விருத்த சேதனம் பண்ணும் விழாவிலும் கூத்தாடிகள்!

ஆண்கள் தங்களின் பிறப்பு உறுப்பில் உள்ள நுனித் தோலை வெட்டி விடுவதற்கு விருத்த சேதனம் என்று சொல்கிறோம். இதனை இஸ்லாமியர்கள் அனைவரும் கண்டிப்பாக செய்வர். நபிகள் நாயகம் இதனை அனைவரும் செய்து கொள்ளுங்கள் என்று கட்டளையிட்டுள்ளனர். எப்படி ஆண்கள் தாடி வைப்பது ஒரு நபி வழியோ அது போல் சுன்னத் என்று அறியப்படும் இந்த விருத்த சேதனம் ஒரு நபி வழி. இதனை செய்து கொள்வதால் உடல் ஆரோக்கியமாக இருக்கும் தாம்பத்ய வாழ்வும் சிறப்பாக இருக்கும் என்பது மருத்துவ அறிஞர்களின் ஒரு மித்த கருத்தாகும்.

இந்த ஒரு நிகழ்வை இன்றும் சில மார்க்கம் அறியாத இஸ்லாமியர் வெகு விமரிசையாக கொண்டாடுகின்றனர். இதே போன்ற நபி வழியான தாடி வைத்துக் கொள்வதற்கு டிஜிடல் போர்டு யாரும் வைப்பதில்லை. எல்லோரையும் அழைத்து விருந்து பரிமாறுவதில்லை. மாலைகள் அணிவித்து அழகு பார்பதில்லை. வசதியற்ற பெற்றோர் கடன்களை வாங்கியாவது விருத்த சேதன நிகழ்வை விமரிசையாக கொண்டாடும் கொடுமையை பார்க்கிறோம். மேலும் சிலர் கூத்தாடிகளை முக்கியத்துவப்படுத்திபோ ஸ்டர்களும் அடிக்கின்றனர். ஒரு சில வீடுகளில் சினிமா பாட்டுக் கச்சேரியும் நடக்கும்.

இதற்கு செலவிடும் தொகையை ஒரு ஏழை மாணவனின் படிப்பு செலவுக்கு தரக் கூடாதா? வீடில்லாமல் எத்தனையோ குடும்பங்கள் பிளாட்பாரங்களில் காலம் தள்ளுகின்றனரே! அவர்களுக்கு ஒரு குடிசை அமைத்துக் கொடுக்கக் கூடாதா?

வசதியுள்ளவர்கள் பணத்தை இது போன்று ஆடம்பர களியாட்டங்களில் செலவழித்தால் இறைவனின் சாபம் உண்டாகும் என்பதை ஏனோ இவர்கள் உணர்வதில்லை. மார்க்க அறிஞர்கள் என்ற பெயரில் இதற்கும் சென்று ஃபாத்திஹா ஓதி விட்டு விருந்தும் சாப்பிட்டு வருபவர்களை நினைத்தால் அழுவதா சிரிப்பதா என்றும் தெரியவில்லை.

ஒரு முறை சவுதியின் ரியாத் நகரில் 57 வயது மதிக்கத்தக்க ஒரு இந்து நண்பர் எங்களிடம்......

'இஸ்லாமிய கொள்கை எனக்கு பிடித்துள்ளது. இஸ்லாத்தை ஏற்றுக் கொள்ள தயாராக உள்ளேன். ஆனால் இந்த விருத்த சேதனம் என்ற சுன்னத் செய்வதில் எனக்கு பயமாக உள்ளது. அதுதான் எனக்கு தடை' என்றார்.

'விருத்த சேதனம் என்பது தாடி வைப்பது போன்று நபி அவர்கள் வலியுறுத்திய ஒரு நடைமுறை. தாடி வைக்காமல் எத்தனையோ முஸ்லிம்கள் இல்லையா? எனவே நீங்கள் விரும்பா விட்டால் விருத்த சேதனம் பண்ணித்தான் ஆக வேண்டும் என்ற கட்டாயம் இஸ்லாத்தில் இல்லை. 60 வயதை நெருங்கி விட்ட உங்களுக்கு இனி விருத்த சேதனம் செய்தும் பயன் இல்லை. எனவே இஸ்லாத்தை ஏற்பதற்கு இது ஒரு தடை இல்லை' என்பதை விளக்கினோம்.

நாங்கள் சொன்னதை எல்லாம் கேட்டுக் கொண்டு பிறகு பலரிடம் விசாரித்துத் தெரிந்து கொண்டு இஸ்லாத்தை அந்த சகோதரர் ஏற்றார். தற்போது தனது குடும்பத்தவரையும் இஸ்லாத்தை ஏற்க வைத்துள்ளார்.

எல்லா புகழும் இறைவனுக்கே!