு நாங்க என்னத்த சொன்னாலும் உங்க ஜாதிக்காரவங்க எங்களுக்கு ஓட்டுப் போட மாட்டீங்களேடா"

"எங்க ஜாதி மட்டுமா; உங்க பெரிய ஜாதிக் காரவங்க கூட நம்ம கட்சிக்கு ஓட்டு போட மாட்றாய்ங்க சாமி"

"ஆங்.. மறந்துட்டேன்; தப்பித் தவறி போலிஸ் கண்டுபிடிச்சுடுத்துன்னு வை, இப்படிலாம் பேசிக்கிட்டோம்னுலாம் சொல்லப்படாது; 'எனக்கு ஃபேமஸாவனும்னு ஆச; அதான், எங்கூட்ல நானே பாம் போட்டேன்"னு சொல்லோணும்., புரிஞ்சுதா"

"சரிங்கைய்யா" என்று கிளம்பிச் செல்ல இருந்தவனை ஓஜா மறுபடி அழைத்தார்.

" உன் பொஞ்சாதியிட்டயும் சொல்லிவை; இந்தமாதிரி, பாம் வெடித்து கூந்தல் நுனி கருகிடுச்சு" அப்படி ஏதாச்சும் பேட்டி கொடுக்கணும்"

"சரிண்ணே" என்று திருநாவுக்கரசு கிளம்பியதும்

ஓஜா எலை.குமரனைப் பார்த்து சொன்னார் : 'பீதியில் ஜெயிக்கும் பிளான்" - நம்ம தலைவர் கேடிய சும்மா சொல்லக்கூடாதுங்க"

"ஓஜா, என்னதான் கேடி ப்ளான் போட்டு கொடுத்தாலும், எலக்க்ஷண்ல ஜெயிச்சோம்ணா, நம்ம கில்லாடி தாங்க பிரதமர் ஆவணும், ரொம்ப நாள் தலைவரா இருந்தவரு அவர் தானே, அதாங்க ஞாயம்"

"அட விடுங்க எல, அவரா முக்கியம், காரியம் தானே முக்கியம். ஆமா, காஸ்மூஸ் கட்சி என்ன பிளான் பண்ணப் போறாய்ங்களாம்.ஏதாச்சும் தெரியுமா?"

"நம்ம கரன்சி மதிப்பு கொறஞ்சிட்டு வருதுல்ல; அவங்க கவலை அவங்களுக்கு; ஊழல் வேற அவங்களுக்கு எதிரா இருக்குது"

நமுட்டுச் சிரிப்பு சிரித்தார் பித்தளையழகனார் (நம்ம கட்சியில் இல்லாத ஊழலா? என்பது போல)." தங்காருவும், அடிபட்டாரப்பாவும் நம்ம கட்சிலயும் இர்க்காங்கெடே" என்றார் மெதுவாக. "அதனால, ஊழல்ப் பத்தி பேசறதுனால மக்கள்ட்ட அதுலாம் எடுபடாது"

"அப்ப, கரன்சி மதிப்பு பத்தி பேசலாமா?"

"பேசலாம்டே, ஆனா, மக்களுக்கு நல்லா புரிஞ்சிருக்கு, நம்ம 'பாவம் ஜனங்கள் கட்சி'க்கும் இப்ப ஆட்சி செய்ற காஸ்மூஸ் கட்சிக்கும் எந்த வித்தியாசமும் இல்லங்கறது. என்ன ஒண்ணு, நாம பெரும்பான்மை மக்களுக்குன்னு உள்ள கட்சின்னு சொல்லிக்கறோம்,அவிங்க சிறுபான்மைய்ங்களையும் சேர்த்துகறாங்க, அவ்ளோதான் வித்தியாசம்"

"அப்ப பீதிய கெளப்பி வுடறது தான் இப்ப பிளானா?"

"பின்னே, அதத்தானே செஞ்சிட்டிர்க்கோம்; தலைவர் கேடியும் அதத்தானே சொல்லிருக்காரு"

இவர்கள் பேசிக்கொண்டிருக்கும் போதே கவிதாயினி கர்நாட்டிக்இசை அழகுராணி உள்ளே நுழைகிறார்.

"வாங்க கவிஞரே, இந்த எலக்க்ஷனுக்கு ஒரு ஸ்லோகம் சொல்லுங்க"

"எப்புடி, நாடு ஒளிர்கிறது -ன்னு முன்னே சொன்னேமே, அப்படியா?"

"ஆனா, நாம இப்ப எதிர்கட்சி, ஞாவகமிருக்கட்டும்"

"ஓ, அதெல்லாம் மறப்பேனா,யோசித்தார், பின்பு "நாரத நாடு; நாறுது பாரு!" ன்னு வெச்சுக்குங்கோ." என்றார்.

- Nazee

http://www.inneram.com/opinions/politics/1579-short-story.html