நடிகர் மம்முட்டியை கடவுளாக்கலாமா!

கும்பகோணத்தில் ஒரு தனியார் பள்ளியில் தீவிபத்து ஏற்பட்டு 90க்கும் அதிகமான குழந்தைகள் பலியானார்கள். விஜயகாந்த், சரத்குமார் உள்ளிட்ட ஹீரோக்கள் ஓடிப்போய் அஞ்சலி செலுத்தி மாலை மாலையாய் கண்ணீர் விட்டார்கள். ஆளாளுக்கு லட்சக் கணக்கில் நிதி உதவி அளிப்பதாக அறிக்கை விட்டார்கள். ஆனால் எல்லாமே வெறும் வேஷமாகிப்போனது ஒரு சில நடிகர்கள் தவிர மற்ற யாருமே பணம் அனுப்பவில்லை. சிலர் கொடுத்த காசோலைகள் திரும்பி வந்தது. திரைக்கு வெளியேயும் தங்களை சிறந்த நடிகர்களாக நிரூபித்தார்கள் ஹீரோக்கள்.

இப்போது சிவாகாசி பட்டாசு தொழிற்சாலையில் ஏற்பட்ட விபத்தில் 38 பேர் இறந்துள்ளனர். நிதி உதவி அளிக்க வேண்டாம். அல்லது அளிப்பதாக வெட்டி பந்தா அறிக்கை விட வேண்டாம். குறைந்த பட்சம் அனுதாப செய்தியாவது வெளியிட்டார்களா என்றால் இல்லை. எங்கே பணம் கொடுக்க வேண்டியது வருமோ என்று யாரும் வாய் திறக்கவில்லை. "என்னை வளர்த்து ஆளாக்கிய மக்களுக்கு நான் என்ன கைமாறு செய்யப்போகிறேன்" என்று புலம்பிய சூப்பர் ஸ்டார்கூட இப்படி ஒரு சம்பவம் நடந்ததை கண்டுகொள்ள வில்லை. சிவகாசி என்ற படத்தில் நடித்த விஜய்க்கு, காஜல் அகர்வாலோடு டூயட் பாடுவதற்குதான் நேரம் இருக்கிறது. அவரது கவலை இப்போது அவரது துப்பாக்கி தீபாவளிக்கு வெடிக்குமா வெடிக்காதா என்பது பற்றித்தானே தவிர சிவாகாசி பட்டாசை பற்றியும், அங்கே வெடித்து சிதறிய அப்பாவி தொழிலாளர்களையும் பற்றி அல்ல.

ஆனால் இந்த ஹீரோக்களின் முகத்தில் அடித்த மாதிரி ஒரு காரியத்தைச் செய்திருக்கிறார் மலையாள சூப்பர் ஸ்டார் மம்முட்டி. யாரும் கேட்காமல், யாரும் கோரிக்கை வைக்காமல் தனது மருந்து கம்பெனியில் இருந்து சுமார் 35 லட்சம் மதிப்புள்ள தீக்காய மருந்துகளை சிவகாசிக்கு அனுப்பி வைத்திருக்கிறார் மம்முட்டி.

தீகாயங்களுக்கான மருந்து தயாரிப்பதில் மம்முட்டிக்கு சொந்தமான பதஞ்சலி ஆயுர்வேத மருந்து தொழிற்சாலை புகழ்பெற்றது. அக்னிஜித் என்ற மருந்து ரொம்பவே பிரபலம். இந்த மருத்துவமனைக்கு சிவகாசி மருத்துவமனையிலிருந்து அக்ஜினித் மருந்து கேட்டு 35 லட்சம் ரூபாய்கு ஆர்டர் கொடுத்தது. இதைக் கேள்விப்பட்ட மம்முட்டி சிவாகாசிக்கு தேவையான அனைத்து தீக்காய மருந்துகளையும் இலவசமா அனுப்பி வைக்கும்படியும். இன்னும் மருந்துகள் எவ்வளவு தேவைப்படுகிறதோ அவை அனைத்தையும் அனுப்பி வைக்கும்படியும் உத்தரவு பிறப்பித்துள்ளார்.

மேலும் வெடி விபத்தில் காயமடைந்த, 40 பேருக்கு, இலவச ஆயுர்வேத மருத்துவ சிகிச்சைக்கு, பிரபல நடிகர் மம்முட்டி ஏற்பாடு செய்துள்ளார். கேரளா, கொச்சியில், நடிகர் மம்முட்டி நிர்வகித்து வரும், "பதஞ்சலி ஹெர்பல்ஸ் என்ற நிறுவனத்தின் சார்பில், காயமடைந்தவர்களுக்கு, "அக்னி ஜித்து என்ற, மருத்துவ சிகிச்சை இலவசமாக வழங்கப்பட உள்ளது. இந்த சிகிச்சைக்கு, 25 லட்சம் ரூபாய் செலவாகும்.

இலவச மருத்துவ சிகிச்சை அளிக்க, ஏற்பாடு செய்துள்ள நடிகர் மம்முட்டிக்கு நேற்று பிறந்தநாள். இதுதொடர்பாக, நடிகர் மம்முட்டி கூறுகையில், ""நான், எந்த ஆண்டிலும் பிறந்த நாளை கொண்டாடியதில்லை. இவ்வாண்டும் அப்படியே. சிவகாசி வெடி விபத்து குறித்து அறிந்ததும், மிகுந்த வேதனை அடைந்தேன். காயமடைந்தவர்களுக்கு, நம்மால் முடிந்த உதவிகளை செய்யலாம் என நினைத்து, மருத்துவ சிகிச்சைக்கு ஏற்பாடு செய்துள்ளேன், என்றார்.

தமிழ் ஹீரோக்களே சினிமாவில் மட்டுமல்ல... நிஜத்திலும் ஹீரோவாக இருக்க முயற்சி செய்யுங்கள்.
தினமலர்

08-09-2012

----------------------------------------------

கூத்தாடிகளில் ஒரு வித்தியாசமானவராக தெரிகிறார் மம்முட்டி. நம் ஊர் கூத்தாடிகள் கோடிகளில் புரண்டாலும் பணத்தை வெளியில் எடுக்க அஞ்சும் நிலையில் மம்முட்டியின் இந்த செயலை எவ்வளவு பாராட்டினாலும் தகும். ஆனால் அதற்கும் ஒரு எல்லை உண்டு.

அம்மு - salem ,IndiaSep 8 2012 10:33AM
தலை வணங்குகிறேன் தலைவா

Dharmar - Sivakasi ,IndiaSep 8 2012 10:21AM
GOD = MAMMOOTY

பாலாஜி - dubai ,IndiaSep 8 2012 10:10AM
ரியல் ஹீரோ தலை வணங்குகிறேன் எங்கே நம் மானம் கெட்ட ஹீரோக்கள் வெட்கபடுகிறேன்

"உடுக்கை இழந்தவன் கைபோல ஆங்கே
இடுக்கண் களைவதாம் நட்பு"

என்ற வள்ளுவரின் வாக்குக்கேற்ப உதவி செய்த மம்முட்டியை நாம் எவ்வளவு பாராட்டினாலும் தகும். ஆனால் நம் உடன் பிறப்புக்கள் எவ்வாறு வாழ்த்துகிறார்கள் என்பதற்கு சில சாம்பிள்கள் மேலே. 'தலை வணங்குகிறேன் தலைவா' 'காட் மம்முட்டி' என்று ஏகத்துக்கும் அதிகமாக புகழ்ந்து அவரை கடவுள் ஸ்தானத்திற்கு கொண்டு செல்வது ஏற்புடையதுதானா? நம் தமிழர்கள் ஏன் இப்படி எதற்கெடுத்தாலும் அதிகமாக உணர்ச்சி வசப் படுகிறார்களோ தெரியவில்லை.

இப்படி கடவுளுக்கு இலக்கணம் என்ன என்று தெரியாமல் நடிகர்களையும் போலி சாமியார்களையும், போலி ஹஜ்ரத்மார்களையும், போலி பாதிரிகளையும் நம்பி வாழ்க்கையை தொலைக்கும் தமிழர்கள் திருந்துவது எந்நாளோ அந்நாளே 'தமிழன் என்றோர் இனமுண்டு தனியே அதற்கோர் குணமுண்டு' என்று பெருமைபட்டுக் கொள்ள முடியும்.

தேடி சோறு நிதம் தின்று,

பல சின்னஞ் சிறு கதைகள் பேசி,

மனம் வாடி துன்பமிக உழன்று

பிறர் வாட பல செயல்கள் செய்து

நிறை கூடி கிழப் பருவம் எய்தி

கொடும் கூற்றுகிரை என பின் மாயும்

பல வேடிக்கை மனிதரை போல்

நான் வீழ்வேன் என நினைத்தாயோ!

இந்த வரிகளை பாரதி தன் ஒருவனுக்கு மட்டும் சொல்லிக் கொள்ளவில்லை. ஒட்டு மொத்த தமிழினத்துக்கும் சொல்கிறார். ஒரு மனிதனுக்கு சுய மரியாதையையும் அயராத முயற்சியையும் அழகாக ஊட்டுகின்ற ஒரு பாடல்.

ஆனால் நாமோ 100 நாள் வேலையில் கிடைத்ததை வாங்கிக் கொண்டு பாதியை டாஸ்மார்க்கிலும் மீதியை கூத்தாடிகள் தலையிலும் கொட்டி விட்டு 'ஙே' என்று அசடு வழிந்து கொண்டிருக்கிறோம். இந்த நிலை மாறும் நாள் எப்போது?