குர்ஆனும் தாயுமானவரடிகளின் உவமையும்!

அல்லாஹ் வானங்கள் பூமிக்கு ஒளி (ஏற்படுத்துபவன்) அவன் (ஏற்படுத்தும்) ஒளிக்கு உவமை விளக்கு வைக்கப்பட்டுள்ள மாடம் போன்றதாகும். அவ்விளக்கு ஒரு கண்ணாடி(க் குவி)யில் இருக்கிறது; அக் கண்ணாடி ஒளிவீசும் நட்சத்திரத்தைப் போன்றதாகும். அது பாக்கியம் பெற்ற ஜைத்தூன் மரத்தி(ன் எண்ணெயி)னால் எறிக்கப் படுகிறது. அது கீழ்த்திசையை சேர்ந்ததுமன்று; மேல்திசையை சேர்ந்ததுமன்று. அதனை நெருப்புத் தீண்டாவிடினும், அதன் எண்ணெய் ஒளி வீச முற்படும், (இவை எல்லாம் சேர்ந்து) ஒளி மேல் ஒளியாகும். அல்லாஹ் தான் நாடியவரை தன்னுடைய ஒளி (என்னும் சத்தியப்பாதை)யின் பால் நடத்திச் செல்கிறான். மனிதர்களுக்கு இத்தகைய உவமைகளை அல்லாஹ் தெளிவுபடுத்துகிறான். அல்லாஹ் யாவற்றையும் நன்கு அறிபவன்.

குர்ஆன் 24:35

இறைவன் இங்கு ஒளியை நேரிய இஸ்லாமிய மார்க்கத்திற்கும், அதன்படி மனிதர்கள் செயல்பட வேண்டும் என்றும் உதாரணத்தின் மூலம் விளக்குகிறான். இதே உதாரணத்தை நமது தமிழ் சித்தர் பாடல்களிலும் ஆங்காங்கு பார்க்க முடிகிறது.

தாயுமானவடிகள் திருப்பாடல்கள் -1

9. பொருளியல்பு

கைவிளக்கின் பின்னேபோய்க் காண்பார்போல் மெய்ஞ்ஞான
மெய்விளக்கின் பின்னேபோய் மெய்காண்ப தெந்நாளோ.


கையில் விளக்கினை ஏற்றிக்கொண்டு அவ்வெளிச்சத்தின் பின்னே சென்று தனக்கு வேண்டும் உலகியற் பொருள்களைக் காண்பார் போன்று, மெய்யுணர்வு என்று சொல்லப்படுகிற திருவருள் விளக்கை முன்வைத்து அவ்வருள் வெளிச்சத்தின் பின் சென்று மெய்ப்பொருளாம் இறைவனின் சீரிய வழிகாட்டுதலை அடைவது எந்நாளோ என்று தாயுமானவர் மிக உருக்கமாக பாடுகிறார்.

தமிழ்நாட்டில் நமது முன்னோர்கள் இறைவனைப் பற்றியும், இறைவனின் தன்மைகளைப் பற்றியும் மிக உயரிய கருத்தையே கொண்டிருந்திருக்கிறார்கள். பின்னால் வந்த கலாசார புரட்சியினாலும், ஆரியர்கள் போன்ற அந்நிய சக்திகளின் படையெடுப்பாலும் இறைவனைப் பற்றிய கொள்கைகளும் திரிந்து இன்று கண்டதையும் கடவுளாக்கும் நிலைக்கு தமிழன் சென்று விட்டான். தமிழ் பாடல்கள் பலவற்றை ஆராய்ந்தால் அங்கு ஏக தெய்வ கொள்கை பல பாடல்களில் ஊடுருவி வருவதைக் காணலாம்.

இனி வருங்காலங்களில் தமிழ் பாடல்களில் உள்ள ஏக தெய்வ கொள்கைகளை குர்ஆனோடு ஒப்பிட்டு சில ஆக்கங்களை தர முயற்சிக்கிறேன் இறைவன் நாடினால்......