சிறந்த முன்னுதாரணமாக திகழும் ஆம்ஸ்ட்ராங் பமே!

சிறந்த முன்னுதாரணமாக திகழும் ஆம்ஸ்ட்ராங் பமே!

நாகாலாந்த் - மணிப்பூர் மாநிலங்களைச் சேர்ந்த ஐஏஎஸ் ஆபிசர் மற்றவர்களுக்கு ஒரு முன்னுதாரணமாகத் திகழ்கிறார். 100 கிலோ மீட்டர் ஹைவே பாதையை அரசு உதவியில்லாமல் தனது சொந்த முயற்சியால் முன்னெடுத்து இன்று முடிக்கும் தருவாயில் உள்ளார்.

ஆம்ஸ்ட்ராங் பமே 2005ல் டெல்லி செயின்ட் ஸ்டீபன் கல்லூரியில் படித்து பட்டம் பெற்றார். மலைசாதி பிரிவைச் சேர்ந்தவர். மிகவும் ஏழ்மையான குடும்பத்தில் பிறந்தவர். இவரது தந்தை ஒரு பள்ளி ஆசிரியர். கிடைக்கும் சொற்ப வருமானத்தில் சிரமத்துடனே தனது கல்லூரி படிப்பை முடித்துள்ளார். பல நேரங்களில் வெறும் பிஸ்கட்டை சாப்பிட்டு தனது கல்லூரி நாளை கழித்துள்ளார் ஆம்ஸ்ட்ராங்.

கடந்த ஜுன் ஜுலை மாதங்களில் டமீங்லாங் மாவட்டத்தில் டைபாய்டு ஜுரத்தால் 500க்கு மேற்பட்ட மக்கள் பாதிக்கப்பட்டனர். பலர் உயிரிழந்தனர். சரியான சாலை வசதியில்லாததால் எந்த மருத்துவரும் இந்த மாவட்டத்துக்கு வரவில்லை. துணை கலெக்டரான ஆம்ஸ்ட்ராங் தனது நண்பர்களின் உதவியை நாடினார். இதில் இவரது தோழி ஒருவர் உதவ முன் வந்தார். அவரின் உதவியால் பலரது உயிர் காப்பாற்றப்பட்டது. சாலை வசதியில்லாததால் எந்த அளவு மக்கள் சிரமத்தை சுமக்கின்றனர் என்பதை உணர்ந்து இதற்கு தீர்வு காண முயற்சித்தார்.

மத்திய அரசு 1982 ஆம் ஆண்டு சாலை பணிக்காக 101 கோடியை ஒதுக்கியது. பல காரணங்களால் இந்த முயற்சி கைவிடப்பட்டது. போன முறை இங்கு வந்த அமைச்சர் சிதம்பரம் 'ஏன் இந்த சாலை இன்னும் சரி செய்யப்படவில்லை' என்று மாநில அரசை கேட்டார். ஏதேதோ சொல்லி அரசு அன்று சமாளித்து விட்டது.

'60 கிலோ மீட்டர் தூரத்தில் இருக்கும் ரேஷன் கடைக்கு அரிசி வாங்க மலை பாதைகளில் நடந்தே செல்வோம். 25 கிலோ அரிசி மூட்டையை வீட்டுக்கு கொண்டு வந்து சேர்க்க இரண்டு மூன்று நாட்களாகும். இந்த ஒரு மூட்டை அரிசியை ஒரு மாதத்துக்கு வைத்து சரி செய்து கொள்வோம். அந்த அளவு வறுமை எங்களை வாட்டியது' என்கிறார் இவரது தம்பி. இவர் டெல்லி பல்கலைக் கழகத்தில் துணை பேராசிரியராக வேலை பார்க்கிறார்.

'நானும் எனது மனைவியும் ஒரு மாத சம்பளத்தை நன்கொடையாக தந்தோம். எனது அண்ணன் ஆம்ஸட்ராங் தனது ஐந்து மாத சம்பளத்தை நன்கொடையாக தந்தார். எங்களது தாயார் எங்களின் தந்தையின் பென்சன் பணத்தில் ஒரு மாத தொகையை நன்கொடையாக தந்தார். இதை வைத்து எங்கள் குடும்பத்திலிருந்து இந்த பாதை அமைக்கும் பணியை தொடர்ந்தோம்.

இவர்களின் குடும்பத்தின் மொத்த உறுப்பினர்களும் அர்ப்பணிப்போடு இந்த பணியில் ஈடுபட்டனர். புல்டோசர் ஒன்றை வாடகைக்கு எடுத்தனர். மண் அள்ளும் எந்திரம் இரண்டு வாங்கினர். ஆனால் வசூலான தொகை போதுமானதாக இல்லை. எனவே ஃபேஸ் புக்கில் ஒரு கணக்கு தொடங்கப்பட்டது. கோரிக்கையும் வைக்கப்பட்டது. மூன்றே நாளில் 1.2 லட்சம் வசூலானது. கிராம மக்களும் தங்களால் இயன்ற நன்கொடைகளை தந்துதவினர். அதோடு உடல் உழைப்பையும் இலவசமாக தர முன் வந்தனர். நன்கொடை சென்டர்கள் பெங்களூர், சென்னை, டெல்லி, புனே, கௌஹாத்தி, ஷில்லாங், கனடா, யுஎஸ, லண்டன் என்று திறக்கப்பட்டன. தொகையும் ஓரளவு சேர்ந்தது. ஆகஸ்டில் வேலை தொடங்கியது. இடையில் மழையால் சிறிது வேலை தடைபட்டது. தற்போது 70 கிலோ மீட்டர் வேலை முடிந்து விட்டது. இன்னும் பாக்கி இருப்பது 30 கிலோ மீட்டரே!

மனிதன் முயற்சித்தால் எதையும் சாதித்து காட்டுவான் என்பதற்கு ஆம்ஸ்ட்ராங் சிறந்த உதாரணமாக திகழ்கிறார். இவரைப் போன்ற ஆயிரமாயிரம் இளைஞர்கள் வாய்ப்புக்காக காத்திருக்காமல் வாய்ப்புகளை உருவாக்கிக் கொள்ள முயற்சிக்க வேண்டும். எதற்கெடுத்தாலும் அரசை குறை சொல்வதை விட்டு விட்டு

'நாடென்ன செய்தது நமக்கு என கேள்விகள்

கேட்பது எதற்கு?

நீ என்ன செய்தாய் அதற்கு என நினைத்தால்

நன்மை உனக்கு'

என்று சிந்திப்போமா!

http://articles.timesofindia.indiatimes.com/2012-11-03/india/34892690_1_tamenglong-village-motorable-road

இட ஒதுக்கீடுகளினால் விளைந்த பல நன்மைகளில் இதுவும் ஒன்று. ஆதிக்க சாதிகள் மட்டுமே கோலோச்சி வந்த ஐஏஎஸ் பதவிகளில் ஒடுக்கப்பட்ட சமூகத்துக்கு பிரதிநிதித்துவம் கொடுத்ததால் இன்று ஒரு மாவட்டமே பயனடைந்துள்ளது. இவரைப் பார்த்து நம்மூர் சகாயத்தைப் பார்த்து அரசு அதிகாரிகள் திருந்த வேண்டும்.

---------------------------------------------------------

இதே மணிப்பூரில் சிபிஎஸ்ஸி தேர்வில் 2012 ஆம் ஆண்டில் முதலிடத்தை பிடித்த முஹம்மது இஸ்மத். தனது லட்சியம் தனது நாட்டுக்காக உழைப்பதே என்று சொன்னது நெகிழ்ச்சியூட்டுவதாக இருந்தது.



http://www.youtube.com/watch?v=DBl-QIcpPC8