கால்பந்தாட்டம் விளையாட தலை திறந்திருக்க வேண்டுமா?

கால்பந்தாட்டம் விளையாடுவதற்கு உடல் ரீதியாக எந்த பாதிப்பும் இல்லாமல் இருப்பதுதான் தகுதியாக இதுவரை இருந்து வந்தது. ஆனால் தற்போது ஃபிஃபாவின் ஒரு அறிவிப்பு பெரும் கண்டனத்துக்கு உள்ளாயிருக்கிறது. கால்பந்தாட்டம் ஆடுபவர்கள் இனி தலையை மூடாமல் திறந்தவாறு விளையாட வேண்டும். இந்த சட்டத்தை கடை பிடிக்காதவர்கள் போட்டியிலிருந்து விலக்கப்படுவார்கள். தலையில் முக்காடிட்டு விளையாடுவது வீராங்கனைகளின் பாதுகாப்புக்கு அச்சுறுத்தல் என்பதே பிரதான காரணம்' என்கின்றனர் ஃபிஃபா அமைப்பினர்.

2012ல் நடக்கவிருக்கும் ஒலிம்பிக் போட்டிக்கான தகுதி சுற்றில் ஜோர்டான் அணியோடு மோத விடாமல் ஈரான் பெண்கள் அணியை திருப்பி அனுப்பியுள்ளது ஃபிஃபா அமைப்பு. திறமையிருந்தும் போட்டியிலிருந்து விலக்கியதால் அந்த வீராங்கனைகள் மனம் உடைந்து கலங்குவதைத்தான் மேலே நாம் பார்க்கிறோம். இது எந்த வகை நியாயம்? உடையை தேர்ந்தெடுப்பது சம்பந்தப்பட்டவரின் உரிமையல்லவா? வீராங்கனைகளின் உயிருக்கு இதனால் ஆபத்து என்று எந்த மருத்துவராவது விளக்கியுள்ளனரா? ஒன்றும் இல்லை. விளையாட்டில் ஈடுபடும் வீராங்கனைகள் யாரிடமாவது வந்து 'எங்களுக்கு முக்காடு அணிவது விளையாட்டுக்கு சிரமமாக இருக்கிறது' என்ற கோரிக்கையாவது வைத்தார்களா என்றால் அதுவும் இல்லை. கிரிக்கெட்டில் நமது நாட்டில் ஹர்பஜன் சிங் தலையை மறைத்து விளையாடியதில் ஏதும் சிரமம் இருப்பதாக சொல்லியிருக்கிறாரா. இல்லை.

இஸ்லாத்தை கொச்சைப் படுத்த வேண்டும் என்ற கீழ்த்தரமான நோக்கத்தைத் தவிர இவர்களுக்கு வேறு காரணங்கள் இல்லை.

ஈரான் அதிபர் அஹ்மத் நஜாத் செய்தியாளர்களிடம் கூறும்போது 'எங்கள் நாட்டு பெண்களுக்கு அநீதி இழைக்கப்பட்டுள்ளது. தங்களின் ஆபாசமான உடையை மற்றவர்களின் மீது திணிக்கும் சர்வாதிகார நடவடிக்கை என்றே இதனை பார்க்கிறேன். சட்டப்படி இதனை கொண்டு சென்று எங்கள் நாட்டு வீராங்கனைகளுக்கு நியாயம் கிடைக்கச் செய்வோம்' என்கிறார்.

'எங்களை போட்டியிலிருந்து விலக்கினாலும் எங்களின் குர்ஆன் கூறும் கட்டளைக்கு முன்னால் உங்களின் கட்டளை எங்களின் கால் தூசுக்கு சமானம்' என்று கூறும் இந்த வீராங்கனைகள் கண்டிப்பாக பாராட்டத்தக்கவர்கள். இதனால் ஒலிம்பிக்கில் மெடல் கிடைக்கும் சந்தர்ப்பம் வீணாணாலும் சொர்க்கத்தில் நிச்சயம் இவர்களுக்கு இதைவிட சிறந்த பரிசை இறைவன் தந்தருள்வான்.

சானியாமிர்ஸா முதற் கொண்டு பல வீராங்கனைகள் விளையாடும்போது விளையாட்டை விட அவர்களின் உடலை ரசிக்கத்தான் கூட்டம் கூடுகிறது. இதை இந்த ஆர்வலர்களின் வக்கிரத்தை யுடியூபில் எந்த மாதிரி போஸ்களை வெளியிடுகிறார்கள் என்பதிலிருந்தே தெரிந்து கொள்ளலாம்.

உடலை கவர்ச்சியாக காட்டினால்தான் விளையாட அனுமதிப்பேன் என்பது போட்டி நடத்துபவர்களின் வக்கிரபுத்தியையும் காட்டுகிறது. வழக்கில் வென்று ஈரானிய பெண்கள் ஒலிம்பிக்கில் கலந்து கொள்ள நாமும் வாழ்த்துவோம்.

'உங்களுக்கு நன்மை ஏற்பட்டால் அது அவர்களுக்கு கவலையை ஏற்படுத்துகிறது. உங்களுக்குத் தீங்கு ஏற்பட்டால் அதனால் அவர்கள் மகிழ்கின்றனர். நீங்கள் சகித்துக் கொண்டு இறைவனை அஞ்சினால் அவர்களின சூழ்ச்சி உங்களுக்கு எந்தத் தீங்கும் தராது. அவர்கள் செய்வதை இறைவன் முழுமையாக அறிபவன்'

-குர்ஆன் 3:120