ரஜினி - ஜெயலலிதா சண்டை திரும்பவும் தொடங்குமா?

ரஜினி - ஜெயலலிதா சண்டை திரும்பவும் தொடங்குமா?



“புரட்சித் தலைவி ஜெயலலிதா முதல்வராகப் பதவியேற்ற பிறகு அவருக்குப் பாராட்டு விழா நடத்த சினிமாக்காரர்கள் ஆசைப்பட்டோம், ஆனால் அதை மறுத்துவிட்டார்கள், இப்போது அந்த வாய்ப்பு வந்திருக்கிறது….. ஜெயா டிவியில் சோவின் எங்கே பிராமணன், தொடரை நான் விரும்பிப் பார்ப்பேன். சோ கொடுக்கிற விளக்கங்கள் நல்லா இருந்தது. ஆனா அதுக்கப்புறம் நின்னுடுச்சி. நான்கூட சோ கிட்ட, ஏன் நிறுத்திட்டீங்கன்னு கேட்டேன். அதுக்கு அவர் சொன்னார், 'சிஎம் கூட என்கிட்ட கேட்டாங்க்.. ஆனா எனக்குத்தான் நேரமில்லே'ன்னார். இந்தத் தமிழ்நாட்ல, சிஎம் சொல்லியும் கேட்காத ஒரு ஆள் இருக்கார்னா அது சோ சார்தான்.

இந்த மரணம் என்பது இயற்கையானது. எல்லாருக்கும் வரக் கூடியது. இந்த மரணம் ஒரு தடவைதான் என்றில்லை... ரெண்டு முறை நிகழும். அதாவது உயிர் உடலைவிட்டு போனா முடிஞ்சது...அவ்வளவுதான்.

. மரணமே இல்லாத சில பேர் இருக்காங்க. அவங்க ஒரு பர்சன்ட்தான். அவங்க வாழும்போதும் சரி, இறந்து போன பிறகும் சரி, அவங்க பேரும் புகழும் எப்பவுமே நிலைச்சிருக்கும். அவங்கள்லாம் சாகாவரம் பெற்றவர்கள். தனிப்பிறவி.

இன்று அரசியலில் என்னுடைய ஆருயிர் நண்பர் மதிப்பிற்குரிய டாக்டர் கலைஞர் அவர்கள், புரட்சித் தலைவி ஜெயலலிதா அவர்கள், விஸ்வநாதன் ராமமூர்த்தி... இவங்களுக்கெல்லாம் வெற்றி தோல்வி போன்றவை எந்த பாதிப்பையும் ஏற்படுத்தாது.

இவங்களைப் பொறுத்தவரை வெற்றியடைஞ்சா சந்தோஷம் இருக்கும். தோல்வியடைஞ்சா மனசு கொஞ்சம் வருத்தப்படும். ஆனா அவங்க பேருக்கும் புகழுக்கும் எந்த பாதிப்பும் வராது.
ஏன்னா... அதையெல்லாம் தாண்டிய நிலையில் இருப்பவர்கள் இவர்கள். வெற்றி, தோல்விகளை தாங்கிக்கொள்ளும் சமமான மனநிலையில இருப்பாங்க.அவங்க வாழ்ந்த காலத்துல நானும் வாழ்ந்திருக்கேன். அவங்க கூட பழகியிருக்கேங்கிற சந்தோஷத்தோட,இந்த விழாவுல எனக்கு பேச வாய்ப்பளித்த அனைவருக்கும் என் நன்றியை தெரிவித்துக்கொண்டு, முதல்வர் புரட்சித் தலைவி அவர்கள் இன்னும் மக்களுக்கு நிறைய சேவை செய்து, இந்தியா மட்டுமில்லே உலக அளவில் அவர் பேரும் புகழும் பெறவேண்டும், அதற்கு தேவையான நல்ல ஆரோக்கியத்தையும் மனநிம்மதியையும் இறைவன் அவருக்கு வழங்கவேண்டும் என்று வேண்டிக்கொண்டு விடைபெறுகிறேன்."

இவ்வாறு மெல்லிசை மன்னர் விஸ்வநாதன் ராமமூர்த்திக்கு நடைபெற்ற பரிசளிப்பு விழாவில் ஹைலைட்டாக பேசி பரபரப்பை கிளப்பியுள்ளார் ரஜினி காந்த். ஜெயலலிதாவுக்கு முன்னால் கருணாநிதியை உயர்த்திப் பேசுவதற்கும் ஒரு தில் வேண்டும். அது ரஜினியிடம் உள்ளது. பல பேர் நினைப்பது போல் இது பெரும் பிரச்னையாக மாற வாய்ப்பில்லை. ஏனெனில் இதற்கு முன் ரஜினியை பகைத்துக் கொண்டு அதனால் தேர்தலில் ஏற்பட்ட தோல்வியை அவ்வளவு லேசில் மறந்து விடுபவர் அல்ல ஜெயலலிதா. எனவே இந்த பிரச்னையை ஆறப் போடவே ஜெயலலிதா தரப்பு முயற்ச்சிக்கும் என்பது எனது கணிப்பு.

"நான் சொன்னால் இந்த விருதினை அளிக்கும் காலம் கனியும். அப்போது இவர்களுக்கு பத்மா விருதுகள் கிடைக்கச் செய்வேன் என்பதை மட்டும் இந்த நேரத்தில் நான் தெரிவித்துக் கொள்கிறேன்."

எம்.எஸ். விஸ்வநாதனுக்கு மத்திய அரசின் விருதுகள் கிடைக்கவில்லை என்பதற்காக ஜெயலலிதா உதிர்த்த முத்தான வார்த்தைகள்தான் இது. இன்னும் 'நான்' என்ற அகந்தை அகலாதது இவரிடம் உள்ள பெரும் குறை. அதுதான் இவருக்கு பல எதிரிகளை சம்பாதித்து கொடுத்துள்ளது. இனி வரும் காலங்களிலாவது இது போன்ற வார்த்தைப் பிரயோகங்களை தவிர்ப்பார் என்று நம்பலாம்.

மற்றபடி இறப்பை பற்றி ரஜினி சொன்ன கருத்துகளில் நான் மாறுபடுகிறேன். ஜெயலலிதாவோடு ஒப்பிடும் போது பொது நலத்தில் கருணாநிதி எந்த வகையிலும் குறைவானவர் இல்லை என்பது எனது கணிப்பு. எப்படியோ இன்னும் சில வாரங்கள் பரபரப்பாக செய்திகளை தர விஷயம் கிடைத்தாகி விட்டது. :-) (நம் பதிவர்களுக்கும் சேர்த்துதான்.)