இந்த வருடம் ஹஜ் (2017) சில முக்கிய காட்சிகள்!

இந்த வருடம் ஹஜ் (2017) சில முக்கிய காட்சிகள்!

25 லட்சம் பேரையும் சமாளிப்பது என்பது லேசான காரியம் அல்ல... பல மொழிகள், பல கலாசாரங்கள் உடைய மக்கள் ஒன்றாக குழுமும் போது ஏற்படும் பிரச்னைகளை சமாளிப்பது மிக சிரமம். 90 சதமான மக்களுக்கு அரபி மொழி தெரியாது. தங்கள் இருப்பிடத்திற்கு செல்லவே மிகவும் சிரமப்படுவர். அதிலும் ஹஜ்ஜூக்கு வருபவர்கள் பெரும்பாலும் 60 வயதை தாண்டியவர்களாக இருப்பர். முதுமையில் இந்த காரியங்களை செய்வது அவர்களுக்கு மிகப் பெரும் சவால்.

மேலும் கஃபாவில் வருடாவருடம் மேலே போடப்படும் துணியை மாற்றுவார்கள். கஃபாவின் மேல் நின்று கொண்டு துணியை விரிப்பதை பார்க்கிறோம். இந்த கட்டிடத்திற்கென்று ஏதும் புனிதம் என்று இருந்தால் இவ்வாறு அதன் மேல் நிற்க முடியுமா? இறைவனை வணங்கி வலம் வருவதற்கு ஒரு எல்லை இருக்க வேண்டும். அதற்காக இந்த கட்டிடம் நிர்மாணிக்கப்பட்டுள்ளது. இந்துக்களில் சிலர் சொல்கின்றனர் அதனுள் சிவலிங்கம் இருக்கிறதென்று. :-) அவ்வாறு இருந்தால் சிலையின் மேல் புறம் நிற்க முடியுமா? சிலையை அவமதித்ததாகாதா? நபிகள் நாயகம் காலத்தில் இதே கஃபாவில் 365 சிலைகள் இருந்ததாம். தினம் ஒரு சிலை என்று அன்றைய அரபுகள் வணங்குவார்களாம். நபிகள் நாயகம் தனது தோழர்களோடு அனைத்தையும் அப்புறப்படுத்தினார்.

எனவே இறைவனை வணங்க ஒரு எல்லையாக அந்த கஃபாவை இறைவன் நிர்ணயித்துள்ளான். இறைவனை முதன் முதலாக வணங்குவதற்கு கட்டப்பட்ட பள்ளிவாசல் என்பதால் அந்த இடம் புனிதமாகிறது. கஃபா என்ற கட்டிடத்திற்கு எந்த புனிதமும் இல்லை என்பதை விளங்க வேண்டும். ஒரு சில முஸ்லிம்கள் அந்த கஃபாவின் மேல் கை வைத்துக் கொண்டு அழுது பிரார்த்திக்கின்றனர். இது தவறு. தொழுது கொண்டு இறைவனிடம் பிரார்த்திக்க வேண்டும். அல்லது கீழே அமர்ந்து அமைதியாக மனமுருகி பிரார்த்திக்க வேண்டும்.