நெகிழ வைத்த நிகழ்வு - 10

ஒவ்வொரு மாதமும் கடைசி வாரங்களில் வியாழக்கிழமைகளில் சகோதரர்கள் தங்கியுள்ள அறைகளுக்கே சென்று மார்க்க விளக்கங்கள் அளிப்பது பல ஆண்டுகளாக நடந்து வருகிறது. அந்த வகையில் சென்ற வாரம் ஒரு இந்து மத சகோதரரின் அறைக்கு சென்றோம். 'மார்க்க விளக்கங்கள் நடத்திக் கொள்ள அனுமதி தர முடியுமா?' என்று கேட்டதற்கு உடன் அனுமதி கொடுத்தார். மற்ற நண்பர்களின் அறைகளில் நடக்கும் கூட்டங்களிலும் தவறாமல் கலந்து கொள்வார். அருண் குமார் என்ற அந்த சகோதரரின் இறை தேடலானது எனக்குள் ஆச்சரியத்தை தந்தது.

நோன்பு என்ற தலைப்பில் சகோ மவுலவி உபைதுல்லாஹ் அவர்கள் சிறந்த சொற்பொழிவை 45 நிமிடங்கள் நிகழ்த்தினார். சொற்பொழிவு முடிந்தவுடன் விழுப்புரம் மாவட்டம் கள்ளக் குறிச்சியில் உள்ள தியாக துருவம் என்ற கிராமத்தில் பள்ளிவாசல் கட்டுவதற்காக சகோதரர்களிடம் வசூல் செய்யப்பட்டது. அந்த இடத்திலேயே கிட்டத்தட்ட 600 ரியாலுக்கு மேல் வசூலானது. சகோ அருண்குமார் தானாகவே முன் வந்து 25 ரியால் பள்ளிவாசல் கட்டிட நிதிக்காக கொடுத்தார்.

முஸ்லிம்களை எந்நேரமும் வம்புக்கிழுக்கும் ஹெச்.ராஜா போன்றவர்களும் இந்துக்கள்தான். மார்க்க சொற்பொழிவு நடக்க இடமும் கொடுத்து பள்ளிவாசல் கட்ட நிதியும் கொடுத்த அருண்குமார் போன்றவர்களும் இந்துக்கள்தான்.

ஹெச். ராஜா இந்துத்வாவை சேர்ந்தவர். அருண் குமார் இந்து மதத்தைச் சேர்ந்தவர். இந்து மதம் வேறு: இந்துத்வா வேறு என்பதை இந்நிகழ்வுகளின் மூலம் அறிந்து கொள்ளலாம்.