சீரழிந்து வரும் இன்றைய இளைஞர்கள்!

சீரழிந்து வரும் இன்றைய இளைஞர்கள்!

கைது செய்யப்பட்டவர் விருகம்பாக்கம் மீனாட்சியம்மன் நகரைச் சேர்ந்த ஹரீஷ் (19). மீனம்பாக்கத்தில் உள்ள தனியார் கல்லூரியில் பி.காம் முதலாம் ஆண்டு படித்து வருகிறார். இவரது தந்தை சிங்கப்பூரில் உள்ளார். கப்பலில் வேலை செய்கிறார்.

இந்நிலையில், சில தினங்களுக்கு முன்னர் ஹரீஷ் மதுரவாயலில் சாலையோரம் நின்ற பைக் ஒன்றை திருடி உள்ளார். பின்னர் அங்கிருந்து தாம்பரம், மீனம்பாக்கம் வழியாக வரும் வழியில் சாலையோரம் செல்போனில் பேசிக் கொண்டு சென்றவர்களின் செல்போன்களை பறித்துள்ளார்.

இப்படி இரவு 9 மணி முதல் மறுநாள் அதிகாலை 1 மணி வரை 4 மணி நேரத்தில் 14 செல்போன்களை தொடர்ந்து பறித்துள்ளார்.

பின்னர், அனைத்து செல்போன்களையும் பாரிமுனையில் விற்றுள்ளார். ரூ.10 ஆயிரம் மதிப்புள்ள செல்போன்களை ரூ.2 ஆயிரத்துக்கு விற்பனை செய்துள்ளார். அவரை பல்லாவரம் ஜி.எஸ்.டி சாலையில் கைது செய்ததாக போலீஸ் அதிகாரிகள் தெரிவித்தனர்.

ஆடம்பர வாழ்க்கை

கைது செய்யப்பட்டுள்ள ஹரீஷ் போலீஸாரிடம் கூறியதாவது:

“திருடிய செல்போன்களை விற்பனை செய்த பணத்தில் நண்பர்களுடன் ஆடம்பரமாக செலவு செய்வேன். ஹோட்டலில் விதவிதமான உணவருந்துவோம். விலை உயர்ந்த ஆடைகளை வாங்குவோம். என்னுடைய செலவுக்கு தாய், தந்தை பணம் தருவதில்லை. எனவே செல்போன்களைத் திருடி அதன்மூலம் கிடைக்கும் பணத்தில் உல்லாச வாழ்க்கையில் ஈடுபட்டோம். கல்லூரிக்கு செல்லும்போது, செல்போன் பறிப்பது குறித்து நண்பர்களுடன் ஆலோசிப்போம். பின்னர், நண்பர் வீட்டுக்குச் சென்று வருவதாக வீட்டில் கூறிவிட்டு செல்போன் பறிக்கச் சென்று விடுவோம். கிடைக்கும் பணத்தில் சொந்தமாக பைக் வாங்க திட்டமிட்டிருந்தேன். அந்த திட்டம் நிறைவேறாமல் போய்விட்டது” என்று கூறியுள்ளார்.

ஹரீஷின் தாயார், “மகன் தினமும் கல்லூரிக்குத்தான் செல்கிறான் என்று நம்பியிருந்தேன். அவன் படித்து பெரிய வேலையில் சேர்ந்து எங்களுக்கு கவுரவத்தை ஏற்படுத்தி கொடுப்பான் என நினைத்தேன். ஆனால், எங்கள் குடும்பத்தை தலைகுனிய வைத்து விட்டான்” என கண்ணீர் விட்டு கதறியதாக போலீஸார் தெரிவித்தனர்.

இதற்கிடையில் ஹரீஷின் கூட்டாளிகளான கோவூரைச் சேர்ந்த ஆகாஷ்(20) மற்றும் கல்லூரியில் முதலாம் ஆண்டு படிக்கும் 17 வயதுள்ள கல்லூரி மாணவர் ஒருவர், சிறுவர் ஒருவர் என மொத்தம் 4 பேர் கைது செய் யப்பட்டுள்ளனர்.